لاؤنج میں قدموں کی چاپ گونج رہی تھی۔لکڑی کے فرش پر چپل کی نرم دھمک،ہوا میں بے چینی کی ہلکی سرگوشیاں۔فاطمہ کمال مسلسل ٹہل رہی تھی۔آسمانی رنگ کے پرنٹیڈ لان کے سوٹ میں میں اس کی موجودگی لاونج میں رکھے سفید اور نیلے امتزاج والے صوفوں کے ساتھ ہم آہنگ ہورہی تھی۔اونچی بندھی پونی ٹیل کے چند آوارہ لٹیں اس کے چہرے پر آ رہے تھے،مگر اس نے انہیں جھٹکنے کی زحمت بھی نہیں کی۔دروازہ کھلا۔وہ اندر آیا۔ہلکے قدم،مگر رعب کے ساتھ۔صبح سویرے وہ کہیں چلا گیا تھا،اور اب شام کی نیلی روشنی میں لوٹا تھا۔نظریں ٹکرائیں۔مگر وہ بے تاثر چہرے کے ساتھ آگے بڑھ گیا۔اسٹڈی کی طرف۔ایک پل کو بھی نہ رُکا،نہ کچھ پوچھا،نہ ہی کوئی سرسری جملہ بولا،جیسے وہ وہاں تھی ہی نہیں۔ہمیشہ وہ اس سے ملنے پر پوچھتا تھا “کیسی ہیں آپ؟”۔وہ اسے نظر انداز کر چکا تھا۔وہ پل بھر کو ٹھٹکی۔پھر لب بھینچ کر کر اسٹڈی کے بند دروازے کو دیکھا۔
”گو ٹو ہیل! مجھے کیا؟“۔اسٹڈی کے بند دروازے کو گھورتی رہی،پھر ایک جھٹکے سے پلٹی اور باہر نکل آئی۔لان میں ٹھنڈی ہوا کا ایک جھونکا اس کے گرم وجود سے ٹکرایا۔طمنایت کی ایک لہر رگ و جاں میں دوڑ گئی۔قدم بے اختیار بینچ کی طرف بڑھے، وہ وہاں بیٹھتے ہی پرسکون ہونے کی کوشش کرنے لگی۔موبائل کی اسکرین روشن کی،ماریہ کا نمبر ڈائل کیا۔
”ماریہ، کیسی ہو؟“۔وہ بےتابی سے پوچھی۔
”احسن کا کچھ پتہ چلا؟“۔دوسری طرف سے خیریت کی اطلاع ملتے ہی،وہ فوراً اگلے سوال پر آئی۔
”ماریہ، میں…میں خود کو قصوروار سمجھتی ہوں!میں کیا کروں؟وہ کچھ نہیں بتاتا!ایسا ظاہر کرتا ہے جیسے احسن کو اس نے غائب نہیں کیا،جیسے کچھ ہوا ہی نہیں۔کبھی لگتا ہے وہ ایک اچھا انسان ہے،اور کبھی خوفناک حد تک پراسرار۔میں اس گھر میں ایک بیکار چیز کی طرح ہوں،جیسے کوئی بےجان شے۔سمجھ نہیں آتا،وہ مجھے یہاں کیوں لایا ہے؟“۔آنکھیں نم ہو چکی تھیں۔الفاظ بھاری ہو رہے تھے۔
”اس نے میرے ساتھ اچھا نہیں کیا،ماریہ۔وہ بہت برا ہے۔ بہت برا“۔
”میری برائیاں ہو گئیں؟تو اب ذرا میری بات بھی سن لیں“۔آواز قریب سے آئی۔اس کے جسم میں جیسے بجلی سی دوڑ گئی۔ وہ ہڑبڑا کر بینچ سے کھڑی ہو گئی۔وہ کب یہاں آیا؟۔ موبائل والا ہاتھ،اس نے جھٹ سے نیچے کیا۔دوسری طرف سے ماریہ کی آواز اب بھی آ رہی تھی،مگر اب سب کچھ بے معنی تھا۔
