یہ قریباً دو گھنٹے قبل کی بات تھی۔ وہ اپنے کمرے میں آئی تو دل بہت بری طرح ہر چیز سے اچاٹ ہوچکا تھا۔ بار بار آنکھوں سے آنسو بہتے، جنہیں وہ بے دردی سے صاف کرتی۔ کمرے میں کبھی ادھر کبھی ادھر گھومتے ہوۓ جب پاؤں شل ہوگئے تو وہ بیڈ کی پائنتی پر گرنے کے سے انداز میں بیٹھ گئی۔ کوئی راہ سجھائی نہ دے رہی تھی۔ وہ شدت پسند تھی، اپنی چیزوں کو کبھی نہ چھوڑنے والی۔ اس دفعہ تو معاملہ ہی دل کا تھا۔ وہ چاہ کر بھی پیچھے نہیں ہٹ سکتی تھی۔ وہ تیمور سے محبت کرتی تھی اور برملا کرتی تھی۔ لیکن اب ایسے لگ رہا تھا جیسے سب ختم ہوچکا ہے، وہ جیسے ایک بند گلی کے دہانے پر پہنچ چکی تھی۔ کئی لمحے یونہی گزرگئے، پھر اچانک اسکے ذہن میں کلک سا ہوا۔
ہاں عارب پورے گھر میں واحد ایسا فرد تھا جو اسے سمجھ سکتا تھا۔ بھلے ہی وہ اسکے لیے کوئی بڑا سٹینڈ نہ لیتا لیکن کم از کم عارب اسکی ڈھال بن سکتا تھا۔ وہ دھیمے مزاج کا انسان اسکا ساتھ دے سکتا تھا۔ کچھ سوچ کر وہ اسکے کمرے میں آئی، سارا کمرہ خالی تھا۔ اسنے کچن چیک کرنے کے بعد کام والی سے پوچھا ۔
“عارب کو دیکھا ہے کہیں؟” کچن کے دروازے کے پاس کھڑے ہوکر وہ بولی تھی۔ کام والی آخری دفعہ کچن کی صفائی کرنے قریباً رات کے دس بجے تک آتی تھی۔ یقیناً وہ سارا کام ختم کرچکی تھی اور اب اپنے کواٹر جانے والی تھی جب دانیہ کی بات پر رکی اور بڑی سادگی سے کہا۔
” باجی وہ تو سکینہ باجی کے ساتھ چھت پر ہیں۔”اتنی سی بات تھی، دانیہ کو لگا کسی نے بھرے مجمعے میں اسکے چہرے پر تھپڑ دے مارا ہو۔ غصہ ضبط کرتی وہ مڑی اور سیڑھیاں طے کرتی ہوئی چھت پر پہنچی۔ دروبزے کے قریب پہنچی ہی تھی کہ عارب کی شوخ سی آواز نے اسکے قدم روک لیے۔
“چلو اگر بشیر یا اسلم کے آثار ہوۓ تو میں تم سے کرلوںگا، بتاؤ، کیا خیال ہے پھر؟” دانیہ کو لگا شاید اسے سننے میں غلطی ہوئی۔ سکینہ نے کوئی جواب دیا تھا، جس کی اسے سمجھ نہ آسکی۔ وہ تھوڑا اور دروازے کے قریب ہوئی۔
“چلو پہلے تم سے کرلیتا ہوں، پھر انگریزنی سے کرلوںگا۔۔۔” وہ دونوں یہاں محبت بھری باتوں کے مظاہرے کررہے تھے، اور نیچے اسکی پسند پر ہزار ہا سوال کیے گئے، کیوں؟۔۔۔محض اسلئے کہ وہ دانیہ تھی سکینہ نہیں تھی۔ حالانکہ یہ دانیہ ہی بیجﮪے۔ کی وجہ سے سکینہ سیال کو نظرانداز بھی کردیا جاتا۔ دانیہ سب کی لاڈلی تھی۔ ایسے ہو ہی نہیں سکتا تھا دانی کچھ کہتی اور اسے پورا نہ کیا جاتا۔ اسکا کہا لوہے پر لکیر کی طرح ہوتا تھا۔ تلخی کی آخری حدوں کو چھوتی وہ واپس پلٹی۔ اسکے دماغ میں ایک بات آئی تھی ،اور اب وہ وہی کرنے والی تھی۔ جو چال وہ سوچ چکی تھی، وہ عملاً کر بھی چکی تھی۔ اسنے محض اپنے حسد میں اپنے دو پیارے رشتوں کو سولی پر چڑھادیا تھا۔
جاری ہے
