”کیسی ہیں آپ؟“۔ریلنگ پر دونوں ہاتھ ٹکائے،اس کی نظریں پورچ میں رکنے والی گاڑی پر جمی تھیں۔
”میں ٹھیک ہوں۔آپ کیسے ہیں؟اتنے دنوں بعد کال کی؟ کوئی خبر ملی؟آپ کو کوئی مسئلہ تو نہیں ہوا؟“۔فون کان سے لگائے،ماریہ ابراہیم بنا رُکے پوچھتی گئی۔دل کے ہزار چاہنے کے باوجود بھی وہ خود سے کبھی کال یا پیغام نہیں بھیجتی تھی۔وہ اپنے جذبات بس خود تک ہی محدود رکھتی تھی۔
”ہولڈ آن، لڑکی“۔فون کے دوسری طرف ارمان کا قہقہہ گونجا تو وہ خفت سے پیشانی پر ہاتھ مار بیٹھی۔ ”میں بھی ٹھیک ہوں،بس کاموں میں مصروف تھا۔ویسے، کیا آپ میری کال کا انتظار کر رہی تھیں؟“۔لبوں پر دھیمی مسکراہٹ سجائے وہ اس سے مخاطب تھا،لیکن اس کی تیز نگاہیں اب بھی گاڑی سے اترنے والی شخصیات پر مرکوز تھیں۔
”نہیں،میرا مطلب ہے کہ میں فاطمہ کے بارے میں پوچھنا چاہتی تھی“۔گڑبڑاتے ہوئے جلدی سے بات سنبھالی۔
”فاطمہ کے بارے میں؟“۔وہ لمحہ بھر کے لیے رکا۔”وہ تو ٹھیک ہیں،لیکن آپ میری خیریت جاننے کے لیے بھی کال کر سکتی تھیں“۔مسکراہٹ اس کے لبوں کو چھو گئی۔
”آپ کی کیوں؟“۔تیز ہوتی دھڑکنوں کو سنبھالتے ہوئے پوچھا۔ سائیڈ میں رکھا تکیہ اٹھا کر گود میں رکھ لیا۔
”کیونکہ میں آپ کی مدد کر رہا ہوں،اس لیے۔“
”احسن کا تو کچھ بتایا نہیں آپ نے۔تین ماہ ہونے والے ہیں“۔شکوہ امڈ آیا۔سائیڈ ٹیبل پر رکھی احسن اور فاطمہ کی تصویر دیکھ کر آنکھوں میں نمی اتر آئی۔
”میں کوشش تو کر رہا ہوں۔میں خود ڈیڈ کے سپروژن میں ہوں۔یہ سارے کام تو پولیس بھی کافی وقت بعد کر پاتی ہے“۔اس کی اداسی پر وہ سنجیدہ ہو گیا۔
”میرا وہ مطلب نہیں تھا۔میں جانتی ہوں،آپ بہت کچھ کر رہے ہیں۔میں کن الفاظ میں آپ کا شکریہ ادا کروں؟“۔۔
”اٹس اوکے،اور شکریہ کی ضرورت نہیں۔فون رکھتا ہوں میں، خیال رکھیے گا“۔رابطہ منقطع کرتے ہی وہ جلدی سے کمرے میں آیا،کمرے سے نکل کر تیزی سے زینہ اترا،اور مہمان خانے کی طرف بڑھا۔اندر بیٹھے مہمانوں کو دیکھ کر اس کی آنکھوں میں ناگواری جھلکنے لگی۔
دوپہر کے بارہ بجے کا وقت تھا۔کراچی میں موسم بدل رہا تھا،سردی کی آخری رمق ہوا میں گھلی ہوئی تھی۔مگر سورج کی کرنوں میں اب وہ پرانی نرمی نہیں رہی تھی۔ کمرے کے بیچوں بیچ ایک پلنگ بچھا تھا،جس پر اماں نیم دراز تھیں،پان دان ان کے قریب رکھا تھا،اور وہ مہارت سے پان بنا رہی تھیں۔ان کے قریب ریحانہ پھوپھی بیٹھی تھیں، فکر مندی ان کے چہرے پر لکھی تھی۔سامنے رکھے صوفے پر بڑی تائی بیزار تاثرات لیے بیٹھی تھیں،
”اماں،بھائی کو گئے کافی وقت ہو گیا۔اب تو شاید واپسی ہو جائے۔انھیں پتہ چل گیا تو کیا ہوگا؟“۔ریحانہ پھوپھی نے الجھن بھرے لہجے میں پوچھا۔دادی سکینہ نے پان کو آہستگی سے تہہ کیا،اسے لبوں تک لے جاتے ہوئے ایک مطمئن نظر بیٹی پر ڈالی۔
”فکر مت کرو،کچھ نہیں پتہ چلے گا۔بہت یقین کرتا ہے مجھ پر،اور ویسے بھی،غلطی تو اس نے خود کی ہے اُس غنڈے کے گھر جا کر“۔ وہ اطمینان سے بولیں۔
