Mohabbat Fateh Tehri by Ayesha Asghar Episode 6

ایک گولی،ایک لمحہ،اور وہ اپنے دائیں گھٹنے میں گولی کھا کر زمین پر گر گیا۔درد سے کراہتے ہوئے،اس کا پسٹل ہاتھ سے چھوٹ کر دور جا گرا۔چیخ کی بازگشت غار کی دیواروں سے ٹکرا کر لوٹنے لگی۔وہ تڑپتے ہوئے بمشکل سر اٹھا پایا، اور سامنے بھاری سیاہ بوٹ دیکھ کر دل میں ایک سنسنی دوڑ گئی۔چہرہ خوف اور درد کی شدت سے سفید پڑگیا۔
”تت…تم؟“۔کانپتے لبوں سے بمشکل نکلا۔لیکن اس کی نظریں ایک اور چیز پر جم گئیں۔سیاہ پوش کے گلے میں لٹکتی وہ مخصوص چین،جو کسی خوفناک یاد کا حصہ معلوم ہوتی تھی۔
”ہاں، میں۔تمہاری موت“۔اس نے اسپاٹ لہجے میں کہا نظریں مزید یخ بستہ ہوگئیں،پسٹل کی نال اس کی گردن پر سختی سے جمائی ہوئی تھی۔
”کہاں… کہاں لے گئے تم… انہیں؟“۔زخمی شخص نے تکلیف سے ہانپتے ہوئے پوچھا۔
 ”جہاں انہیں ہونا چاہیے تھا“۔سیاہ پوش نے جھک کر سرگوشی کی۔پھر ایک ہی لمحے میں،اس کے ہاتھ حرکت میں آئے۔پسٹل گردن سے ہٹائی،اور دو گولیاں اس کے بازو میں پیوست کر دیں۔
”آآہہ“۔چیخ اتنی خوفناک تھی کہ غار کی دیواریں لرز گئیں۔
”فون نکالو“۔سرد آواز نے اسے جیسے برف میں جما دیا۔وہ درد سے بلبلاتے ہوئے اپنی جیب سے فون نکال نہ سکا،تو سیاہ پوش نے خود آگے بڑھ کر اس کا فون نکالا،نمبر ملایا، اور اس کے کان سے لگا دیا۔
”بتاؤ اپنے باس کو… کہ میں اس کی ساری لڑکیاں لے گیا ہوں“۔دوسری طرف خاموشی تھی، پھر ایک گہری سانس کی آواز آئی۔زخمی شخص نے مشکل سے سرگوشی کی،اور پیغام پہنچا دیا۔
کال کٹنے کی دیر تھی کہ سیاہ پوش نے موبائل کی اسکرین توڑ دی، سم نکال کر زور سے زمین پر رگڑ کر توڑ ڈالی۔وہ جانتا تھا کہ اصل شخص تک یہ پیغام کئی ہاتھوں سے ہوتا ہوا پہنچے گا،لیکن جو پیغام دینا تھا،وہ دے چکا تھا۔
”مجھے…چھو..ڑ..دو۔مت..مارو مجھے۔میری…زندگی بخش دو“۔۔زخم سے چور درد سے کراہتے ہوئے وہ فریاد کرنے لگا۔
”کوئی حق نہیں تم جیسے لوگوں کا کہ وہ سانس لیں،جو کسی ماں کے دل کا سکون نوچ لیں،جو کسی باپ کے بڑھاپے کا سہارا چھین لیں،جو کسی بہن کی ہنسی،کسی بچے کی معصومیت کو روند ڈالیں۔ایسے ہاتھ،جو دوسروں کی زندگیوں کے چراغ بجھا دیں،انہیں روشنی میں رہنے کا حق نہیں ہونا چاہیے۔ایسے قدم،جو معصوموں کی دہلیز سے خوشیاں روند کر گزر جائیں،انہیں زمین پر چلنے کا اختیار نہیں ہونا چاہیے۔جو کسی کی دنیا اجاڑ دے،اس کی اپنی دنیا بھی اجڑنی چاہیے۔جو کسی کی سانسوں کا گلا گھونٹے، اس کے لیے بھی ہوا کا ایک جھونکا حرام ہونا چاہیے۔تاکہ آئندہ کوئی ظالم کسی ماں کی کوکھ اجاڑنے سے پہلے کانپ اٹھے،کسی باپ کی امید توڑنے سے پہلے اس کے ہاتھ لرز جائیں،اور کسی بہن کی عزت پر میلی نظر ڈالنے سے پہلے خوف سے اس کی آنکھیں بند ہوجائیں۔