”لسن می کیئر فُلی“۔اس نے بے لچک لہجے میں مخاطب کیا۔”ابھی، اسی وقت اپنے کمرے میں جائیں۔اندر سے دروازہ لاک کرلیے گا۔کوئی کچھ بھی کہے،جب تک میں نہ کہوں،دروازہ نہیں کھولیں گی۔انڈرسٹینڈ؟“۔وہ سنجیدگی سے اسے سمجھا رہا تھا۔فاطمہ نے گہری نظروں سے اس کے چہرے کو دیکھا۔
”کیا مطلب؟کچھ ہوا ہے؟“۔آواز لرز گئی۔خوف کی ہلکی سی لہر جسم میں دوڑ گئی۔
”نہیں۔میں کہیں جا رہا ہوں،اور میری غیر موجودگی میں آپ اپنے کمرے میں رہیں گی“۔آواز میں کوئی جھول نہیں تھا، کوئی گنجائش نہیں تھی۔
”تم مجھے قید کرنا چاہتے ہو؟تمہیں ڈر ہے کہ میں بھاگ نہ جاؤں؟“۔اگلے لمحے وہ بلند آواز میں بولی۔وہ خاموشی سے اسے دیکھتا رہا، جیسے کوئی کسی بےوقوف بچے کی حرکت پر افسوس کرتا ہے۔
”یہ لڑکیاں اتنی جذباتی اور کم عقل کیوں ہوتی ہیں؟“۔ خیال آیا، مگر زبان پر نہ آیا۔دروازہ فاطمہ نے خود لاک کرنا تھا اندر سے۔فاز نے باہر سے لاک کرنے کا ہرگز نہیں کہا تھا۔
”قید تو آپ پہلے ہی ہیں،اور بھاگنے کا سوال ہی پیدا نہیں ہوتا۔کیونکہ اگر آپ نے کوئی غلطی کی،تو آپ کے گھر کے لوگ خطرے میں پڑ سکتے ہیں۔اور فاطمہ کمال ایسا ہرگز نہیں چاہیں گی، ہیں نا؟“۔۔
”تم مجھے خوفزدہ نہیں کر سکتے“۔وہ مضبوط بننا چاہتی تھی، مگر اس کے اندر کہیں کچھ ٹوٹا۔
”آفکورس۔۔اگر آپ میری مان لیں تو“۔وہ ہلکا سا مسکرایا۔
”دفع ہو جاؤ! اللہ کرے جس مقصد کے لیے جا رہے ہو، ناکام ہو جاؤ“۔یہی تک تھی اس کی ہمت۔بھیگی آنکھیں اٹھا کر اسے دیکھی،بددعائیں ہونٹوں سے گر کر زمین میں دفن ہوتی رہیں۔
”بتمیزی نہیں“۔اس کی آواز سخت ہوئی۔
“I said it before, and I am saying it again” .
یہ وہ لمحہ تھا جہاں اس کی روح تک لرز گئی۔وہ کانپتی ہوئی پیچھے ہٹی،پھر تیزی سے اندر بھاگ گئی۔فاز نے ایک گہری سانس لی،وہ اس پر سختی نہیں کرنا چاہتا تھا۔لیکن اس وقت ضروری تھا۔ہاتھ بےاختیار بالوں میں پھیرے، چہرے پر آیا تناؤ جھٹک دیا۔سیل فون نکالا، منمبر ڈائل کیا۔
“I’m coming in five minutes.”
کال کاٹ دی۔موزے کے اندر چھپے چاقو کو ہلکی سی حرکت دے کر چیک کیا،جیب میں پسٹل کی دھات کی ٹھنڈک محسوس کی،ساتھ میں ایکسٹرا بلٹ…سب تیار تھا۔ اس نے گاڑی کی طرف قدم بڑھائے۔پھر دروازے کے قریب گاڑد کے پاس رکا۔
”آنکھیں اور کان کھلی رکھنا۔کوئی بھی مینشن میں داخل نہ ہوسکے“۔۔سخت لہجہ۔وارننگ دیتا ہوا۔پھر وہ وہاں سے چلا گیا۔
شام کے رنگ کب رات کی سیاہی میں گھل گئے،اسے اندازہ ہی نہیں ہوا۔گھڑی کی سوئیاں بے رحم تھیں۔سات سے آٹھ، آٹھ سے نو،اور اب دس بج رہے تھے۔لیکن فاز عالم واپس نہیں آیا تھا۔