سامنے صوفے پر بیٹھی تائی نے ایک گہرا سانس لیا،ان کے چہرے پر افسوس کی پرچھائیاں تھیں۔
”بیچارا میرا بچہ عابد،ہم سب کے اتنا کہنے پر ہی اس نے ہاں کی تھی،اور پھر کیا ہوا؟عین وقت پر شادی ختم ہو گئی“۔کمرے میں لمحہ بھر کو خاموشی چھا گئی۔باہر صحن میں کسی کے چلنے کی مدھم آہٹ سنائی دے رہی تھی،شاید کوئی ملازم تھا۔
”شکر کریں بھابھی،کیا آپ واقعی فاطمہ کو بہو بنانا چاہتی تھیں؟لڑکا ہے،دس ہزار رشتے مل جائیں گے۔لڑکی تھوڑی ہے جو شادی ٹوٹنے پر مسائل کھڑے ہوں گے“۔ریحانہ پھوپھی نے بےنیازی سے کہا۔علینہ کی عابد کے لیے پسندیدگی سے وہ واقف تھیں۔تائی نے فوراً پہلو بدلا،آنکھوں میں ایک چمک سی آئی۔
”کہتی تو تم ٹھیک ہو،ویسے بھی مجھے بڑا ارمان ہے اپنی بھانجی کو عابد کی دلہن بنانے کا“۔وہ پرجوش سی گویا ہوئیں۔پھوپھی ریحانہ کا رنگ پھیکا پڑ گیا۔
”وہ نک چڑی کومل؟اللّہ بچائے“۔دادی سکینہ،فوراً کانوں کو ہاتھ لگا کر بولیں۔
”اماں، آپ بھی“۔تائی نے خفگی سے پہلو بدلا۔”بہت اچھی اور خوبصورت ہے میری بھانجی،اور لڑکیاں تو ہوتی ہی اس عمر میں نازک نخرے والی“۔ہلکی گرمی کے باعث چھت کا پنکھا درمیانی رفتار پر چل رہا تھا۔
”ہاں ہاں، بیٹا تمہارا ہے،جسے چاہو دلہن بنا لو“۔اماں نے پان چباتے ہوئے بولی۔تائی خفگی سے تیز قدموں سے کمرے سے نکل گئیں،اور باہر جاتے ہی دروازہ زور سے بند کر دیا۔
فاطمہ کی آنکھ صبح ہاجرہ کی آواز پر کھلی تھی،وہ ایک لمحے کو سہم گئی تھی،مگر جب سامنے سادہ سے انداز میں کھڑی نرم لہجے والی ہاجرہ کو دیکھا،تو دل دھیرے سے پرسکون ہونے لگا۔رات کے کسی لمحے وہ لاؤنج میں بیٹھی بیٹھی نیند کے دامن میں جا چکی تھی،اور اب اس نئی جگہ، انجان ماحول میں جاگنا،اسے قدرے غیر حقیقی سا محسوس ہو رہا تھا۔
ہاجرہ اچھی خاتون لگی تھی۔جس کی وجہ سے وہ باتوں میں ذکر کر بیٹھی کہ وہ فاز کا انتظار کرتے کرتے نیند کی آغوش میں چلی گئی تھی۔
اب دوپہر کا ایک بج رہا تھا،اور وہ بےمقصد انہی باتوں میں الجھی ہوئی تھی۔فاز عالم جو رات گئے نکلا تھا،اب تک واپس نہیں آیا تھا۔
”یہ شخص کن کاموں میں ملوث ہے؟کبھی سب کچھ ٹھیک لگنے لگتا ہے،تو کبھی سب کچھ غلط۔۔۔“یہی خیال اس کے ذہن میں بار بار گونج رہا تھا،کسی بند گلی میں بھٹکنے والے قدموں کی بازگشت کی طرح۔اسی لمحے مسجد سے اذان کی آواز آئی۔وہ نماز کی نیت سے کمرے کی طرف بڑھنے لگی تھی کہ ہاجرہ کی آواز نے اسے چونکا دیا۔
”بی بی جی،آپ اس کمرے میں کیوں جا رہی ہیں؟اس والے میں جائیں نا“۔فاطمہ پل بھر کو رکی،پھر ذہن میں کل رات کی فاز کی آواز گونجی
”آپ وہ سیکنڈ روم میں چلی جائیں“۔
صبح جب وہ فریش ہونے کے لیے دائیں طرف کے کمرے میں گئی تھی،تب دھیان نہیں دیا تھا،مگر اب ہاجرہ کے ٹوکنے پر یاد آیا کہ فاز نے تو بائیں طرف والے کمرے کی جانب اشارہ کیا تھا۔
