Mohabbat Fateh Tehri by Ayesha Asghar Episode 6

”میں آپ کی یہ خواہش بھی جلد پوری کر دوں گا“۔ہنسی روکتے ہوئے اسے دیکھا۔
”خواہش نہیں، طنز تھا“۔وہ حیران رہ گئی پھر غصے سے دانت پیستے ہوئے بولی۔  
”اچھا،اب جلدی کریں۔وقت ضائع نہ کریں“۔اس نے موبائل میں وقت دیکھا اور عجلت بھرے انداز میں گویا ہوا۔وہ خاموشی سے اسے دیکھتی رہی۔
”کیا تم مجھے کسی کے حوالے نہیں کرو گے؟“۔پھر آہستہ سے بولی۔آواز مدھم ہوگئی تھی،آنکھوں میں نمی چمکنے لگی، اور وہ سر جھکاتے ہوئے بےچینی سے انگلیاں چٹخانے لگی۔ 
”فاطمہ!“۔اس نے گہری سانس لی اور اس کے قریب آ گیا۔اس کی آواز نرم تھی۔سرگوشی جیسی۔”میں مانتا ہوں کہ میں برا ہوں،لیکن ہوں تو ایک مرد نا؟اور آپ میری بیوی ہیں۔ میں آپ کو کسی کے حوالے کیسے کر سکتا ہوں؟جانتا ہوں کہ یہ سب آپ کے لیے مشکل ہے،لیکن ایک بار پھر یہی کہوں گا۔مجھ پر یقین کریں،فاطمہ“۔دھیمے لہجے میں وہ اس کے جھکے سر کو دیکھتے ہوئے کہ رہا تھا۔  
  ”اس کے علاوہ میرے پاس کوئی آپشن بھی نہیں ہے“۔اس کے لہجے میں کرب کی گہری پرچھائیاں تھیں۔وہ آہستہ سے اس کے پاس سے گزری اور وارڈروب کی طرف بڑھ گئی۔  
”جہاں جا رہی ہیں،وہاں ایک شخص ہیں،ہاشم ارتضیٰ،اور ان کی بیٹی فاریہ ہاشم۔آپ فاریہ کے ساتھ رہیں گی“۔اس کی پشت پر نظریں جمائے،وہ بتانے لگا۔شاید اس کے خوف کو کم کرنے کے لیے۔اس نے سر ہلایا اور خاموشی سے کپڑوں کو آگے پیچھے کرنے لگی،پھر ایک نیلا سوٹ نکالنے لگی۔  
”یہ نہیں، یہ والا“۔ایک پل کے لیے وہ سانس لینا بھول گئی۔وہ اس کے بالکل پیچھے تھا۔اتنا قریب کہ اس کے کلون کی مہک اس کے سانسوں میں گھلنے لگی۔ فاز نے اس کے ہاتھ سے نیلا جوڑا ہٹا کر سیاہ جوڑا تھما دیا۔وہ سن سی رہ گئی۔اس کے دل کی دھڑکن لمحہ بھر کو جیسے رک گئی۔بہت احتیاط سے وہ مڑی۔حیرت زدہ آنکھیں اس کی آنکھوں میں جا ٹھہریں۔  
”جلدی آ جائیں،میں انتظار کررہا ہوں“۔اس کی حیران نیلی آنکھوں سے نظریں ہٹاتا،وہ باہر نکل گیا۔جبکہ وہ پیچھے حیران کھڑی تھی،دل بےقابو دھڑک رہا تھا۔کیا ان کے درمیان ایسا تعلق تھا کہ وہ یوں اپنا حق جتا رہا تھا؟۔
  لینڈ کروزر کی چمکدار باڈی پر اس نے پشت ٹکائی ہوئی تھی،ہاتھ جیبوں میں دبائے،سفید جوگرز میں مقید پاؤں لاپروائی سے ایک دوسرے پر چڑھائے۔اس کی نظریں دروازے پر مرکوز تھیں،جیسے کسی خاص لمحے کی منتظر ہوں۔چند لمحے بعد،لکڑی کا دروازہ ہلکی سی چرچراہٹ کے ساتھ کھلا۔ سامنے وہ تھی۔رات کی تاریکی میں چاند کی طرح چمکتی ہوئی۔  
سیاہ گھٹنوں تک آتی فراک،کندھوں پر بے پرواہی سے پڑا سیاہ شیفون کا دوپٹہ،سائیڈ مانگ سے ٹوئسٹ کیے ہوئے بال،جن کی پشت پر کھلتی لٹیں رات کے سائے سے گھلتی محسوس ہو رہی تھیں۔چہرے پر کوئی میک اپ نہیں تھا، صرف فطری نکھار جو مدھم روشنی میں بھی نمایاں تھا۔ کانوں میں چھوٹے ٹاپس چمک رہے تھے،یوں لگتا تھا رات کے ستارے زمین پر جھلک رہے ہوں۔وہ قدم بہ قدم چلتی اس کے قریب آئی،مگر چہرے پر ہلکی سی برہمی تھی۔اس نے بنا کچھ کہے فرنٹ سیٹ کا دروازہ کھولا۔وہ خاموشی سے اندر بیٹھی،مگر اس کے بند کرنے سے پہلے خود ہی دروازہ زور سے بند کر دیا۔  