فاطمہ اضطراب کے عالم میں کبھی بیٹھ جاتی تو کبھی کمرے کے چکر کاٹنے لگتی۔دل جیسے کسی ان دیکھے خطرے کی چاپ سننے لگا تھا۔
”کہاں چلا گیا ہے وہ؟اتنی عجلت میں گیا تھا“۔وہ خود سے سوال کرتی،دروازے کی طرف دیکھتی،اور پھر بےچینی سے واپس پلٹ آتی۔تب ہی،باہر کچھ گرا۔آواز اتنی اچانک اور غیر متوقع تھی کہ اس کے جسم میں سنسنی دوڑ گئی۔دل کسی نادیدہ خوف کی گرفت میں آ گیا۔اس نے بےاختیار دوپٹہ مٹھی میں جکڑ لیا۔سانسیں قابو سے باہر ہونے لگیں۔ آیت الکرسی کا ورد لبوں سے بےساختہ جاری ہوگیا۔
”یا اللّٰہ! یہ کیسی آواز تھی؟“۔
”کیا وہ شخص پھر کوئی چال چل رہا ہے؟“۔اس کے دل میں فاز کے حوالے سے پھر سے خدشے سر ابھارنے لگے۔کچھ دن پہلے تک جو دل مطمئن ہونے لگا تھا اب پھر سے وہموں میں جکڑ گیا۔”کوئی مسئلہ ہوا ہے کیا؟میں لاک کیوں نہیں لگائی؟اس کے دشمن بھی تو بہت ہونگے“۔ایک خیال بجلی کی طرح اس کے ذہن میں کوندا۔”یا پھر پولیس ریڈ؟اگر پولیس آئی ہو تو میں آزاد ہو سکتی ہوں،وہ گرفتار ہوگا تو مطلب میں آزاد“۔ایک امید کا جھماکا ہوا،لیکن اگلے ہی لمحے ایک اور خدشہ اس امید پر حاوی ہوگیا۔
”نہیں… اتنی خاموشی کچھ گڑبڑ ہے“۔اس سے پہلے کہ وہ دروازے کی طرف بڑھتی،قدموں کی چاپ سنائی دی۔
”میں نے لاک کیوں نہیں کیا تھا؟“۔وہ پچھتائی۔اسے خود پر غصہ آیا۔پیچھے ہٹتی ہوئی دیوار پہ جا لگی،لیکن یہ دیوار نہیں تھی۔پردے محسوس ہوئے،اور اس کے پیچھے،گلاس ڈور۔اچانک دھاڑ سے دروازہ کھلا۔فاطمہ کا دل اچھل کر حلق میں آ گیا۔دو نقاب پوش اندر داخل ہو چکے تھے۔
”اوئے… دیکھو… لڑکی یہاں ہے“۔ایک نے فتح کے نشے میں قہقہہ لگایا۔
”وائے ڈی اب اسے بچا کے دکھائے“۔خباست سے ہنستا ہوا اسے دیکھا۔فاطمہ نے سانس روکی۔
”چلو جلدی کرو،باس انتظار کر رہے ہیں“۔باہر کسی نے حکم دیا،اور ایک آدمی نیچے کمروں کی تلاشی لینے چلا گیا۔اور فاطمہ کو اندازہ ہو دو سے زیادہ لوگ تھے۔دل جیسے سینے میں تیزی سے ہتھوڑے کی طرح بجنے لگا۔
”یا اللّٰہ مجھے موت دے دیں یا بچا لیں۔لیکن ان کے حوالے مت کرنا“۔۔گیلی آنکھوں میں خوف لیے وہ رب سے دعا کی۔لیکن ابھی اسے خود کو بچانا تھا۔اتنی جلدی وہ ہار نہیں مان سکتی تھی۔نقاب پوش اس کی طرف بڑھے۔
فاطمہ کی انگلیاں گلاس ڈور کے لاک پر پہنچیں۔
”الحمدللہ“۔زیر لب وہ بولی۔یہ کھل سکتا تھا۔
”تو ایسے نہیں سنے گی“۔ایک شخص بپھر کر آگے بڑھا۔ فاطمہ نے پوری طاقت سے اسے دھکا دیا.