”ابھی کل ہی آئی ہوں،اسی لیے بھول گئی،اب یہی رہوں گی تو عادت ہو جائے گی۔۔۔“ہلکی مسکراہٹ کے ساتھ کہتے ہوئے وہ اپنی ہی بات پر چونک گئی،کہ یہ کیا کہہ گئی تھی؟
”یہاں کیوں رہوں گی میں؟“۔اس خیال نے جیسے اسے بےچین کر دیا۔ تیزی سے قدم بڑھا کر وہ دروازہ کھول کر اندر داخل ہوئی اور فوراً دروازہ بند کر لیا۔اور پھر وہ جیسے کسی اور ہی دنیا میں آ گئی۔کمرے کی خاموشی میں ایک عجیب سا سکون بسا ہوا تھا،ایسا سکون جس میں روح تک ٹھہر سی جائے۔لمحہ بہ لمحہ،وہ ہر چیز کو دیکھتی جا رہی تھی،اور اس کے دل پر ایک گہری سرشاری طاری ہوتی جا رہی تھی۔دیواروں پر آف وائٹ رنگ کی تہہ جیسے روشنی کو اپنے اندر سموئے کھڑی تھی۔بیڈ کے پیچھے کا وال پیپر ہلکی نیلی اور سفید چھاپ کا تھا۔ہر چیز نفاست سے سجی ہوئی، بےداغ، شیشے کی طرح چمکدار۔
پھر ایک دیوار پر عربی خطاطی کا فریم اس کی توجہ کھینچنے لگا۔
”اللہ کی رحمت سے مایوس نہ ہونا“۔
(سورہ یوسف)
اس کی نظریں ان الفاظ پر جم گئیں،جیسے کوئی خزاں رسیدہ درخت پہلی بار بہار کے لمس کو محسوس کرے۔ پلکوں میں ٹھہرے آنسو خاموشی سے گالوں پر بہنے لگے۔
”میں واقعی مایوس ہو رہی تھی“۔دل میں ایک نرم سرگوشی گونجی۔پھر،دیوار پر ایک اور فریم پر نظر پڑی، اور اس کے قدم خودبخود اس کی جانب بڑھ گئے۔
”یقیناً میرے ساتھ میرا رب ہے،وہ ضرور میرے لیے راستہ پیدا کرے گا“۔
یہ الفاظ اس کے اندر گونجنے لگے،کسی تاریک راہ میں کوئی چراغ سا روشن ہوگیا تھا۔محبت سے اس نے اس فریم کو چھوا،اور یوں محسوس ہوا جیسے دیوار پر لگی تمام خطاطی،تمام آرٹ صرف اور صرف اس کے لیے ہی تھا۔
ایک طرف نیچر آرٹ کی پینٹنگ تھی،جس میں بہتا چشمہ، سرسبز وادیاں، امید دلاتی ہوئیں تھی۔ایسا منظر،جو دل کو موہ لے،روح میں تازگی بھر دے۔ہر آرٹ کے کونے میں ایک سائن موجود تھا۔
“F. Alam”
فاطمہ کے ماتھے پر بل پڑ گئے۔ناسمجھی کے عالم میں وہ اس سائن کو تکنے لگی۔
”فاز عالم؟“۔اس کے لبوں سے بےساختہ نکلا،اور عین اسی لمحے پیچھے سے ایک بھاری،تھکن سے بوجھل آواز ابھری۔
”فریحہ عالم“۔فاطمہ کا دل جیسے ایک لمحے کے لیے رک گیا۔ وہ اس قدر محو تھی کہ فاز کی اچانک موجودگی کا احساس تک نہیں ہوا تھا۔
”دستک دے کر اندر آتے ہیں“۔تیزی سے مڑنے کے بعد،وہ غصے سے بولی۔
”اپنے کمرے میں آنے کے لیے کون دستک دیتا ہے؟“۔فاز،جو اب بیڈ پر بیٹھ کر جوتے اتار رہا تھا،مسکرا کر بولا۔
”مینشن میں تو دیتے تھے“۔
”ہاں،مگر میں نے اپنے کمرے کی بات کی ہے“۔سرسری سی نگاہ اس پہ ڈالتے وہ وارڈروب سے اپنے کپڑے نکالنے لگا۔
”تو کیا وہ تمہارا کمرہ نہیں تھا؟“۔مشکوک نظروں سے اسے دیکھا۔
”یہ نہیں ہورہا آپ سے کہ شوہر تھکا ہوا آیا ہے اس سے کچھ کھانے پینے کا پوچھ لیں،فضول کے سوالات کے کر بیٹھ گئیں ہیں؟“۔اس نے تھوڑے تاسف سے کہا،اور بیڈ پر کپڑے رکھے۔
