وہ کچن کا ہلکا پھلکا کام کرنے کے بعد کمرے میں آئی تھی ۔۔اس کا دل تھا وہ آج ہی اپنا سامان الماری میں سیٹ کر لے ۔۔ اور اسے یقین تھا ذکاء چلا گیا ہوگا ۔۔مگر جب وہ کمرے میں آئی تو اسے ابھی تک تیاری کرتے دیکھ لمحہ بھر دروازے میں ہی رکی تھی۔۔۔اندر جائے یا ابھی پلٹ جائے واپس ۔۔۔اس نے سوچا ۔۔ذکاء نے کف کا بٹن بند کرتے ہوئے ایک سرسری نظر اس کے وجود پر ڈالی اور پھر سے اپنے کام میں مصروف ہو گیا ۔۔۔ وہ کچھ ڈھٹائی دکھاتی اندر ہی چلی آئی تھی ۔۔بد دلی سے ایک کونے میں جا کھڑی ہوئی ۔۔
”ان کی ہیلپ کرواؤں یا نہیں ؟“ اس نے انگلی دانتوں میں دابے خود کلامی کی تھی۔۔وہ اس کی سمت متوجہ نہیں تھا۔۔
” کیا کچھ بات کروں میں ان سے ۔۔یا ان سے پوچھو جو دادو کہہ رہے تھے۔۔لگتا تو نہیں ہے انھوں نے خود کہا ہوگا ان سے نکاح کا۔۔ان کے رویے سے صاف ظاہر ہے دادو نے زبردستی ہی کی ہوگی۔۔یہ دادو بھی نا۔۔۔ کیا ضرورت تھی بھلا مجبور کرنے کی۔۔۔“لب کچلتے ہوئے وہ جانے کیا کچھ سوچ رہی تھی جب چونکی وہ تیاری مکمل کر چکا تھا اور اب بستر پر بیٹھا جوتا پہن رہا تھا۔۔۔
”نایاب۔۔۔باہر کچھ مہمان خواتین آئی ہیں ۔۔ تم سے ملنا چاہتی ہیں ۔۔“مہر نے اندر آتے ہی مختلف قسم کے پھولوں کی خوشبوؤں سے معطر ہوئے روم میں مسحور کن سانس بھری تھی۔۔
”ہاں آتی ہوں۔۔“وہ جلدی سے بولی اور کپڑوں سے نادیدہ گرد جھاڑتے ہوئے آئینے میں خود کا جائزہ لیا ۔۔مہر سر ہلا کر پلٹ گئی تھی ۔۔
نایاب نے دیکھا تھا میک اپ تو نام کو بھی نہیں تھا۔۔وہ جلدی سے آگے گئی اور لب گلوز اٹھا کر کھولتے ہوئے پلٹی کہ اچانک سامنے آئے ذکاء سے ٹکرا گئی۔۔بے ساختہ ہڑبڑی میں نایاب کے ہاتھ اس کی چوڑی چھاتی پر پڑے اور سرخ لب گلوز کا برش ذکاء کی سفید شرٹ پر نشان چھوڑ گیا ۔۔اس کی آنکھیں ابل پڑیں۔۔جبکہ نایاب نے گھبرا کر تیزی سے گلوز چھوڑا اور منہ پر ہاتھ رکھ کر سہمتے ہوئے اس کے لمحوں میں غضب ناک ہوتے چہرے کو دیکھا تھا ۔۔اس کے تیور بڑے بگڑ چکے تھے۔۔
”آئم سوری ۔۔وہ میں نے ۔۔۔ آپ اچانک سامنے ۔۔“وہ گھبراتے ہوئے وضاحت کرنے لگی تو منہ سے الفاظ نہ نکلے۔۔ذکاء کی ٹھنڈی نظریں اسے ساکت کر رہی تھیں ۔۔وہ لب بھینچے کڑی نگاہوں سے اسے گھورتا رہا اور پھر بنا کچھ کہے نخوت سے سر جھٹک غصے سے شرٹ کے بٹن کھولتا پلٹ گیا تھا ۔۔نایاب نے متعجب نظروں سے اسے پھر الماری کے سامنے کھڑے ہوتے اور پھر ایک نئی شرٹ گنگھالتے دیکھا تھا۔۔۔اس نے کچھ کہا کیوں نہیں تھا۔۔۔وہ خاموش کیوں تھا۔۔۔نایاب کو اب اس کا کچھ نہ کہنا بھی برا لگا تھا ۔۔