”تیری اتنی ہمت“۔اس شخص نے زناٹے دار تھپڑ فاطمہ کے گال پر مارا۔سر جھٹکا،نظر دھندلا گئی۔
”اللہ”۔فاطمہ کے لبوں سے دھیرے سے نکلا۔لیکن وہ ہارنے نہیں والی تھی۔دوسرا حملہ کرنے سے پہلے ہی اس نے سائیڈ ٹیبل سے گلدان اٹھایا اور پوری طاقت سے اس کے سر پر دے مارا۔
”آہہہہ“۔وہ شخص کراہتا ہوا پیچھے لڑکھڑایا۔فاطمہ نے فوراً گلاس ڈور کھولا اور باہر کی طرف بھاگی۔لان کا پچھلا حصہ تھا۔
”اللّٰہ!پلیز بچا لیں“۔قدم لرز رہے تھے۔زمین گیلی تھی،پاؤں چپل کی قید سے آزاد تھے۔کہیں پاؤں مڑ جاتا،مگر وہ رکنا نہیں چاہتی تھی۔اور تب ہی،سامنے کسی کا سایہ نظر آیا۔فاطمہ کی دھڑکن رک گئی۔
”فاز“۔تین قدم دوری پر کھڑا وہ لمحوں میں پلٹا۔فاطمہ تھک کے وہی رک چکی تھی۔اس تھوڑی سی مسافت نے اسے بری طرح تھکا دیا تھا۔اس کے چہرے پر اضطراب اور پریشانی تھی۔وہ فوراً آگے بڑھا،ہر چیز بھول کر صرف فاطمہ تک پہنچنا چاہتا تھا۔تیزی سے اس نے فاصلہ طے کیا۔
”فاطمہ“۔وہ اسے کندھوں سے تھام چکا تھا۔وہ کانپ رہی تھی۔
”فاز“۔اس کی آواز سرگوشی جتنی تھی۔اس نے اسے دوسری مرتبہ”فاز” کہا تھا۔
وہ کچھ کہنے ہی والا تھا کہ اچانک فاطمہ کے پیچھے نظر آتے بندے کو دیکھ کر غرایا۔
”اٹیک“۔فاز کی آواز گونجی،فاز کے آدمی حرکت میں آ چکے تھے۔فاطمہ نے پیچھے مڑ کر دیکھا ایک آدمی ان کی طرف بڑھ رہا تھا۔فاز کے تین آدمی اندرونی حصے کی طرف گئے تھے اور ایک اس شخص کو پکڑنے بھاگا۔فاز نے اسے بازو سے کھینچ کر پیچھے کیا،تاکہ اس بندے کو خود پکڑ سکے۔لیکن اس سے پہلے ہی فاطمہ اس کے بازو سے لگ چکی تھی۔وہ رو رہی تھی۔اس نے گہری سانس خارج کرتے،اسے دیکھا۔اور پھر دوسرے لمحے گن نکالتے اس شخص کے ٹانگ کا نشانہ لیا۔
“ٹھاہ!”گولی کی آواز بجلی کی طرح فضا میں گونجی۔وہ آدمی زخمی ہو کر نیچے گرا۔
”آہہہہ“۔کانوں کو چیرتی ہوئی آواز پر وہ چلائی۔کان پر ہاتھ رکھے وہ کانپ رہی تھی۔پھر مزید فائرنگ کی آوازیں گونجنے لگیں۔اندرونی حصے سے۔
”مجھے بچا لو فاز۔مجھے ان آوازوں سے دور لے جاؤ،پلیز“۔فاطمہ خوف سے کانپنے لگی۔اس کے حواس منتشر ہوگئے۔بچوں کی طرح روتی ہوئی وہ التجا کررہی تھی۔
”ریلکس فاطمہ… آئی ایم وڈ یو۔۔ڈونٹ بی افریڈ“۔اس نے نرم لہجے میں کہا،اس کا سر تھپتھپاتے ہوئے مگر چہرے پر سختی تھی۔اچانک اس نے تیزی سے اسے خود سے دور کرتے دوسری طرف کیا۔اس پھرتی میں بھی ایک گولی اس کے کندھے کو چھوتے ہوئے گزری تھی۔اس نے تیزی سے اپنا گن سنبھالا۔اس نے پلک جھپکنے میں ہی حملہ آور کا نشانہ لیا۔
“ٹھاہ!”
“ٹھاہ!”
“ٹھاہ!”
