اور صبح وہی ہوا تھا جس کا نایاب کو ڈر تھا ۔ ذکاء کے عتاب سے بہت کم کچھ صحیح سلامت بچا تھا ۔۔باقی سب کچھ ٹوٹ پھوٹ چکا تھا۔۔اور فائقہ ممانی سے اسے بہت ڈانٹ پڑی تھی۔۔ پہلی بار انھوں نے اس طرح غصے سے اسے ڈانٹا تھا۔۔نایاب کو رونا آیا ۔۔جو کیا تھا ان ہی کے بیٹے نے کیا تھا۔۔اس میں اس کا کیا قصور۔۔وہ پورے آدھے گھنٹے تک سر جھکائے کھڑی ان کی ڈانٹ سنتی رہی تھی ۔وہ بار بار ذکاء کے غصے میں آنے کی وجہ بھی اسی سے پوچھ رہی تھیں ۔۔اب وہ کیا بتاتی ۔۔غصہ تو دلایا ہی اسی نے تھا ۔۔کیا تھا اگر وہ کہہ رہا تھا تو وہ چپ چاپ سمیٹ دیتی سب۔اسے اس میں اب اپنا بھی قصور نظر آ رہا تھا۔۔۔کیا ضرورت تھی ضد لگانے کی ۔۔بعد میں پھر اقراء ممانی کی تشفی پر اس کی خلاصی ہوئی تھی۔۔اور اب وہ شام سے کمرے میں بند بچی ہوئی چیزوں کو سمیٹ رہی تھی اور باقی ساتھ رکھے ڈسٹ بن میں پھینک رہی تھی۔۔دل الگ کٹ رہا تھا اتنے مہنگے تحفے تحائف کو پھینکنے سے ۔۔مگر جس نے یہ سب توڑا تھا اسے کوئی فکر و فاقہ نہیں تھا۔۔۔ وہ صبح سے جو نکلا تھا ابھی تک بھی نہیں لوٹا تھا ۔۔اور بے جا کی اتنی باتیں اس اکیلی کو سننی پڑی تھیں ۔۔اس کا دل چاہ رہا تھا وہ پھوٹ پھوٹ کر رو دے۔۔چیزیں سمیٹتے ہوئے بار بار دل بھر آ رہا تھا ۔۔آنکھیں دھندلا رہی تھی۔۔اور اس نمی کو بار بار پلکیں جھپک کر وہ واپس دھکیل رہی تھی۔۔مگر پھر بھی آنسوں رک نہیں رہے تھے۔۔گالوں پر بہتے جا رہے آنسوں پونچھ کر اسے نے گفٹ کا ایک اور پیک اٹھا کر کھولا ۔۔جس میں جانے کیا تھا۔۔مگر جو تھا وہ چکنا چور ہو چکا تھا۔۔۔تبھی اسے محسوس ہوا تھا کوئی دروازہ کھول کر بے دھڑک اندر آیا ہے ۔۔اور یہ وہی تھا جس کا یہ کمرہ تھا۔۔نایاب نے اسے دیکھنا تک گوارا نہ کیا ۔۔۔ سر جھکائے اپنے کام میں لگی رہی۔۔وہ کچھ دیر پورے کمرے میں کچھ تلاشتا رہا۔۔پھر متفکر سا اس کی سمت چلا آیا ۔۔
”بات سنو۔۔میں صبح یہاں ایک فائل بھول گیا تھا ۔۔تم نے کہیں دیکھی ؟“ وہ اس کے قریب کھڑا اس کے جھکے سر سے مخاطب تھا۔۔وہ خاموشی سے اٹھی اور اس کی سرعت سے گزر کر سائیڈ ٹیبل کی دراز سے فائل نکال لائی پھر اسے تھمائی اور پھر خاموشی سے جا کر اپنی جگہ پر بیٹھ اپنے کام میں لگ گئی ۔۔ذکاء نے فائل پکڑ کر اس کے سرخ چہرے اور نم آنکھوں کو دیکھا تو حیرت کا جھٹکا لگا ۔۔
”تم رو رہی ہو؟“وہ فائل ٹیبل پر رکھتا اس کے پاس آیا تھا ۔۔اس کی آواز پر وہ چونکی۔۔بنا چہرہ اٹھائے نفی میں سر ہلایا ۔۔
”نہیں.“اس نے گفٹ کو ڈسٹ بن میں پھینکا اور ایک اور پیک اٹھایا ۔۔ذکاء نے اس واضح جھوٹ پر اسے گھورا ۔۔بار بار پلکوں کی نمی جھٹک رہی تھی وہ۔۔