یہ دنیا بےحسی کے لیے نہیں بنی،یہ ظالموں کے لیے پناہ گاہ نہیں۔انصاف کا تقاضا یہی ہے کہ جو معصوموں کے چراغ گل کرے،وہ خود ہمیشہ کے لیے اندھیرے میں ڈوب جائے“۔اس کی آنکھوں میں بیک وقت بہت سے جذبات امڈ آئے تھے۔آواز میں شدت تھی۔آنکھوں کے سامنے خون میں لپٹی گڑیا تھی۔اس کی چہچہاتی چڑیا۔اور بھی ناجانے کتنی گڑیائیں اپنی جان کی بازی ہار چکی تھیں۔کتنے بیٹے ماں باپ کو چھوڑ کر جاچکے تھے۔ناجانے کتنے باپ نے اپنا سہارا کھو دیا تھا۔زمین پر تڑپتے دشمن کو ایک آخری، سرد نگاہ سے دیکھا،پھر ایک اور گولی اس کے سینے میں اتار دی۔
چٹانوں سے رگڑ کھاتے،وہ غار سے باہر نکلا۔سیاہ آسمان کے نیچے،کچھ فاصلے پر کھڑی گاڑی کے ہیڈ لائٹس آن ہوئے۔ دروازہ کھلا، اندر بیٹھا ساتھی منتظر تھا۔
”کام ہو گیا؟“ نوجوان نے بےچینی سے پوچھا۔
سیاہ پوش نے ایک نظر ہاتھوں پر لگے خون کو دیکھا،اثبات میں سر ہلایا،پھر خاموشی سے فرنٹ سیٹ پر بیٹھ گیا۔
”چلو۔“
گاڑی کے انجن کی گڑگڑاہٹ دور تک سنائی دی،اور وہ رات کے سائے میں گھل گئی۔
رات کی سیاہی ابھی تک آسمان پر گہری چادر کی طرح تنی ہوئی تھی۔ہوا میں نمی کی ہلکی سی خوشبو گھلی ہوئی تھی،جیسے بادلوں نے زمین پر اپنے نرم لمس چھوڑے ہوں۔ پورے شہر پر خاموشی کی دبیز تہہ بچھی تھی،کہیں دور کسی کتے کے بھونکنے کی آواز اس سناٹے کو چند لمحوں کے لیے چیر کر پھر معدوم ہوجاتی۔درختوں کے سائے ساکت، چاند مدھم، اور روشنی کی آخری کرنیں دیواروں سے سرک رہی تھیں۔  
اچانک ہارن کی تیز آواز نے رات کے سناٹے میں لرزش پیدا کی۔فاطمہ چونک کر سیدھی ہوئی،کتاب اب بھی اس کے ہاتھ میں تھی،مگر اس کے صفحے اب محض خاموشی کے گواہ بن چکے تھے۔نیند تو اسے یوں بھی نہیں آئی تھی،نئی جگہ پر اجنبیت کی سی کیفیت چھائی رہتی تھی۔  
وہ تیزی سے اٹھی،قدم بےاختیار کھڑکی کی طرف بڑھے۔ پردے کو آہستہ سے سرکایا،اور نیچے جھانکا۔پورچ میں ہلکی روشنی پھیلی ہوئی تھی،روشنی کے دھارے میں سیاہ گاڑی کھڑی تھی۔اس کے دروازے کا ہینڈل دبا،اور ایک شناسا قامت گاڑی سے نکلی۔فاز عالم دونوں ہاتھوں کو جیب میں ڈالے،قدموں میں وہی مخصوص ٹھہراؤ تھا،ہوا کی خنکی کے باوجود بغیر کسی جلدی کے،پرسکون مگر تھکے ہوئے انداز میں۔۔ 
ڈوپٹہ کندھوں پر ٹھیک کرتی،سلیپر پہنتے وہ بےساختہ نیچے بھاگی، مگر جیسے ہی لاؤنج کے قریب پہنچی،اندر سے باتوں کی آوازیں آ رہی تھیں۔وہ رک گئی،دیوار کے قریب کھڑی ہو کر سننے لگی۔  
”مشن مکمل ہوا؟“۔ہاشم ارتضیٰ کی آواز میں گہری سنجیدگی تھی،جو ہمیشہ رہتی تھی۔  
”سکسس فلی ڈن“۔فاز کا لہجہ ہموار تھا۔فاطمہ کو لگا شاید وہ مسکرایا بھی ہے،جیسے کسی نے شطرنج کی چال کامیابی سے کھیل دی ہو۔  
”اس وقت آنا ضروری نہیں تھا،تم بعد میں بھی اُسے لینے آ سکتے تھے“۔ہاشم ارتضیٰ کا انداز سر زنش کرتا ہوا تھا۔