اس شخص کے سینے میں دو اور ایک ٹانگ میں لگی تھی۔
فاطمہ نے خوف سے آنکھیں بند کر لیں۔جب نظر اٹھائی،سامنے فاز تھا،چہرے پر سرد برفیلے تاثرات لیے۔فاطمہ نے اس کا ہاتھ چھوڑ کر دور ہونا چاہا۔لیکن فاز نے مضبوطی سے پکڑ لیا۔
”انڈر کنٹرول ہے سب؟“۔اس نے ٹیکٹیکل ائیر پیس کے ذریعے رابط کیا۔
”جو زندہ ہیں انہیں لے کر پہنچو،میں ایک گھنٹے میں وہی پہنچوں گا“۔تنے تاثرات لیے وہ سنجیدگی سے کہ رہا تھا۔لان کے حصے میں زیادہ روشنی نہیں تھی۔وہ اس کے قریب کھڑے اس کے چہرے پر نظریں جمائے ہوئی تھی۔اس نے بولتے بولتے اپنی نظریں اس پر کیں تھیں،گہری ذہانت سے بھرپور آنکھوں میں بہت کچھ تھا،فاطمہ نظریں جھکا گئی۔
”مجھے پہنچ کر رپورٹ کرو“۔اس نے بات ختم کی تھی۔پھر پسٹل پینٹ کی جیب میں رکھتے ہوئے اس کی جانب متوجہ ہوا۔
”گولی لگی ہے تمہیں“۔فاطمہ نے دھیمی آواز میں بولتی زخم کی جانب اشارہ کیا۔
”چلیں میرے ساتھ“۔اس کی بات کو نظر انداز کرتے مضبوطی سے اس کے ہاتھ کو تھامے آگے بڑھنے لگا۔
”کہاں لے جا رہے ہو؟انجرڈ ہو تم“۔مسلسل ہاتھ چھڑانے کی کوشش کرتے ہوئے وہ بول رہی تھی۔اب معاملہ تھوڑا ٹھنڈا ہونے پر فاطمہ کو اس پر پھر سے بےیقینی ہونے لگی تھی۔
”گولی چھو کر گزری ہے، دل پر نہیں لگی جو مرا جا رہا ہوں“۔رک کر سخت نگاہوں سے اسے دیکھا۔پھر دوبارہ سے چلنے لگا۔فاطمہ کا دل جیسے کسی ان دیکھے جذبات میں جکڑ گیا۔زخم کی پروا کیے بغیر تیزی سے ڈرائیو کررہا تھا۔اسے زخمی بازو کی پرواہ نہیں تھی۔درد کا احساس ضرور ہوا تھا۔لیکن وہ اس کا عادی تھی۔اس کی ٹریننگ نے اسے سکھایا تھا مشن سے بڑھ کر کچھ نہیں۔نہ درد،نہ خوف،نہ کمزوری۔اس کے اعصاب فولاد جیسے تھے۔اس کے دل و دماغ بس ایک چیز تھی،اپنے برابر میں پسنیجر سیٹ پر بیٹھی شریکِ حیات کو محفوظ مقام تک پہنچانا۔پندرہ منٹ بعد گاڑی ایک خوبصورت،مگر چھوٹے بنگلے کے سامنے رکی۔پہلے جہاں وہ تھی مینشن تھا۔محل۔لیکن اس کے مقابلے میں یہ کافی چھوٹا تھا۔
”یہ سب تم نے کیا ہے، ناں؟“۔کچھ دیر وہ خاموشی سے اسے دیکھتی رہی، پھر چبھتی نگاہوں سے گھورتے ہوئے سوال کیا۔
اس خوبصورت بنگلے میں ان دونوں کے علاوہ ایک عورت اور اس کے دو بچے تھے،جو سرونٹ کوارٹر میں رہتے تھے۔ان کے آتے ہی عورت نے انھیں جوس سرو کیا تھا،پھر فاز نے اسے بھیج دیا تھا۔اب وہ دونوں لاؤنج میں بیٹھے تھے۔ فاز اپنی بینڈیج کر رہا تھا۔
ان کی ٹریننگ میں فرسٹ ایڈ ،خود کو ابتدائی طبی امداد دینا،زخمی ہونے کے باوجود مشن مکمل کرنے کی مہارت شامل ہوتی ہے۔گولی صرف گوشت کو چھو کر گزری تھی۔زیادہ زخمی نہیں ہوا تھا،اب وہ زخم صاف کرکے بینڈیج لگا رہا تھا۔