”شوہر؟کون سا شوہر؟اور کس خوشی میں تم سے کھانے پینے کا پوچھوں؟“۔اس کی آواز میں غصہ تھا۔فاز نے مسکراہٹ دباتے ہوئے ڈریسنگ ٹیبل کی جانب مڑ گیا۔چابی والٹ نکال کر رکھا،پھر اس کی جانب مڑا۔توقع کے عین مطابق وہ اسے اس موضوع سے ہٹا چکا تھا۔
”وہی شوہر جس سے آپ کی دادی نے آپ کا نکاح کروایا تھا“۔بےنیازی کے عالم میں کندھے اچکائے۔
”زبردستی۔۔۔“فاطمہ کی آواز مدھم ہو گئی۔”دادی مت کہیں انہیں کچھ نہیں ہیں وہ میری“۔
”آپ کس لیے آئی تھیں یہاں؟“۔اس کا سوال اتنا غیر متوقع تھا کہ فاطمہ چونک گئی۔
”نماز ادا کرنے“۔وہ گم صم ہو کر بولی،اور پھر فوراً اسے جواب دیا۔”اور تم نے ہی مجھے اس کمرے میں آنے کا کہا ہے تو میں یہاں جو بھی کروں تم مجھ سے نہیں پوچھ سکتے“۔
”وقت بدلنے میں دیر نہیں لگتی فاطمہ۔۔۔ اور یہ ضروری بھی نہیں کہ ہر بار وقت بدلے تو کچھ برا ہی ہو۔ کبھی وقت ایسے بھی بدلتا ہے کہ دامن خوشیوں سے بھر دیتا ہے“۔فاز نے اس کی آنکھوں میں جھانکتے ہوئے دھیرے سے کہا۔یہ جملہ۔۔۔ جیسے کسی بند دروازے پر ہلکی سی دستک تھا۔اس کی غیر متوقع بات پر وہ یک ٹک اسے دیکھتی رہی۔فاز نے نگاہیں دوسری جانب کرلیں
”جائیں، وضو بنا کر آئیں۔پھر مجھے بھی فریش ہونا ہے“۔
”وضو ہے میرا،کچھ دیر پہلے تلاوت کی تھی“۔ڈوپٹے کو نماز کے انداز میں لپیٹتے ہوئے جواب دی۔
”قرآن کہاں سے لیا آپ نے؟“۔
”ظاہر ہے،ہاجرہ سے۔تم جیسے غنڈے کے پاس ڈھونڈنے سے تو رہی“۔حالانکہ دل دل زبان کے برعکس کچھ اور کہ رہا تھا۔اور آنکھیں وہ لپک لپک کر عربک خطاطیوں میں الجھ رہی تھیں۔
”میں پیدائشی برا تھوڑی پیدا ہوا ہونگا۔اب غلط کاموں میں شامل ہونے کا مطلب ہرگز نہیں کہ میرے پاس جائے نماز بھی نہ ہو۔جائے نماز دوسرے دراز میں رکھا ہے،اب ہاجرہ سے مانگنے نہیں چلے جائیے گا“۔وہ بہت مزے سے کہ رہا تھا۔اس کا چڑنا ناجانے کیوں اسے اچھا لگ رہا تھا؟۔
”کتنے دھڑلے سے اعتراف کرتے ہو؟شرم نہیں آتی؟“۔وہ اسے شرمندہ کرتی نگاہوں سے دیکھی۔لیکن ان نظروں کا کوئی فائدہ نہیں ہوا۔
”آپ کے پاس نماز کی چادر نہیں ہے؟“۔ایک اور غیر متوقع سوال۔
”ہاں ہاں میری شادی تو دھوم دھام اور سب کی خوشی سے ہوئی ہے۔جو میں جہیز کا پورا ٹرک لے کر آتی“۔وہ غصے بھرے لہجے میں کہتی طنزیہ نگاہوں سے دیکھنے لگی۔
”خیر اگر سب کی رضامندی سے ہوتی تب بھی نہیں لیتا“۔کندھے اچکاتا بیڈ پہ رکھا کپڑا اٹھایا۔
”تم جیسوں پر ایسے جملے اچھے نہیں لگتے،ایمپریسڈ کرنے کی ناکام کوشش“۔ٹھنڈے ٹھار انداز میں ہاتھ سینے پہ باندھے اسے دیکھا۔
”مجھے کیا ضرورت ہے کرنے کی؟لوگ خود ہی ہو جاتے ہیں“۔بےنیازی کے عالم میں وہ واشروم کی طرف بڑھا۔
”کتنے ان پریڈیکٹیبل ہو تم“۔۔فاطمہ نے گہری سانس لی،اور جائے نماز بچھاتے ہوئے خود سے بڑبڑائی۔
”اب اتنا بھی نہیں ہوں،کبھی جاننے کی کوشش تو کریں“۔واشروم میں جاتے فاز نے مسکراتے ہوئے سنا، اور نرمی سے کہتا واشروم میں بند ہوگیا۔فاطمہ سر جھٹکتے نیت باندھ لیں۔