”وہ یہاں کمفرٹیبل نہیں ہوں گی،اس لیے جیسے ہی سب کچھ مکمل ہوا،میں لینے آ گیا“۔اس کی آواز میں کوئی جھجک،کوئی تذبذب نہیں تھا۔  
”مجھے یقین نہیں آتا کہ تم وہی فاز عالم ہو“۔ہاشم ارتضیٰ کی آواز میں ایک عجیب سی حیرت تھی،وہ کسی بھولی بسری یاد کو چھو رہے تھے،جو اب دھندلی ہو چکی تھی۔  
”بس سر، وقت اور حالات بہت کچھ بدل دیتے ہیں۔کچھ چیزوں کو اندر دبا دیتا ہے،کچھ کو جڑ سے ختم کر دیتا ہے“۔اس کی آواز ٹھری ہوئی تھی۔کچھ لمحے جیسے ہوا میں معلق رہے۔”کہاں ہیں وہ؟“۔پھر فاز نے فاطمہ کا پوچھا۔اسی لمحے وہ اندر آئی،اور فاز کی نظریں اس پر جا ٹھریں۔فاطمہ کمال خود بھی نہیں جانتی تھی کہ اسے سامنے دیکھتے ہی اس کے چہرے پر اطمینان جھلکا ہے۔  
”اوکے سر،اب میں چلتا ہوں۔معذرت،آپ کو تکلیف دی“۔اسے دیکھتے ہی وہ فوراً سے اٹھ کھڑا ہوا۔
”فضول باتیں مت کیا کرو۔بیٹے ہو تم میرے“۔محبت سے اسے ڈانٹا۔فاز ہلکا سا مسکرایا،ان کے گلے لگا،اور پھر فاطمہ کے ساتھ باہر نکل آیا۔
رات کی گہری سیاہی میں سڑک خاموشی سے سو رہی تھی۔وقفے سے ایک دو گاڑی سناٹے کو چیرتے ہوئے گزر جاتی۔  بادلوں کی اوٹ میں چاند کہیں کھو گیا تھا۔ 
”آپ سوئی نہیں تھیں؟“۔فاز کی آواز گونجی، دھیمی مگر واضح۔  
”مجھے نیند نہیں آئی“۔فاطمہ نے سیٹ سے سر ٹکایا،لہجہ تھکا ہوا تھا۔  
”جانتا تھا“۔سامنے سڑک پر نظریں جمائے وہ سر کو دھیرے سے جنبش دیا۔فاطمہ نے چونک کر اس کی طرف دیکھا۔ آنکھوں میں سوال تھا۔وہ کیسے جانتا تھا؟وہ کیوں جانتا تھا؟مگر سوال زبان تک نہ آ سکے۔پھر اچانک اس کی نظریں اس کے بازو پر جا ٹھریں۔روشنی کے مدھم عکس میں خون کی چمک واضح تھی۔  
”یہ کیا ہوا ہے؟“۔ 
فاز نے پہلے ناسمجھی سے اسے دیکھا،پھر اس کی نگاہوں کے سمت،اپنے بازو کی طرف۔بات سمجھ میں آگئی تھی۔
”کچھ نہیں“۔اس نے لا پرواہی سے جواب دیا۔
”کچھ نہیں؟“۔اس کے صبر کا بند ٹوٹا۔ ”تمہاری بلیڈنگ ہو رہی ہے، اور تم کہہ رہے ہو ‘کچھ نہیں’؟“۔اس کی آواز تیز ہوئی تھی۔فاز نے ایک پل کو اسے دیکھا،حیرانی سے۔کیا وہ اس کے لیے پریشان ہورہی تھی؟۔
 ”اٹس نتھنگ…ڈونٹ وری“۔۔آواز میں نرمی تھی۔انداز ٹالنے والا تھا۔
”ہو آر یو؟ٹیل می ہو یو رئیلی آر؟“۔۔آنکھوں میں شدید غصہ اور آواز لرزتی ہوئی تھی۔ 
”آپ جانتی ہیں سب میرے بارے میں“۔کچھ چونک کر اسے دیکھا،پھر اپنے ازلی سنجیدہ انداز میں جواب دیا۔
  ”نہیں، میں کچھ بھی نہیں جانتی“۔اور جیسے ضبط ٹوٹ گیا۔”تم نے مجھ سے نکاح کیوں کیا؟احسن کو کیوں اغوا کیا؟تم آخر چاہتے کیا ہو؟کون ہو تم؟“۔۔الفاظ کی شدت، سانسوں کی بےترتیبی،اور بےبسی کے آنسو گاڑی کے اندر پھیل سی گئی۔فاز خاموشی سے گاڑی چلاتا رہا،لب بھینچے،نگاہیں سڑک پر جمائے۔اس کے پاس فلحال ان سوالوں کا جواب نہیں تھا۔
