Shab E Gham Ki Seher by Zainab Khan Episode 6

“پتا نہیں۔۔۔پلیز آپ جلدی آجائیں۔ “
“اوکے اوکے۔۔۔میں آرہا ہوں۔ بس پانچ منٹ دیں!” وہ شاید فوراً اٹھ کھڑا ہوا تھا۔
“پلیز جلدیں آجائیں۔مجھے یہاں کا کچھ نہیں  پتا ورنہ میں خود اسے لے جاتی۔”سکینہ روتے ہوے بولی۔
“آپ پریشان نہ ہو، میں بس آرہا ہوں۔” چابی لے کر ، کوٹ لیا اور پھر وہ بھی ایک پل ضائع کیے بغیر  بھاگا۔
فون بند ہوچکا تھا۔ وہ دوڑتی ہوئی اندر گئی۔ بالوں کا جوڑا بنا کر ،بیڈ کے قریب اسکا تولیہ پڑا ہوا تھا۔ اسنے تولیہ لیا اور واشروم میں  لے جاکر گیلا کیا اور واپس آکر اسکا چہرہ، سینے سے تھوڑی سی شرٹ، اور دایاں ہاتھ صاف کیا۔ کسی طریقے اسکی ٹانگوں کو اوپر کیا اور لحاف اڑھایا۔ گندا کارپٹ اٹھایا،  باہر لے گئی۔ لانڈری نجانے کہاں تھی۔ ڈھونڈ ڈھانڈ کے نکالی اور کارپٹ وہاں لے جاکر دھویا۔ یہ سب کچھ وہ پندرہ منٹ میں کرچکی تھی۔۔تب تک باہر بیل ہوئی۔
باہر  کی طرف دوڑی، پھر رکی، بے اختیار ہاتھ سر پر گیا۔جوڑا ڈھلک چکا تھا۔ مگر وہ ایسے کسی کے سامنے نہیں جاسکتی تھی۔ بھاگ کر اپنے حالیہ کمرے کی طرف آئی، سوٹ کے ساتھ کی چادر سے حجاب کیا اور دوڑتی ہوئی دروازے کی طرف آئی اور لاک کھولا۔ سامنے لمبا چوڑا، نیلی آنکھوں وال ایک خوش شکل لڑکا کھڑا تھا۔  جو  عارب کا ہی ہم عمر تھا۔
“السلام علیکم! کہاں ہے عارب؟ ” وہ جھجھکا نہیں، سکینہ ایک طرف ہوئی تو وہ بغیر کسی تردد کے اندر بڑھا تھا۔
“واعلیکم السلام۔۔۔اپنے کمرے میں ، آپ پلیز اسے ہسپتال لے جائیں۔” وہ روتی ہوئی اسکے پیچھے آئی تھی۔ اورنگزیب اندر آیا تو عارب سر کو دائیں بائیں مار رہا تھا۔
“جین۔۔۔جینی۔” محض یہی نام تھا جو وہ بار بار لے رہا تھا۔ سکینہ دھیان نہ دے پائی۔ وہ دونوں بھائی سب کے ہی بہت لاڈلے تھے۔ اگر کبھی معیز کی طبیعت خراب ہوتی تو یونہی سب کی جان پر  بن جاتی تھی۔  وہ تو تھی بھی تھڑدلی۔ ایسی صورتحال میں تو اسکے ہاتھ پاؤں پھول جایا کرتے تھے۔
“عارب۔۔اٹھو یار!” اورنگزیب نے اسے ہلانے کی کوشش کی۔ لیکن وہ ٹس سے مس نہ ہوا۔
“اسے باہر لے جانا پڑے گا، کیا آپ میری مدد کرسکتی ہیں؟” وہ دونوں ہم وزن تھے۔ اسلئیے اورنگزیب نے قدرے ہچکچاتے ہوۓ اسے کہا۔
“جی میں کرتی ہوں۔”  روئی روئی سی وہ بولی۔ سکینہ کا وہاں ہونا، اور استحقاق سے عارب کی فکر کرنا اسے بہت کچھ باور کروا چکا تھا۔ وہ وہاں عارب سیال کی “بیوی” کی حیثیت سے تھی۔ اس حیثیت کے علاوہ اسکی کوئی اور حیثیت اس وقت بن ہی نہ سکتی تھی، سب سے بڑی نشانی ہی اسکی فکر کرنے کا انداز تھا۔ پھر وہ اسکی مدد سے عارب کو گاڑی کی طرف لے گیا۔ عارب کی طبعیت اس قدر خراب تھی کہ وہ باوجود کوشش کہ خود کو سنبھال نہیں پارہا تھا۔ کبھی سر سکینہ کے کندھے پر ڈھلکا دیتا، کبھی اورنگزیب کے کندھے پر۔ پھر وہ دونوں اسے لیے مقامی ہسپتال چلے گئے۔ ڈاکٹروں نے فوری ٹریٹمنٹ دینا شروع کردیا۔ یہاں پاکستان والا حساب نہیں تھا۔ نہ ہی ہسپتالوں میں گھر والوں کی لمبی لمبی قطاریں، دریاں اور بستر بچھے ہوۓ تھے۔ صاف ستھرا ، چمکتا ہسپتال تھا۔