”میں نے؟ سیریسلی؟“۔فاز نے جھٹکے سے سر اٹھا کر اسے دیکھا، ملامتی نگاہوں سے۔”آپ کو لاک کرنے کا کہہ کر گیا تھا،لیکن آپ تو وہی کرتی ہیں ناں،جو آپ کا دل چاہتا ہے۔“ فرسٹ ایڈ باکس میز پر رکھتے ہوئے وہ سختی سے بولا۔ابھی تک وہ اپنے اشتعال کو دبائے بیٹھا تھا۔
”ہاں تو کیا وہ لاک نہیں توڑ سکتے تھے؟“۔غلطی اس کی تھی،لیکن ماننے میں انا آ رہی تھی۔اسی لیے وہ ہٹ دھرمی سے بولی۔
”وہ اسپیشل لاک تھا،اسے توڑنے میں وقت لگتا،اور جیسے ہی کوئی ہاتھ لگاتا،مجھے فوراً اطلاع مل جاتی۔بیوقوف لڑکی!“۔غصے سے کہتے ہوئے آخر میں بڑبڑانے لگا اور آستین ٹھیک کرنے لگا۔
”تم ہی یہ سب کروائے ہو،مجھے اغوا کرنے کے لیے،ورنہ یوں عین وقت پر گھر میں موجود نہ ہوتے۔“وہ بلند آواز میں اسے دیکھتے ہوئے تیز لہجے میں بولی۔فاز نے ناگواری سے اسے دیکھا۔وہ بیوقوف تو تھی نہیں۔لیکن ابھی بیوقوفوں جیسی بات کرکے وہ اسے حیران کررہی تھی
”ہاں، جبھی آپ کو بچانے کی خاطر گولی کھا بیٹھا۔ وہ تو اچھا ہوا،اندر نہیں گئی“۔اس نے طنز کیا۔کھڑے ہوتے ہوئے وہ سامنے کچن کاؤنٹر کے پاس آ گیا۔
”میری وجہ سے؟یا تمہاری لاپرواہی کی وجہ سے؟تمہیں الرٹ ہونا چاہیے تھا،ناں“۔تپ کر کہتی وہ بھی چلتے ہوئے اس کے پاس آ گئی۔
”جی،آپ کی وجہ سے۔نہ آپ مجھ سے لگ کر روتیں،نہ گولی لگتی۔منٹوں میں ان سب کو ان کے انجام تک پہنچا دیتا۔“ اطمینان سے کہتے ہوئے وہ گلاس میں پانی انڈیل کر دوائی ہاتھ میں لینے لگا۔فاطمہ کو سبکی محسوس ہوئی۔ شرمندگی سے اس کا چہرہ سرخ ہو گیا۔
”ہاں تو،تم اتنے ہی تیس مار خان ہو، نا، جبھی ہر دوسرے ہفتے گولی کھاتے رہتے ہو۔ابھی دو تین ہفتے پہلے ہی گولی لگی تھی،شاید؟“۔تلملاتے ہوئے وہ بولی۔ساتھ ہی دوسرا گلاس اٹھا کر جگ سے پانی بھرا اور ایک ہی سانس میں پی گئی۔فاز نے مسکراہٹ چھپانے کے لیے گلاس ہونٹوں سے لگا لیا۔
”مجھے اپنی قابلیت پر کوئی شک نہیں۔اور وہ گولی بھی آپ جیسی ہی ایک بیوقوف لڑکی کو بچانے کی خاطر لگی تھی“۔بھرپور اعتماد سے کہتے ہوئے اس نے کندھے اچکائے اور دوبارہ جا کر صوفے پر بیٹھ گیا۔
”کیا بیوقوف بیوقوف کی رٹ لگا رکھی ہے؟میں بیوقوف نہیں ہوں،سمجھے؟اور کم از کم تمہاری طرح قاتل اور اسمگلر تو نہیں ہوں“۔تپے ہوئے چہرے کے ساتھ وہ اس کے سامنے صوفے پر دھپ سے بیٹھ گئی۔
”اوکے، مان لیتا ہوں،آپ بیوقوف نہیں ہیں“۔اس نے براہ راست اس کی آنکھوں میں دیکھا۔فاطمہ نے سر اٹھا کر آنکھوں کو ہلکی سی جنبش دی،جیسے کہہ رہی ہو،’مان لو تو اچھا ہے’۔
”لیکن کوئی ثبوت تو دیں، یار!“۔وہ تھوڑا سا جھکا۔بھاری آواز اور چہرے پر پھیلی ذرا سی مسکراہٹ اسے مزید دلکش بنا رہی تھی۔
”تم… تم بہت خراب ہو“۔اس نے مٹھیاں بھینچیں۔”اب مجھے یہ بتاؤ،اُس جہنم سے نکال کر اِس جہنم میں کیوں لے آئے ہو؟“