شاہد عباسی اسٹڈی میں ٹہل رہے تھے،ان کے قدموں کی بےترتیب چاپ کمرے کی خاموشی میں گونج رہی تھی۔ چہرہ تنا ہوا تھا،جبڑے بھینچے ہوئے۔ان کے ماتھے پر شکنیں تھیں۔وہ مسلسل اپنے بھاری ہاتھوں کی انگلیاں مروڑ رہے تھے۔
”مجھے اسے راستے سے ہٹانا ہوگا،اس سے پہلے کہ وہ میرے خلاف کوئی چال چلائے“۔یہ الفاظ ان کے لبوں سے سرگوشی کی صورت نکلے،مگر اسٹڈی کی دیواروں میں ارتعاش پیدا کر گئے۔ان کے سینے میں دبی بےچینی جیسے ایک لاوے کی صورت اندر ہی اندر ابل رہی تھی۔وہ جان چکے تھے کہ تصویریں بھیجنے والا اصل میں کون ہے۔وائے ڈی نے سچ کہا تھا،وہ تصویریں اس نے نہیں بھیجیں۔اس کھیل میں کوئی اور مہرہ تھا،کوئی جو ان کے قریب تھا،مگر دشمنی کی چالیں چھپائے بیٹھا تھا۔دروازے پر ہلکی سی دستک ہوئی۔ وہ ایک دم ٹھہرے۔انہوں نے نگاہ اٹھا کر دیکھا،اور اندر آتی شخصیت پر ناگواری کی ایک لہر ان کی آنکھوں میں ابھری، مگر فوراً چہرے پر مصنوعی خوش دلی کا نقاب چڑھا لیا۔
”فاخر، تم؟ آؤ، بیٹھو… کیسے آنا ہوا؟“۔ان کے لبوں پر ایک فریبی مسکراہٹ تھی،اس بچھو کی طرح جو اپنی زہریلی دم کے نیچے معصومیت چھپا لیتے ہیں۔فاخر سلمان نے آگے بڑھ کر ہاتھ ملایا،مگر وہ ہاتھ ملانا کم اور طاقت کی جنگ زیادہ لگ رہا تھا۔دونوں کی انگلیاں ایک دوسرے کی ہڈیوں میں پیوست ہو رہی تھیں۔ایک دوسرے کے وجود کو اپنے دباؤ سے ناپنے کی خاموش جنگ جاری تھی۔
”تم سے کچھ ضروری بات کرنی تھی“۔فاخر کی مسکراہٹ میں ایک عجیب سی گہری چمک تھی۔
”ہاں ضرور ،بیٹھو“۔شاہد عباسی نے سربراہی کرسی پر بیٹھتے ہوئے رسمی انداز میں ہاتھ سے بیٹھنے کا اشارہ کیا۔
”پہلے کافی منگوا لیتے ہیں“۔ میزبانی نبھاتے ہوئے انہوں نے انٹرکام اٹھایا، ملازم کو کافی کا آرڈر دیا اور پھر پوری توجہ فاخر کی طرف مبذول کر لی۔
”کل والا مال ٹھیک سے ڈلیور ہو گیا تھا نا؟“۔رسمی گفتگو کا آغاز ہوا تھا۔ مگر دونوں کے انداز میں کچھ ایسا تھا جو ہوا کو بوجھل کر رہا تھا۔
”ہاں،شکر ہے،ولیم اس بار کافی خوش ہے۔بس وائے ڈی کا مسئلہ ختم ہو جائے تو سمجھو ہمیں سونے کی کان ہاتھ لگ گئی“۔رسمی مسکراہٹ،رسمی گفتگو،ماحول کا بوجھل پن بڑھانے لگی تھی۔
”تم کل…“۔دروازے پر دستک ہوئی۔فاخر سلمان بولتے بولتے رکے۔ملازم اندر آیا۔ان کے درمیان میز پر کافی رکھا اور چلا گیا۔
”تم کل کہاں تھے؟“۔جملہ مکمل کیا۔کل سب ایک پارٹی میں تھے۔سوائے شاہد عباسی کے۔شاہد عباسی کپ اٹھاتے اٹھاتے لمحہ بھر کو رکے۔
”میری طبیعت ٹھیک نہیں تھی“۔لیکن پھر روانی میں کہ گئے۔فاخر نے ہلکی سی مسکراہٹ کے ساتھ سر ہلایا۔
”شاہد عباسی،تمہیں معلوم ہے؟ یرے چار اہم بندے کل کسی نے مار دیے ہیں“۔آواز میں اچانک سختی اتر آئی۔اسٹڈی کی ہوا میں جیسے تناؤ کی گرمی پھیل گئی۔