“وہ ٹھیک ہے اب، پریشان ہونے کی ضرورت نہیں۔” یہ جملہ سننے کیلئے پچھلے تین گھنٹوں سے وہ اذیت میں تھی۔ اورنگزیب کبھی ڈاکٹروں کے پاس جاتا، کبھی اسکے پاس آکر تسلی دیتا تھا۔ ابھی بھی وہ قریباً چوتھی دفعہ اسکے پاس آیا تھا۔ لیکن اس دفعہ اسکے چہرے پر پہلے جیسا بوجھل پن نہیں تھا۔ قدرے اطمینان تھا۔سکینہ اسے دیکھ کر اٹھ کھڑی ہوئی۔
“بیٹھیں پلیز! پریشان مت ہو۔ وہ پہلے سے ٹھیک ہے۔ ” سکینہ کے بینچ کے بلکل سامنے والے بنچ پر بیٹھتے ہوۓ وہ بولا۔ سکینہ نے بھی سرہلایا اور ایک نظر عارب کے کمرے پر ڈال کر بینچ پر بیٹھ گئی۔
“آپ غالباً!” وہ کہتے کہتے رکا۔ سکینہ نے ایک نظر اسے دیکھا۔ کیا بتاتی۔ عجیب دوراہے پر کھڑی تھی۔ اسنے شرمندگی سے سرجھکالیا۔
“میں عارب سیال کی بیوی ہوں۔ ” گوکہ جھکے ہوۓ سر سے کہا تھا۔  مگر آواز مضبوط تھی۔  اورنگزیب چند پل کچھ بول نہ پایا۔  کچھ حیرت،  کچھ بے یقینی سے اسے دیکھتے ہوۓ اسنے سرہلایا۔ پھر اسکے بعد ان دونوں کے درمیان خاموشی چھائی رہی۔ ڈیڑھ دو گھنٹے بعد وہ خود اس قابل ہوئی کہ اندر جاکر اسے دیکھ لیتی۔ روئی روئی آنکھوں سے بیڈ پر آنکھیں موندھے عارب کو دیکھا۔ بیڈ کی پچھلی سطح کو قدرے اوپر کیا گیا تھا۔ جیسے بیٹھنے کیلئے کیا گیا ہو، وہ ہوش میں ہی تھا،  لیکن شاید نقاہٹ کی وجہ سے سر پر بازو رکھ کے آنکھیں موندھی ہوئی تھیں۔ سکینہ خاموشی سے چلتی ہوئی اسکے پاس آئی۔ وہ یونہی اسکی موجودگی سے لاعلم پڑا رہا۔ ایک رات میں اسکی رنگت پیلی پڑ چکی تھی۔ سکینہ نے اسکی حالت دیکھتے ہوۓ بے اختیار ہچکی لی۔ اگر اسے کچھ ہوجاتا تو؟
وہ اکیلی اس شہر میں کہاں جاتی؟
کس سے مدد مانگ سکتی تھی؟
عارب نے زرا کی زرا بازو ہٹایا تو اپنے سامنے سکینہ کو خاموشی سے آنسو بہاتے دیکھ کر نرم پڑا۔
“ادھر آؤ!” اپنے پاس جگہ بناتے ہوۓ وہ بولا۔ سکینہ روتی ہوئی اسکے پاس بیٹھی اور پھر اسکی ہچکی بندھ گئی،  انہی ہچکیوں سے روتے ہوۓ اسنے اپنا سر اسکے کندھے پر رکھ دیا تھا۔  
“اگر تمہیں کچھ ہوجاتا تو میرا کیا ہوتا عارب، میں تو ۔۔۔میں تو مرجاتی!” وہ رو رہی تھی۔ اور وہ جانتا تھا اگر وہ اسکے نکاح میں نہ ہوتی، اور اسکی جگہ معیز ہوتا تو وہ اسکے لیے بھی یونہی روتی۔۔وہ ایسی ہی تھی۔۔سب کی لاڈلی، اور سب کے لاڈ دیکھنے والی۔وہ دونوں کنزنز تھے اور تایا کے بیٹوں میں تو سب کی جان تھی۔ پھر وہ یہاں تھی بھی اکیلی ، ایسے حالات میں گھبرانا ایک بہت ہی عام سی بات تھی۔
“اب تو ٹھیک ہوں نا۔۔۔رؤں نہیں۔” اسکے بالوں کو سہلاتے ہوۓ وہ بولا ۔ آواز میں ابھی بھی بوجھل پن سا تھا۔ جیسے زکام زدہ آواز ہوتی۔۔بیٹھی ہوئی، خشک کھانسی والی۔