”اُس مینشن کو جو کہنا ہے،کہہ لیں،لیکن میرے اس پیارے سے گھر کے بارے میں گستاخی سے پرہیز کریں۔یہاں دل پہ لگتا ہے“۔وہ بہت فرصت سے اسے دیکھ رہا تھا۔سینے پر ہاتھ رکھتے دلفریب انداز میں بولا۔
”میں پوچھ رہی ہوں،کب تک اپنے ساتھ رکھو گے؟جانے کیوں نہیں دیتے؟“۔اس کے لاپرواہ انداز پر وہ ضبط کھوتے ہوئے چلائی۔
”ساری زندگی۔“جواب برجستہ تھا۔ایک لمحے کے لیے وہ اسے یک ٹک دیکھتی گئی،پھر دوسرے لمحے اس کے سحر سے باہر نکل آئی۔
”مجھ سے یہ فضول گوئی کرنے کی ضرورت نہیں ہے۔دشمن وہ تمہارے ہیں،اور آج میری جان مشکل میں آئی ہوئی تھی،تمہاری وجہ سے۔اگر مجھے کچھ نقصان پہنچا تو میں تمہیں کبھی معاف نہیں کروں گی“۔وہ مزید اپنی کیفیت نہیں چھپا پائی تھی۔وہ خوف زدہ تھی،سسکی ابھری تھی۔
”فاطمہ،ٹرسٹ می،یو آر سیف ناؤ۔اب آپ کی طرف کوئی بڑھ نہیں سکے گا۔اُس مینشن کا سب کو پتہ ہے۔دشمن، دوست سب کو۔لیکن یہ گھر،یہ میرے بعد آپ دیکھ رہی ہیں۔یہاں تک کہ میرے گھر والے بھی نہیں جانتے۔آپ کو یہاں ڈرنے کی کوئی ضرورت نہیں“۔سنجیدگی سے وہ اسے سب بتا رہا تھا۔
”اور وہ عورت؟“۔ اس نے مدھم آواز میں پوچھا۔
”وہ بے ضرر سی عورت ہیں۔ایک حادثے میں ان کے شوہر وفات پا گئے تھے۔اس گھر کی دیکھ بھال کرتی ہیں“۔اسی لمحے فاز کا موبائل بجا۔ اس نے موبائل اٹھا کر دیکھا۔
”میں پہنچ رہا ہوں۔جب تک،جاننے کی کوشش کرو کہ وہ کس کے کہنے پر آیا تھا“۔عجلت میں کھڑے ہوتے ہوئے وہ فون کان سے لگائے بولا۔وقت دیکھا۔ایک گھنٹے سے زیادہ ہو چکا تھا۔
”میں نے وقت کیسے نہیں دیکھا؟“۔وہ اپنا ہر کام وقت پر کرتا تھا،لیکن آج وہ پندرہ منٹ لیٹ ہو گیا تھا۔فاطمہ سے باتوں میں اس نے وقت ہی نہیں دیکھا۔
”تم ان کے ساتھ کیا کرو گے؟“۔وہ بھی اٹھ کھڑی ہوئی تھی۔
”دس از ناٹ یور کنسرن۔آپ سیکنڈ روم میں چلی جائیں اور بے فکر ہو کر رہیں۔یہاں کوئی نہیں آ سکتا۔کھانے کی ساری چیزیں فریج میں ہیں“۔اسے سب ہدایات دیتا ہوا وہ صوفے پر پڑی جیکٹ اٹھا کر پہننے لگا اور داخلی دروازے کی طرف بڑھا،پھر رک گیا۔پلٹ کر اسے دیکھا،وہ اسے ہی دیکھ رہی تھی۔وہ کچن کے پاس آیا۔کاؤنٹر پہ رکھے فرسٹ ایڈ باکس سے ٹیوب نکالی۔
”یہ لگا لیجیے گا چہرے پہ“۔فاطمہ کے ہاتھ میں دیتے ہوئے وہ نرمی سے بولا۔فاطمہ کی آنکھیں اس پہ ٹھر گئیں۔دل رک سا گیا۔
”خدا حافظ!“ دھیمی آواز میں کہتا وہ جا چکا تھا۔
”میری زندگی میں اب اور کیا ہونا باقی ہے؟“۔تھکی تھکی سی وہ صوفے پر بیٹھ گئی۔ڈھیلے انداز میں صوفے کی پشت سے سر ٹکائے،خالی خالی نگاہوں سے چھت کو تکنے لگی۔پھر توجہ ہاتھ میں موجود ٹیوب پر کی۔آنکھوں میں نرمی در آئی۔اور اسی نرمی کے ساتھ وہ چہرے پر کریم لگا گئی۔