شام کی چمکتی روشنیوں میں گھرا برنس روڈ،روشنیوں کا وہ دریا جس کی موجیں رات بھر بہتی رہتی تھیں۔کراچی کی ہلچل بھری سڑکوں کے درمیان ایک گلی جہاں ہر قدم پر کھانے کی خوشبوئیں رچی بسی تھیں۔کوئلوں پر سلگتے تکے،تندور سے نکلتی گرم گرم نان کی خوشبو،دہکتے ہوئے توا پر پراٹھوں کی سرسراہٹ،اور سب سے بڑھ کر،بریانی کے دیگوں سے اٹھنے والی اشتہا انگیز مہک۔یہ سب برنس روڈ کی پہچان تھی۔
لوگوں کی چہل پہل،شور و غل،ٹھیلوں پر کھڑے گاہکوں کی آوازیں،اور دور کہیں کسی پرانی عمارت سے آتی اذان کی بازگشت۔یہاں دن اور رات کا کوئی فرق نہیں تھا،کراچی کی گلیوں میں وقت تھم سا جاتا تھا۔
شازمہ کا چہرہ خوشی سے دمک رہا تھا۔ابھی ان کی شادی کو ایک ہفتہ ہی ہوا تھا،اور وہ اپنے شریکِ حیات کے ساتھ کراچی کو جاننے اور محسوس کرنے نکلی تھیں۔ہاتھ میں ہاتھ ڈالے،وہ برنس روڈ کی رونقوں میں کھوئی جا رہی تھیں۔
”برنس روڈ کی مزیدار حلیم اور بریانی بہت مشہور ہے، چلیں، پہلے آپ کو وہ کھلاتا ہوں“۔وہ خوشگوار مسکراہٹ کے ساتھ فیملی ہال میں داخل ہوئے۔اندر ہلکی ہلکی روشنی تھی۔اردگرد میزوں پر بیٹھے لوگ کھانے میں مصروف تھے، ہنسی مذاق، قہقہے،اور چمچوں کی کھنک فضا میں گھلی ہوئی تھی۔
”یہاں ہر وقت گہما گہمی رہتی ہے، کیا دن، کیا رات“۔شازمہ نے اردگرد دیکھتے ہوئے تبصرہ کیا۔ان کے چہرے پر حیرت اور خوشی کی ملی جلی جھلک تھی۔
”ایسا ہی ہے،تو آپ کو پسند آیا میرا کراچی؟“۔
”آپ کا کراچی؟“۔وہ شرارت سے انہیں دیکھتے ہوئے مسکرائیں۔
”ہاں، بتائیں تو پھر محبت ہوئی اس سے؟“۔ان کی آنکھوں میں چمک تھی۔
”میں نے سنا ہے کراچی میں حادثات بہت ہوتے ہیں،اس لیے اتنی جلدی محبت نہیں کرنا چاہتی“۔شازمہ نے مبہم لہجے میں کہا۔
”آں ہاں!اب ایسا بھی نہیں ہے۔کراچی کے ساحل نے بہت سی محبتوں کے قصے کو اپنے اندر بسائے رکھا ہے،جو عشق کی حدوں تک پہنچی ہیں“۔
”حسین آباد کی آئسکریم،جو آپ کے ساتھ کھائی تھی… ساحلِ سمندر کی ریت،جہاں آپ کے ساتھ ہمقدم ہوئی تھی… اور یہ برنس روڈ کی مزیدار بریانی،جو آپ کے ساتھ کھاؤں گی…مجھے ان سب سے محبت ہونی ہی ہے“۔وہ دلکش لہجے میں بولیں تو ان کے سامنے بیٹھے شخص کی مسکراہٹ گہری ہوگئی۔
”آپ کو میں کراچی کی ہر جگہ سے محبت کرواؤں گا“۔انہوں نے نرمی سے شازمہ کا ہاتھ تھام لیا۔اس لمحے وقت جیسے ٹھہر گیا تھا،جیسے کراچی کی ساری رونقوں کے بیچ یہ ایک خاموش،پرسکون گوشہ بن گیا تھا،جہاں صرف دو دلوں کی دھڑکنیں سنائی دے رہی تھیں۔عین اسی وقت، ویٹر ان کے آرڈر کے ساتھ آیا۔بریانی کی خوشبو نے پورے ہال میں اپنی گرفت مضبوط کر لی۔یہ صرف بریانی نہیں تھی،یہ کراچی کی پہچان تھی۔چٹپٹی،خوشبودار،لاجواب!بریانی صرف کراچی کی۔