”ہاں، مجھے صبح فیصل نے اطلاع دی تھی۔میں تم سے اسی بارے میں بات کرنے والا تھا۔تم کہو تو میں اپنے بندوں سے کہہ دوں کہ پتا لگائیں، کس کی اتنی ہمت ہوئی؟“۔شاہد عباسی نے سنجیدہ تاثرات اپنائے، کافی کا گھونٹ بھرا اور مصنوعی ہمدردی سے بولے۔
”تم خود کو ڈھونڈنا چاہتے ہو، شاہد عباسی؟“۔فاخر سلمان ہلکے سے ہنسے،مگر ان کی آنکھوں میں ایک عجیب سی چمک تھی،ایک وارننگ،ایک پوشیدہ دھمکی۔
”کیا مطلب؟“۔شاہد عباسی نے برہمی سے نگاہیں اٹھائیں۔
”تمہارے بندوں نے میرے بندوں کو مارا ہے،وہ بھی تمہارے کہنے پر“۔ فاخر سلمان نے ٹیبل پر ہاتھ مارا،کافی کا کپ ہلکا سا اچھلا،مگر شاہد عباسی کے تاثرات میں کوئی فرق نہیں آیا۔
”تو تمہیں معلوم ہو گیا؟“۔انہوں نے سکون سے کپ ٹیبل پر رکھا، اور بےنیازی سے بولے۔اداکاری ختم ہو چکی تھی۔اب دونوں اپنے اصلی چہروں کے ساتھ آمنے سامنے تھے۔فاخر سلمان کی آنکھوں میں خون اتر آیا۔
”تم نے میرے بندوں کو مار کر اچھا نہیں کیا،شاہد!میں ولیم کو سب کچھ بتا دوں گا،اگر اس نے کوئی فیصلہ نہ لیا تو پھر میں اپنی مرضی سے انتقام لوں گا“۔
”شاید تم بھول گئے ہو، میرے پاس یہ حق ہے کہ میں گینگ کے کسی بھی بندے کو مار سکتا ہوں“۔شاہد عباسی نے ٹھنڈی مسکراہٹ کے ساتھ کرسی کی پشت سے ٹیک لگائی۔
”یہ حق ولیم نے تمہیں صرف غداروں کے لیے دیا تھا،اور میرے لوگ غدار نہیں تھے“۔فاخر سلمان کی آواز غصے سے بھاری ہو گئی،جبکہ شاہد عباسی کی مسکراہٹ گہری ہوتی گئی۔
”میں کچھ بھی کہ سکتا ہوں،کوئی بھی کہانی بنا سکتا ہوں،فاخر۔اور ولیم کو صرف میری بات پر یقین ہوگا“۔فاخر کی پیشانی کی شکنیں یکدم ہموار ہوئیں۔پھر وہ مسکرائے، مگر اس بار یہ مسکراہٹ خطرناک تھی۔
”تو پھر میری بات غور سے سنو،شاہد عباسی۔مجھ سے اور میرے آدمیوں سے دور رہو، ورنہ بہت برا ہوگا“۔انھوں نے تھوڑا آگے جھکتے دھمکی آمیز لہجے میں کہا۔
”نہیں تو کیا کر لو گے؟“۔شاہد عباسی نے لاپرواہی سے کندھے اچکائے۔
”تمہارے بیٹے اور اس کی ماں کو ماضی سے آگاہ کر دوں گا۔ نیک نام بزنس مین کا چہرہ اتار کر تمہارا اصل چہرہ دکھا دوں گا“۔فاخر سلمان آہستہ سے جھکے،ان کی آواز سرگوشی جیسی تھی،مگر موت کی طرح ٹھنڈی۔یہ جملہ خنجر کی طرح سیدھا شاہد عباسی کے دل میں پیوست ہوا۔ان کا رنگ یکدم سفید پڑ گیا۔انگلیاں بےاختیار مٹھی میں بھنچ گئیں۔ فاخر سلمان کی مسکراہٹ اور گہری ہو گئی۔اچانک، دروازے کے پاس آہٹ ہوئی۔دونوں فوراً چونکے اور دروازے کی طرف دیکھا۔ارمان اندر آ چکا تھا، بےخبر، معصومانہ انداز میں چلتا ہوا۔
”بابا، میں آپ سے…“۔وہ بولتا ہوا آگے آیا،مگر پھر ان دونوں کے تاثرات دیکھ کر رک گیا۔
”میں غلط وقت پر آ گیا؟“۔ہلکی سی خفیف مسکراہٹ اس کے لبوں پر تھی۔
”ارے نہیں،میں تو بس جا رہا تھا“۔فاخر سلمان نے فوراً خود کو سنبھالا،اور مسکراتے ہوئے کھڑے ہو گئے۔
”ڈیڈ آپ ٹھیک ہیں؟“۔ارمان نے فکرمندی سے اپنے والد کے کندھے پر ہاتھ رکھا۔شاہد عباسی نے خود کو قابو میں رکھتے ہوئے سر ہلایا،اور پانی کا گلاس اٹھا کر لبوں سے لگا لیا۔