”مطلع ابر آلود لگتا ہے“۔وہ مسکراہٹ روکنے کو دانتوں تلے لب دبا گیا۔۔سر دائیں بائیں ہلاتے ہوئے اس نے بالوں میں ہاتھ پھیرا اور لمبے قدموں سے چلتا ہوا ڈرائیونگ سیٹ کی طرف آگیا۔سیاہ تارکول کی سڑک پر گاڑی رواں دواں ہوگئی۔اندر دو لوگ موجود تھے، مگر خاموشی کسی تیسری ہستی کی طرح ان کے درمیان براجمان تھی۔یہ سکوت آخرکار فاز عالم کی آواز سے ٹوٹا۔  
”آپ وہاں کسی سے ہمارے رشتے کا ذکر نہیں کریں گی“۔آواز میں سنجیدگی تھی،نظریں سڑک پر جمی ہوئی تھیں۔وہ چونک کر اس کی طرف متوجہ ہوئی۔  
”تو تم مجھے وہاں کس رشتے سے لے جا رہے ہو؟بتاؤ کیا کہو گے انہیں میں کون ہوں؟تمہیں خیال ہو یا نہ ہو۔لیکن مجھے اپنی عزت بہت پیاری ہے“۔اس کی آواز تیز ہوگئی تھی۔وہ غضبناک نگاہوں سے اسے گھور رہی تھی،جبکہ فاز کے چہرے پر کوئی تاثر نہیں تھا۔  
”یہ مسئلہ میرا ہے،آپ پریشان مت ہوں۔میں جانتا ہوں کہ کیا کہنا ہے اور کیا نہیں“۔ایک لمحے کے لیے اس کی طرف دیکھا،پھر نظریں واپس سڑک پر مرکوز کر لیں۔  
”بہن بتاؤ گے؟ ہاں؟ بولو؟“۔وہ زہریلے طنز سے بولی۔   
”استغفراللّٰہ، لڑکی۔آپ نے کیا یہ تہیہ کرلیا ہے جب بولنا ہے فضول ہی بولنا ہے“۔۔ملامتی نگاہوں سے اسے دیکھا۔
”میں حقیقت بیان کرتی ہوں،ظاہر ہے تمہیں فضول لگے گی“۔فاطمہ تلخی سے مسکراتے ہوئے،کندھے پر دوپٹہ درست کرتے ہوئے بولی۔  
”ہاشم ارتضیٰ کو نکاح کے بارے میں پتہ ہے“۔کچھ توقف کے بعد وہ بولا۔
 ”مطلب فاریہ ہاشم سے بات پوشیدہ رکھنی ہے؟“۔فاطمہ کی آنکھیں حیرت سے پھیل گئیں۔ فاز نے اثبات میں سر ہلایا۔  ”اوہ! آئی سی“۔لبوں کو ہلکا سا گول کرتے ہوئے بولی۔آنکھوں میں عجیب سی چمک ابھری۔ 
”آپ کا کچھ نہیں ہوسکتا“۔فاز نے مایوسی سے سر ہلایا۔اور گاڑی رات کی تاریکی میں خاموشی سے آگے بڑھتی رہی۔
اس وقت دونوں ہاشم ارتضیٰ اور فاریہ ہاشم کے سامنے صوفے پر بیٹھے ہوئے تھے۔چائے ختم کرتے ہوئے،اس نے کپ ٹیبل پر رکھا اور اپنے برابر میں بیٹھی فاطمہ کی ہر حرکت بخوبی دیکھ رہا تھا۔وہ جانتا تھا کہ فاطمہ گھبرا رہی ہے۔
”سر، اب میں چلتا ہوں“۔اس کے کھڑے ہوتے ہی،وہ تینوں بھی اٹھے۔
”بیسٹ آف لک اور فاطمہ کے لیے فکرمند نہیں ہونا“۔ ہاشم صاحب نے اس کے شانے پر ہاتھ رکھا اور تھپتھپایا۔ پھر، اس کے برابر میں کھڑی فاطمہ کی طرف اشارہ کیا۔اس نے ہلکی مسکراہٹ کے ساتھ سر کو جنبش دی،مگر فاطمہ کا دل ایک گہری بے چینی سے لبریز تھا۔
”بیسٹ آف لک“۔فاریہ ہاشم مسکراتے ہوئے آگے آئی اور اس کے بازو پر ہاتھ رکھتی ہوئی بولی۔
”تھینک یو چھوٹی“۔۔فاز نے نرم مسکراہٹ کے ساتھ کہا۔فاطمہ کمال ناخوشگواری سے یہ منظر دیکھی تھی۔