فضا میں خون کی بو گھلنے لگی تھی،وہی بو جو وحشت اور موت کی دہلیز پر محسوس ہوتی ہے۔فرش پر بکھرے بدن،زخموں سے رِستا ہوا گرم خون،سسکیاں اور کرب سے نکلی ہوئی دبی دبی چیخیں۔مگر ایک شخص تھا جو کسی سنگدل مجسمے کی طرح کھڑا تھا،آنکھوں میں سلگتی سرخی لیے۔فاز عالم۔اس کی مٹھی میں چمکتا ہوا بلیڈ روشنی میں ایک پل کو چمکا،پھر جیسے ہوا میں بجلی کی تیزی سے حرکت ہوئی۔
”تم لوگوں کی ہمت کیسے ہوئی میرے گھر میں گھسنے کی؟“۔آواز کی گرج نے دیواروں کو لرزا دیا۔ساتھ ہی ہاتھ میں پکڑے بلیڈ کا وار کسی کی جلد چیر گیا،اور ایک زخمی کراہ کمرے کی خاموشی کو چیرتی ہوئی گونجی۔
”وائے ڈی کے گھر اور اس کے کمرے میں جا کر بہت بڑی غلطی کی تم لوگوں نے“۔الفاظ برف سے زیادہ سرد تھے،مگر لہجے میں دہکتا ہوا انگاروں جیسا غصہ۔ایک اور زوردار گھونسا کسی کے چہرے پر پڑا،اور وہ شخص دیوار سے جا ٹکرایا۔کراہتے ہوئے نیچے گرا،اس کے منہ سے نکلا خون سفید فرش پر سیاہ داغ کی طرح پھیلنے لگا۔
”میری بیوی پر ہاتھ اٹھایا تھا نا تم لوگوں نے؟“۔یہ کہتے ہی اس کی آنکھوں میں جلتی سرخ شعلے بھڑک اٹھے،سانسیں قابو میں رکھنے کی کوشش کے باوجود بھاری ہو چکی تھیں۔فاز نے ایک جھٹکے سے پیچھے کھڑے مراد کی طرف دیکھا،جو پہلے ہی سی سی ٹی وی فوٹیج میں سب دیکھ چکا تھا۔
”مراد، ان میں سے کون تھا وہ؟“۔مراد نے فوراً سے اشارہ کیا، اور بس وہ اشارہ ہونا تھا کہ فاز کی گرفت فولادی ہو گئی۔ اگلے ہی لمحے اس نے بےدریغ اس شخص کے چہرے پر تھپڑ مارا، پھر دوسرا، پھر تیسرا۔ہر وار میں جنون تھا،ہر چوٹ میں وحشت۔وہ شخص تڑپتا، کراہتا، اپنا چہرہ بچانے کی ناکام کوشش کر رہا تھا،مگر فاز کے ہاتھوں میں نہ رحم تھا، نہ رکنے کی کوئی گنجائش۔ایک زوردار تھپڑ نے اس کا سر جھٹکے سے ایک طرف موڑ دیا،اور اس کے لبوں سے ایک آخری چیخ نکلتے ہی خون کا فوارہ پھوٹ پڑا۔
”کس کے کہنے پر میرے گھر میں گھسنے کی جرات کی؟“آواز سرد تھی۔وہ شخص ہانپتے ہوئے زمین پر گرا،ہونٹوں سے بہتا خون،جبڑے میں اٹھتی درد کی لہر نے اس کے وجود کو جھنجھوڑ دیا۔
”باس کے کہنے پر…“بس یہ سننا تھا کہ فاز عالم کی آنکھیں اور گہری ہو گئیں۔وہ جان چکا تھا “باس” کون ہے۔جبڑے بھینچ لیے،ہڈیوں میں دراڑیں پڑنے کی حد تک سختی آ گئی۔ ”مراد، اے آئی کو بلا لو۔ان سب کو اس کے حوالے کر دو“۔یہ کہہ کر اس نے ایک آخری گھونسا اس شخص کے پیٹ میں مارا،جو زمین پر پڑا کراہتے ہوئے دوہرا ہو گیا۔
ان لوگوں کو غلط اطلاع ملی تھی۔ہائی وے پر جانے والی ٹرالر میں اغوا کیے گئے بچے نہیں تھے۔انہیں مس ڈائیریکٹ کیا گیا تھا۔اور اس کی غیر موجودگی میں مینشن پر حملہ ہوا تھا۔
ــــــــــــــــــــــــــــــــــــــــــــــــــ