”شاہد،تم اس پراجیکٹ پر سوچنا۔پھر ملاقات ہوگی“۔فاخر سلمان جاتے جاتے دوستانہ انداز میں مسکرایا۔پھر وہ ارمان کا کندھا تھپتھپا کر باہر نکل گئے۔کمرے میں خاموشی تھی، مگر اس خاموشی کے نیچے سیاہ دنیا کی سیاہ مکاریاں چل رہی تھیں۔
”ڈیڈ، آپ پریشان لگ رہے ہیں؟“۔ارمان الجھے ہوئے لہجے میں بولا۔
”بس بزنس کی باتیں ہیں،کچھ خاص نہیں“۔شاہد عباسی نے ہلکی سی مسکراہٹ کے ساتھ سر ہلایا۔
”اسی لیے تو کہتا ہوں آپ مجھے بزنس میں آنے دے“۔
”تمہارے ڈیڈ ابھی اتنے بوڑھے نہیں ہوئے،ابھی تم انجوائے کرو“۔۔وہ محبت کرنے والے باپ لگ رہے تھے۔
بالکونی کی ٹھنڈی ہوا نے چہرے کو چھوا تو وہ لمحہ بھر کو آنکھیں موند گئی۔رات کا سکون،ہوا کی سرگوشیاں،لان میں کھڑے تناور درختوں کی پرچھائیاں،سب کچھ اتنا خاموش تھا، مگر اندر کی بے چینی جیسے بدن میں ارتعاش پیدا کر رہی تھی۔اس سب سے وہ کیسے نکلے؟آج کل بس ایک ہی سوچیں تھی۔وہ ریلنگ تھامے،نظریں نیچے جمائے ہریالی کو دیکھ رہی تھی۔گھاس پر شبنم کے قطرے چمک رہے تھے۔ کنارے پر کھلے پھول ہوا کے دوش پر ہل رہے تھے،ان کی خوشبو مدھم ہواؤں میں تحلیل ہو رہی تھی۔
”یہ لیں“۔آواز پیچھے سے آئی۔سانس جیسے رک گیا ہو۔دل تیزی سے دھڑکنے لگا۔چونک کر پلٹی تو سامنے فاز کھڑا تھا۔ خود کو پرسکون کرنے کے لیے ایک گہری سانس لی۔سچ تو یہ تھا کہ اس واقعے کے بعد وہ ہر آہٹ پر چونکنے لگی تھی، ہر سایہ اسے خطرہ محسوس ہوتا تھا۔فاز نے خاموشی سے ایک بیگ اس کی طرف بڑھایا۔وہ ناسمجھی میں اسے تھام چکی تھی۔
”یہ کیا ہے؟“۔ہلکی الجھن،تھوڑی سی بےچینی لیے وہ اسے دیکھنے لگی۔انگلیاں خودبخود بیگ کے اندر گئیں اور ایک نرم سا کپڑا چھوا۔باہر نکالا تو سفید چادر، جس پر ننھے ننھے گلابی پھول بنے ہوئے تھے۔وہ یک ٹک اسے دیکھنے لگی۔نماز کی چادر۔پلکیں جھپکنا بھول گئیں۔ہاتھ میں چادر تھامے وہ حیران نگاہوں سے اسے دیکھنے لگی۔فاز عالم کی طرف سے دیا گیا پہلا تحفہ، نماز کی چادر۔وہ فاز جسے وہ ایک گینگسٹر سمجھتی تھی،اس کی دنیا میں کسی روشنی کی کوئی کرن دیکھنے کو تیار نہیں تھی۔وہ شخص اسے نماز کی چادر دے رہا تھا؟۔گلے میں ایک نامانوس سی گرہ پڑنے لگی۔آنکھوں میں دھندلکا سا چھا گیا۔فاز عالم کی طرف سے ملا گیا یہ تحفہ اس کی دل کی دنیا میں ہلچل مچا گیا تھا۔
”یہ… یہ حسین ہے“۔آواز کسی دور دراز کی بازگشت معلوم ہوئی۔شکریہ کہنا مشکل لگ رہا تھا،لیکن لفظ بہرحال لبوں سے نکل گیا تھا۔وہ اپنے احساسات سمجھ نہیں پارہی تھی۔فاز نے محض ہلکا سا سر ہلایا،جیسے شکریہ قبول کر لیا ہو۔
”یہ کیوں لائے؟“۔چادر کو دوبارہ تہہ کرتے ہوئے بیگ میں ڈالتی ہوئی سوال کی۔
”آپ نماز ادا کرتی ہیں، تو اس کی ضرورت ہوگی آپ کو“۔سنجیدگی اور سکون سے کہہ کر وہ اندر کمرے میں چلا گیا۔ وہ چند لمحے وہیں کھڑی رہی،کسی ان دیکھے احساس نے جکڑ لیا تھا۔پھر دھیرے دھیرے چلتی اندر آئی۔