”کیا ہوا ہے۔۔؟ کسی نے کچھ کہا ہے ؟“اس نے سنجیدگی سے بھنویں میچ کر پوچھا ۔۔
”نہیں۔“اس بار بھی یک لفظی جواب آیا تھا ۔۔
”ادھر دیکھو میری طرف!“وہ ہاتھ سینے پر باندھے یوں کھڑا ہو گیا تھا جیسے اب اس کی رونے کی وجہ جانے بغیر وہاں سے ٹلنے نہیں والا ۔۔نایاب نے سرخ لبا لب بھرے نین کٹورے اٹھا کر شکوے سے اسے دیکھا اور ذکاء پورا کا پورا ان آنکھوں میں ڈوب گیا تھا ۔۔نایاب کی آنکھیں اس کا دل و دماغ جکڑ گئیں اور ذکاء کو پہلی بار محسوس ہوا تھا اس نظر کے اٹھنے پر اس کا بڑا نقصان ہو گیا ہے ۔۔نظروں کی اس تکرار پر بڑی مشکل سے سنبھلا تھا وہ۔۔
” اب بتاؤ کیوں رو رہی ہو۔۔؟“اس نے بے ساختہ نظریں چرا کر خود پر جمی ان آنکھوں کی زنجیر سے خود کو آزاد کیا تھا ۔۔۔
”اب کیا میں اپنی مرضی سے آپ کے کمرے میں بیٹھ کر رو بھی نہیں سکتی ۔۔اس پر بھی پرابلم ہے آپ کو؟“وہ پھر سے دل برداشتہ ہو کر رو پڑی تھی۔۔ذکاء کا دل پسیجا۔۔۔
”نہیں میں نے ایسا کب کہا ۔۔لیکن اگر تم اس طرح بیٹھ کر اکیلی اکیلی روؤ گی تو پوچھوں گا تو سہی نا ۔۔“ذکاء نے پہلی بار آج اس کے معاملے میں نرمی سے کام لیا تھا ۔۔
”تو آپ بھی بیٹھ کر رو لیں ساتھ ۔۔“وہ غصے سے چڑ کر کہتی دوبارہ کام میں لگ گئی۔۔ذکاء نے بے اختیار اس کی بات پر مسکراہٹ ضبط کی ۔۔
”نہیں مجھے نہیں شوق بلا وجہ بیٹھ کر رونے کا۔۔یہ کام تم ہی اچھے سے کر سکتی ہو۔۔“وہ اسے ہلکا پھلکا کرنے کے لئے بولا تو نایاب کو غصہ آ گیا ۔۔
”ہاں آپ کو بس اس طرح کے تماشے لگا کر مجھے سب سے ڈانٹ پروانے کا شوق ہے۔۔ہے نا؟“وہ ایک دم صوفے سے اٹھی اور چینختے ہوئے اپنے سامنے ٹوٹے پھوٹے سامان کی سمت اشارہ کیا ۔۔ذکاء نے لب بھینچ لیئے ۔۔
”کس نے ڈانٹا ہے تمہیں ؟“اور یہ جملہ بڑی ہی گہری سنجیدگی سے پوچھا گیا تھا وہ بھی اس کے وجود کا گہرا مشاہدہ کرتے ہوئے ۔۔
سادہ سے لان کے سوٹ میں ملبوس وہ بنا کسی مصنوعی خوبصورتی کے روئے روئے سرخ چہرے سے کھڑی دل میں اترنے کی صلاحیت رکھتی تھی۔۔
”کسی نے نہیں ڈانٹا ۔آپ کو اب مجھ سے کیا مسئلہ ہے ۔۔فائل دے دی نا میں نے۔۔اٹھائیں اور جائیں ۔۔مجھے اکیلا چھوڑ دیں۔۔“وہ جھنجھلا گئی۔۔اس وقت تو وہ سکون سے بیٹھ کر رونے کا شغل فرمانا چاہتی تھی ۔۔وہ دوبارہ سے بیٹھنے لگی تھی جب وہ دو قدم مزید اس کے قریب ہوا اور اس کے بیٹھنے سے پہلے ہی اسے پکڑ کر اپنے سامنے کھڑا کر لیا ۔۔ اس نے متحیر تاثرات سے اسے دیکھا ۔۔جانے کیوں اس کے ہر انداز میں عجیب سا استحقاق محسوس ہو رہا تھا ۔۔
”کس نے ڈانٹا ہے۔۔؟“اس نے اسے سامنے کھڑا کرنے کے بعد سوال دہرایا اور ہاتھ پھر سینے پر باندھ لیئے۔۔