”آئم سوری ذکاء۔۔مجھ سے غلطی ہو گئی.“اس کی غلطی تھی اسی لئے اسے لگا ایک بار واضح لفظوں میں معزرت کر لینی چاہیے ۔۔۔مگر سامنے کسے پرواہ تھی۔۔۔نئی شرٹ نکال کر اس کی معذرت کے جواب میں دھڑام سے الماری کا پٹ دے مارا اور باتھ روم میں گھس گیا ۔۔نایاب نے زمین پر پڑا لب گلوز پشیمان ہو کر دیکھا۔۔۔
”کیا ضرورت تھی۔۔بنا اس کے ہی چلی جاتی تو کونسی قیامت ٹوٹ پڑنی تھی۔۔۔اس نے کڑھ کر سوچا اور دل مسوس کر یونہی باہر چلی گئی۔۔۔
وہ شرٹ چینج کر کے چہرے کے بے تاثر تاثرات لیئے باہر نکلا تو سا منے ہی اسے فائقہ ممانی نے آڑھے ہاتھوں لے لیا ۔۔
”اب یہ کیا۔۔میں نے کہا بھی تھا کچھ دن کی چھٹیاں لے لو ۔۔“وہ اس کے اور نایاب کے لئے کچھ نئے کپڑے خریدنے جا رہی تھیں ۔۔
”ماما ۔۔میرے نئے آفس کی اوپننگ ہے ۔۔کام بہت بڑھا ہوا ہے ۔۔بے جا چھٹیاں نہیں کر سکتا ۔۔“وہ بردباری سے کام لیتا انھیں سمجھا کر ان کی سرعت سے نکلا ۔۔
”تو کوئی بات نہیں ۔۔زیادہ نہ سہی دو تین دن کی ہی لے لو ۔۔نایاب کے ساتھ وقت گزارو۔۔ایک دوسرے کو سمجھو ۔۔اسے بھی اچھا لگے گا۔۔“اس نے اپنے پیچھے پھر ماں کی آواز سن کر قدم روکے آنکھیں چڑھائی تھیں ۔۔
”اور دو تین دن کی چھٹی سے سب ٹھیک ہو جائے گا ۔ہم ایک دوسرے کو سمجھنے لگیں گے ۔کیا آپ کو واقعی میں ایسا لگتا ہے ۔۔؟ تو ماما میں آپ کو بتانا چاہتا ہوں کہ ہم بچپن سے ساتھ ہیں ۔۔ایک گھر میں رہتے ہیں ۔۔ایک دوسرے کو اتنا نہ سہی مگر جتنا ضروری ہوتا ہے اتنا سمجھتے بھی ہیں ۔۔مسئلہ صرف اس ایمرجنسی نکاح کو قبول کرنا ہے۔۔اس میں وقت لگے گا۔۔آپ یہ بات اپنے ذہن میں بٹھا لیں اور پلیززز مجھے میرے حال پر چھوڑ دیں۔۔آپ کو نایاب بہو کے روپ میں مل گئی ہے اس کے آگے پیچھے گھومیں ۔۔اسے کمپنی دیں۔۔میرے معاملات میں مداخلت نہ کریں۔۔خدارا تھوڑا وقت دیں مجھے ۔۔میں وقت لینا چاہتا ہوں۔۔اور نایاب کو دینا بھی۔۔“وہ سخت سنجیدہ لہجے میں ایک ایک لفظ جتا کر کہتا ضبط کی انتہاؤں کو چھو رہا تھا ۔۔فائقہ ممانی جو اسے ساتھ شاپنگ مال چلنے کے لئے کہنے والی تھیں۔۔وہ بھول بھال کر اس کے نئے غلغلے پر سیخ پا ہو گئیں ۔۔۔
”یہ کیا اب نیا تماشا ہے ذکی۔۔۔تم نے نایاب سے کوئی بات کی ہے کیا؟“انھیں شک گزرا تھا ۔۔ضرور ان کے بارہا منع کرنے کے بعد بھی شاید اس نے کوئی الٹی بات کی ہوگی ۔۔تبھی نایاب کا چہرہ اترا ہوا تھا ۔۔