“اگر ٹھیک ہوتے تو یوں بیمار کیوں پڑتے؟”
“کبھی کبھی ہوجاتا ہے انسان بیمار بھی۔۔۔”عارب کا ہاتھ ہنوز اسکے بالوں میں تھا۔
“تم کہاں تھے ، کیا ساری رات باہر ٹھنڈ میں رہے ہو؟”ایک پل کو سر اٹھا کر اسے دیکھا۔ چہرہ آنسوؤں سے تر  تھا۔ عارب نے مسکراتے ہوۓ سرہلادیا ۔
“تم بہت برے ہو، میں کتنی دفعہ تمہیں دیکھنے آئی تھی، ایک تو اتنے بڑے ڈربے میں مجھے اکیلا چھوڑ دیا اوپر سے ایسے بیمار پڑگئے، اگر واقعی تمہیں کچھ ہوجاتا تو؟”  بات کرتے کرتے یہ سوال دوبارہ  آیا تو رونے میں اضافہ ہوا ۔ دوبارہ اسکے کندھے سے جالگی۔
 دروازہ ہلکہ سا ناک ہوا۔ وہ دونوں چونکے ضرور تھے، مگر سکینہ اپنی جگہ سے ایک انچ بھی نہ ہلی تھی۔  
“کیسی طبیعت ہے اب؟” اورنگزیب دوسری طرف آتے ہوۓ بولا۔ پھر سکینہ کی طرف اشارہ کیا ۔
“ یہ پاکستانی ہیں نا؟” آواز بڑی ہلکی تھی۔ سکینہ نے ایک دفعہ سر اٹھا کر اسے دیکھا، آنسو صاف کیے اور اٹھ کر کرسی پر جابیٹھی۔
“کیوں؟ میں ایسا کیا کرتی کہ آپ کو پاکستانی لگتی؟” سکینہ سیال اپنے اندر کا بوجھ ختم کرچکی تھی۔ تھوڑے غصے میں اورنگزیب کو دیکھتے ہوے کہا ۔ عارب نے مسکراہٹ دبائی۔
“یہ میری عجلت میں بنائی گئی دلہن ہے۔” نقاہٹ زدہ آواز میں اسنے اورنگزیب سے اسکا تعارف کروایا۔ وہ ایک پل کو حیران ہوا تھا،  پہلے بھی ہوا تھا مگر وہ دونوں بلکل نارمل سے تھے۔ “تو پھر جینی کا کیا ہوگا؟” یہ سوال اسکے اندر سے اٹھا۔ لیکن عارب کا جملہ ایسا تھا کہ وہ ہنس کر ٹال گیا۔۔
“تم گھر چلی جاتی۔” اسنے دوبارہ سکینہ کی طرف چہرہ کیا۔
“نہیں۔۔۔ہم اکھٹے ہی جائینگے۔ مجھے نہیں جانا ادھر ابھی۔ ” قدرے نروٹھے پن سے کہتے ہوۓ اسنے نظریں ادھر ادھر دوڑائیں۔
“تم تو نیند پوری کرچکی ہو، اب گھر جاکر کیا ہی کروگی۔ ادھر ہی میرا دماغ کھانے بیٹھ جاؤ۔” عارب مسکراتے ہوۓ بولا۔
“ایسے تو نہ کہو، پچھلے کئی گھنٹوں سے بھابی یہاں تمہارے لیے خجل خوار ہورہی تھیں۔ انکے خلوص پر شک تو نہ کرو۔” اورنگیزب نے بات میں حصہ لیا جبکہ اسکے یوں بھابی کہنے پر وہ ایک پل کو سرخ پڑی۔
“واقعی؟” اب کہ عارب نے مسکراہٹ دباتے اسے دیکھا تھا۔ وہ جو پہلے ہی عجیب سی کیفیت میں مبتلا ہورہی تھی ایک دم کھڑی ہوگئی۔
“میں تمہارے لیے کچھ کھانے کو لاتی ہوں۔۔۔!” وہ عجلت میں اٹھ کر دروازے کے پاس آئی۔ پیچھے ان دونوں نے قہقہہ لگایا۔
“بدتمیز!”
باہر آکر اسنے بے اختیار خود کو کھڑکی کے شیشے میں دیکھا، اسکا چہرہ لال ٹماٹر ہورہا تھا۔
 کیوں بھلا؟۔۔۔اور اس کیوں کے بعد اسکا دل بڑی زور سے دھڑکا ۔ اپنے آپ سے لڑتی وہ کیفے ڈھونڈنے باہر نکلی۔ محض ایک دن میں وہ یہاں یوں آرام دہ ہوچکی تھی جیسے سارا بچپن کی لندن کی گلیوں میں گزرا ہو۔
________ 
جاری ہے