”اپنا کام کریں جا کر!“نایاب نے تڑخ کر جواب دیا اور واپس مڑنے کو تھی کہ ذکاء کی گرفت پھر سے اس کی کلائی پر بندھی ۔۔وہ استعجاب سے پھر پلٹی ۔۔”کیا مسئلہ ہے؟“
”کس نے ڈانٹا ہے؟“اس نے پھر سوال دہرایا تھا ۔۔نایاب کو اس کی دماغی حالت پر شبہ ہوا ۔۔
وہ بلاوجہ اس سے الجھ رہا تھا ۔۔یہ سروکار کیوں ؟
”آپ کی ماں نے ۔۔وہ بھی صرف آپ کی وجہ سے ۔۔یہ سارا کارنامہ انجام دیا تھا تو صبح رکتے نا پھر ان کی ڈانٹ سننے کے لئے ۔۔ان کے سارے غصے کا سامنا مجھ اکیلی کو کرنا پڑا ۔۔میں نے تو نہیں کہا تھا آپ کو یہ سب تماشا کرنے کا۔۔ان کا غصہ جائز تھا۔۔وہ کتنے پیار اور چاہ سے یہ سب مہنگا سامان لائی تھیں اور آپ نے توڑنے سے پہلے ایک بار بھی نہیں سوچا ہوگا کہ انھیں کتنا دکھ ہوگا ۔۔اور آپ کو تو صبح سے ایک بار خیال بھی نہیں آیا کہ جا کر ان سے سوری بول دیں۔۔وہ کتنی خفا ہیں ۔۔مجھ سے بھی بات نہیں کر رہیں ۔۔میرا کیا قصور ہے۔۔بس مفت میں ملی ہوئی ہوں میں تو سب کو۔۔۔جو آتا ہے چار باتیں سنا کر چلا جاتا ہے۔۔بس یہی اہمیت ہے میری اس گھر میں ۔۔آپ سب کے ٹکڑوں پر پل رہی ہوں نا۔۔ وہ ٹکڑے ایسے ہی وصول ہونگیں اب ۔۔کہ ہر بار ہنگامے آپ کریں اور سب کی باتیں میں سنوں ۔۔“جانے کیا کچھ جمع تھا اس کے اندر جو اب نکل رہا تھا۔۔۔وہ رنجیدگی سے روتے ہوئے چلا چلا کر اسے باتیں سنا رہی تھی ۔۔
”نایاب تم اتنا نیگیٹو کیوں سوچ رہی ہو۔۔تم سے کس نے کہہ دیا تم ہم سب کے ٹکڑوں پر پل رہی ہو۔۔تمہیں پتا ہے نا اس گھر میں پھپھو کا بھی برابر کا حصہ ہے ۔۔۔ پھر تمہیں ایسا کیوں لگا۔۔؟“وہ اس کا ہاتھ پکڑ کر اسے نرمی سے سمجھانے لگا۔۔ نایاب کا دماغ اس وقت کچھ بھی مثبت سوچنے کے لئے تیار نہیں تھا ۔۔یہ بھی نہیں کہ ذکاء کا رویہ اس کے لئے مہربان ہوا ہے۔۔اس نے ذکاء کا ہاتھ جھٹک دیا ۔۔
”آپ مجھے اکیلا چھوڑ دیں۔۔مجھے آپ سے کوئی بات نہیں کرنی۔۔“وہ غصے سے اسے باز پرس کر بولی اور صوفے پر بیٹھی اپنے کام میں لگ گئی ۔۔وہ کچھ دیر سنجیدگی سے اسے دیکھتا رہا پھر فائل اٹھا کر باہر چلا گیا ۔۔
••••••••••••••اس نے دروازے پر ہلکی سی دستک دی تھی ۔۔
”آجاؤ!“اندر سے اجازت ملتے ہی اس نے فائل دوسرے ہاتھ میں منتقل کی اور دروازہ کھول کر اندر جھانکا ۔۔سامنے ہی شاہ ویر صاحب کے ساتھ فائقہ ممانی بیٹھی ہوئی تھیں ۔۔ان کے لئے چائے تیار کرتے ہوئے فائقہ ممانی نے چہرہ اٹھا کر بیٹے کو دیکھا ۔۔
”کیا بات کر سکتا ہوں ؟“ اس نے سرسری لہجے میں دریافت کیا تھا ۔۔وہ چونکے ۔۔ذکاء نے شاید پہلی بار آ کر ان سے ایسی اجازت طلب کی تھی۔۔ فائقہ ممانی کو بھی معاملہ سنجیدہ ہی لگا ۔۔”ہاں آؤ!“ شاہ ویر مامو نے اندر بلایا اور فائقہ ممانی نے ان کی تیار چائے اس کو پکڑائی پھر سیدھی ہو بیٹھیں ۔۔