”تم سمجھ سے بالاتر ہو“۔بیگ الماری میں رکھتے ہوئے وہ سنجیدگی سے اسے دیکھ کر بولی۔
”نایاب ہوں میں۔اب ہر کسی کو اتنی آسانی سے میسر نہیں آ سکتا نا“۔صوفے پر بیٹھے موبائل کی اسکرین پر تیزی سے انگلیاں چلاتے وہ جیسے کسی غیر محسوس مسکراہٹ میں مبتلا تھا۔
”منہ اور مسور کی دال“۔وہ بےاختیار بڑبڑائی تھی۔
”کیا کہا؟“۔گہری،بھاری آواز جیسے پورے کمرے میں گونج گئی۔
”میں؟“۔وہ پل بھر کو ہڑبڑائی،پھر فوراً خود کو سنبھالا۔
”میں کہہ رہی تھی،تم تو خود نماز ادا نہیں کرتے،تو میں تمہیں ٹوپی دے کر کیا کروں گی؟“۔جو منہ میں آیا بولتی چلی گئی۔فاز نے موبائل سے نظریں اٹھائیں، گہری، بےتاثر نظروں سے اس کا جائزہ لیا۔پھر خاموشی سے اٹھا اور اس کے قریب آیا۔قدموں کی آواز، بڑھتا ہوا فاصلہ، گھمبیر ہوتی ہوا کا احساس۔وہ غیر ارادی طور پر پیچھے ہوئی،مگر اس کی نظریں جمی رہیں۔
”آپ بہت زیادہ ججمنٹل ہیں،فاطمہ!اور یہ اچھی بات نہیں“۔فاز نے جھک کر دھیرے سے کہا۔آواز میں تاسف تھا۔اس کے پاس سے گزر کر وہ دروازے کے پاس پہنچا۔
”میں وہی کہتی ہوں جو دیکھتی ہوں“۔ایک پل کو وہ شرمندہ ہوئی،لیکن دوسرے ہی پل ہٹ دھرمی سے بولی۔
”آپ دیکھتی ہی تو کچھ نہیں ہیں“۔وہ رک کر آہستگی سے پلٹا۔دیوار گیر الماری کے پاس کھڑے اس کے وجود کو دیکھا۔الفاظ ہوا میں تحلیل ہوئے، مگر اثر چھوڑ گئے۔وہ جا چکا تھا، مگر فاطمہ کی دنیا میں جیسے ہلچل مچ گئی تھی۔ہاتھ بڑھا کر بیگ دوبارہ باہر نکال لیا۔بیڈ پر آ کر وہ بیٹھ گئی،چادر کو تھامے گہری سوچوں میں گم۔
”یہ سب کیا تھا؟کیوں میں انکار نہیں کر پائی؟وہ تحفہ دیکھ کر میرے دل کی زمین نرم کیوں ہونے لگی؟کیوں؟اس شخص کی وجہ سے انجان لوگ میرے کمرے میں گھس آئے،اگر وہ لوگ مجھے لے جاتے تو۔میں آہٹوں سے ڈرنے لگی ہوں۔اس نے مجھے تنہا رہنے پر مجبور کردیا“۔فاز کے سامنے اپنی جو کیفیت چھپائی ہوئی تھی۔اب وہ آنسو کی صورت باہر آرہے تھے۔گھڑی کی ٹک ٹک گونج رہی تھی۔رات کی خاموشی میں کہیں دور کسی پرندے نے پر پھڑپھڑائے۔
”اس سب کے باجود وہ چادر مجھے کیوں اچھی لگ رہی ہے؟“۔دل وہ نہیں مانتا،جو عقل تسلیم کر چکی ہوتی ہے۔
”اس شخص کی وجہ سے میری زندگی برباد ہوئی۔اس نے مجھے میری فیملی سے دور کر دیا،مجھے قید کر لیا،میں کیسے اس کا تحفہ قبول کر سکتی ہوں؟“۔آنکھیں موند کر وہ بیڈ پر لیٹ گئی،رخ موڑ کر چھت کو دیکھنے لگی۔آنسو خاموشی سے بہتے رہے۔
”فاطمہ کمال، تمہارا ہے ہی کون؟سارے سوتیلے رشتے۔ایک سگا رشتہ بابا جو اپنی بیٹی کو اس جہنم میں پھینک کر بھول بیٹھے ہیں“۔۔
دیواریں گواہ تھیں،چاندنی خاموشی سے جھانک رہی تھی،اور رات کے سائے جیسے سرگوشی کر رہے تھے۔کہ یہ کہانی محض نفرت کی نہیں تھی۔یہ دل کے دھڑکنے کی،کسی ان کہی کہانی کی ابتدا تھی۔
جاری ہے