”نہیں ۔۔میں نے اس سے کل سے کوئی بات نہیں کی۔۔“اس نے ذچ ہو کر یقین دلایا ۔۔
”کیا مطلب ۔۔تم نے کوئی بات ہی نہیں کی؟؟؟“ان کے حلق سے نکلتی چینخ میں حیرتوں کے دھماکے ہوئے تھے۔۔ہونق نظروں سے انھوں نے بیٹے کو دیکھا تھا ۔۔وہ کب سے اتنا سیدھا اور فرمانبردار ہو گیا تھا ۔۔انھیں بالکل یقین نہیں آ رہا تھا ۔۔
”جی۔۔آپ نے ہی کہا تھا کوئی الٹی بات مت کرنا ۔۔“اس نے جھلا کر ان کے الفاظ من و عن اُنھیں لوٹائے ۔۔ان کا دل چاہا وہ اپنا سر پھاڑ لیں۔۔
”اوہو ذکی۔۔۔میں نے بس الٹی بات کرنے سے منع کیا تھا۔۔یہ تو نہیں کہا تھا بات ہی مت کرنا۔۔یا اللّہ ۔۔!“انھوں نے پیشانی پیٹ لی۔۔۔
”ہاں بات بھی اسی لئے نہیں کی کہ کچھ الٹا نہ نکل جائے منہ سے ۔۔خیر مجھے جانا ہے تو۔۔۔“وہ بات ٹال مٹول کر کے وہاں سے رسے تڑوانے میں کوشش کر رہا تھا ۔۔
”تو یہ کہ تم میرے ساتھ جا رہے ہوں ۔۔اپنی پسند سے اپنی بیوی کے لئے خریداری کرو اور اس کی منہ دکھائی کے لیے بھی کچھ اچھا سا نیکلسٹ وغیرہ دیکھ لو۔۔ تمہیں تو خیال تک نہیں ہوگا ۔۔“وہ حکمیہ انداز میں کہتی ہوئی معاملہ ترتیب دینے لگیں ۔۔وہ بھونچکا رہ گیا ۔۔
”ماما میں آفس جا رہا ہُوں ۔۔آپ کے ساتھ نہیں چل سکتا ۔۔آپ یہ میرا کارڈ پکڑیں اور اپنی فیورٹ بہو کو لے جائیں ۔۔اور جو اس کا دل چاہا اسے خرید کر دلا دیں۔۔بس بات ختم۔۔۔“اس نے لفظوں پر زور بڑھاتے ہوئے اپنا کارڈ بٹوے سے نکال کر ان کو تھمایا اور خود تیزی سے گھومنے کو تھا کہ فائقہ ممانی نے اچانک اس کا فون اس کے ہاتھ سے اچک لیا۔۔۔اس کا منہ کھل گیا ۔۔
”ساتھ نہیں چل رہے نا تو آفس بھی نہیں جا سکتے تم۔۔آج کے دن تمہارا فون میرے پاس رہے گا۔۔میں بھی دیکھتی ہوں کیسے جاتے ہو تم بنا فون کے آفس ۔۔“وہ بھی اپنے نام کی ایک تھیں اور تھیں بھی اس کی ماں۔۔ذکاء تلملا اٹھا ۔۔
”ماما یہ کیا بچپنا ہے۔۔میرا فون واپس کریں!“اس نے ضبط نفس سے ہاتھ فون کی سمت بڑھایا ۔۔وہ ان سنا کرتی فون پرس میں ڈالتی پلٹ گئیں ۔۔
”ماما!“وہ بے یقینی سے منہ کھولے انھیں پکارتا رہ گیا ۔۔جبکہ وہ باہر نکل بھی چکی تھیں۔۔
”نایاب کو خود وقت نکال کر لے جانا ساتھ شاپنگ پر۔۔ابھی میں کچھ ضروری کی چیزیں لینے جا رہی ہوں نایاب کے لئے ۔۔“وہ کہتی گئیں ۔۔ذکاء نے پیچ و تاب کھا کر مٹھی دیوار پر دے ماری۔۔۔دماغ کی رگیں پھول چکی تھیں ۔۔وہ غصہ پینے کی ناکام کوشش کرنے لگا ۔۔۔
•••••••••••