”میں نے اصل میں ماما سے بات کرنی تھی ۔۔“وہ اندر آ کر ان کے سامنے تابعداری سے کھڑا ہوا تھا ۔۔
”مجھ سے کیا بات کرنی ہے؟“فائقہ ممانی کو تشویش ہوئی ۔۔
”ماما آپ کو نایاب کو ڈانٹنا نہیں چاہئے تھا ۔۔وہ سارا سامان میں نے غصے میں خراب کیا تھا ۔۔آپ کو ڈائریکٹ مجھ سے اس متعلق بات کرنی تھی۔مجھے ڈانٹنا تھا۔۔۔مجھے اچھا نہیں لگا آپ نے میری وجہ سے اسے باتیں سنائیں ۔۔“وہ بڑی ہی سعادت مندی سے کام لیتا کچھ اس طریقے سے محتاط انداز میں بات کر رہا تھا کہ انھیں بدتمیزی بھی نہ لگے اور رشتوں کا توازن بھی برقرار رہے۔۔شاہ ویر مامو کو معاملے کی نوعیت کا اندازہ نہیں تھا۔۔ناسمجھی سے گردن موڑ کر زوجہ محترمہ کو دیکھا۔۔جبکہ فائقہ ممانی کے چہرے پر بے ساختہ چمک آئی تھی ۔۔ان کو اچھا لگا تھا وہ نایاب کے حق میں بات کرنے آیا تھا ۔۔یہ خوش آئندہ بات تھی۔۔اور وہ روائتی ساس کی طرح بھی نہیں تھیں کہ بیٹے کے سوال کرنے اور شکایت اٹھا لانے پر بہو کے لئے الٹا محاذ کھڑا کرتیں۔۔وہ دل سے خوش اور مطمئن ہوئی تھیں کہ ان کے بیٹے نے کسی طرح تو نایاب پر غور ؤ فکر کیا۔۔ انھیں لگ رہا تھا انھوں نے نایاب کو ڈانٹ کر غلط کیا۔۔صبح سے افسوس میں پھر رہی تھیں ۔۔مگر اب لگ رہا تھا یہ تو اچھا ہی ہو گیا ۔۔ان کے بیٹے کو کچھ تو نظر آیا تھا۔۔
”تو اس کا مطلب تمہیں اپنی غلطی کا احساس ہو رہا ہے ۔۔؟“فائقہ ممانی نے سنجیدہ رہنے کی کوشش کی تھی ۔۔
”جی بالکل ۔۔مجھے احساس ہے اور میں اس کے لئے آپ سے apologize بھی کرتا ہوں۔۔ اور ایک ریکوئسٹ ہے۔۔آئندہ پلیززز کسی بھی بات پر آپ نایاب کو مت ڈانٹیئے گا۔۔سیدھا مجھ سے بات کیجئے گا۔۔ وہ بہت چھوٹے دل کی لڑکی ہے۔۔ذرا کچھ بول دو تو گھنٹوں رونے بیٹھی رہتی ہے اور الٹا سیدھا سوچنے لگتی ہے۔۔اور ایک بات اس سے جا کر بات بھی کر لیجئے گا ۔۔اسے اچھا لگے گا اگر آپ اس سے نرمی سے بات کر کے اسے گلے سے لگائیں گی تو۔۔اور میں وعدہ کرتا ہوں آئندہ میری کسی حرکت سے آپ کو تکلیف نہیں پہنچنے دوں گا۔۔“وہ سنجیدگی اور متانت سے بات کرکے سر خم کرتا پلٹ گیا تھا ۔۔وہ مطلب کی بات کرتا تھا ۔طول دینا اسے پسند نہیں تھا۔۔۔فائقہ ممانی نے مسکراتے ہوئے اپنے اکڑو بیٹے کو جاتے دیکھا ۔۔۔جیسا بھی تھا ،غصے کا جتنا بھی تیز تھا۔۔مگر رحم دل اور بے حد پیارا انسان تھا۔۔
”بھئی بیوی یہ کیا معاملہ چل رہا ہے ۔۔کچھ پلے نہیں پڑا.“شاہ ویر ماموں الجھے بیٹھے تھے ۔
”کچھ نہیں ۔۔آپ چائے پیجئے.“ انھوں نے ٹالتے ہوئے ان کا دھیان چائے کی سمت دلایا اور مسکراتے ہوئے کچھ سوچنے لگیں ۔۔۔یعنی کہ اب برف پگھلنے لگی تھی۔۔
••••••••••••••
