”یہ کیا بکواس کر رہے ہو تم ۔۔ہوش میں ہو تم؟“شمیم ممانی کے سامنے جیسے ہی بلال نے اپنے دل کی بات رکھی تھی وہ غصے سے بھڑک پڑی تھیں۔۔۔ان کی غضب ناک آواز اس قدر بلند تھیں کہ شاہ زیب ماموں ششدر سے باتھ روم سے نکل آئے تھے۔۔
”جی ماما میں ہوش میں ہی ہوں۔۔اور بہت سوچ سمجھ کر میں نے یہ فیصلہ کیا ہے۔۔“بلال بہت اطمینان سے کھڑا تھا ۔۔شمیم ممانی کا بس نہ چلا اس کے منہ پر تھپڑ جڑ دیں۔۔
”تم ہوتے کون ہو فیصلہ کرنے والے۔۔ اور تم نے سوچ بھی کیسے لیا میں کچھ ایسا ہونے دوں گی ۔“ان کی آواز بلند ہوتی کمرے کے در و دیوار ہلا گئی تھی۔۔
”ماما اس میں حرج ہی کیا ہے ۔۔کنول اچھی لڑکی ہے اور اگر میں اس کے گھر آپ کو بھیج رہا ہوں تو کیا مسئلہ ہے اس میں ۔۔آج نہیں تو کل میرا آپ نے کہیں سوچنا ہی تھا نا۔۔۔اور میں نے کنول کو پسند کیا ہے اپنے لیئے ۔۔“وہ بے دھڑک کھڑا سنجیدگی سے بات کر رہا تھا ۔۔کل ہی تو اسے علم ہوا تھا شمیم ممانی اس کے لئے اپنے میکے سے کسی لڑکی کو پسند کر کے رشتے کی بات ڈال آئی ہیں ۔۔اور بلال نے آج دو ٹوک انداز میں ان کے سامنے کنول کا نام رکھ دیا تھا ۔۔
”مگر میں کیوں اس کے لئے جاؤں تمہارا رشتہ لے کر ۔۔میرا دماغ خراب نہیں ہے کہ اس طلاق یافتہ لڑکی کو اپنے کنورے بیٹے کے لئے لے لوں۔۔۔کچھ تو عقل کو ہاتھ مارو بلال ۔۔“شمیم ممانی کا پارہ چڑھتا جا رہا تھا ۔۔شاہ زیب ماموں نے خاموشی سے ماں بیٹے کی جھڑپ سنی تھی ۔۔یہ اکثر ہوتا تھا۔۔بلال کی شمیم ممانی سے نہیں بنتی تھیں ۔۔اکثر دونوں میں کسی نہ کسی بات پر اختلاف ہوتا رہتا تھا۔۔شمیم ممانی کچھ تیز طرار قسم کی خاتون تھیں ۔۔اور بلال دھیمے مزاج کا سنجیدہ لڑکا تھا ۔۔اسے ماں کی کچھ عادات پسند نہیں تھیں ۔۔
”ماما آپ اگر کنول کے گھر محض اس وجہ سے نہیں جانا چاہتی کہ وہ طلاق یافتہ لڑکی ہے تو آپ بہت غلط سوچ کی مالک عورت ہیں ۔۔کسی لڑکی کو صرف اس وجہ سے ریکجیٹ کر دینا بہت غلط بات ہے۔۔۔اور کیا کمی ہے کنول میں ۔۔“
بلال صبر و تحمل کا دامن تھامے ان سے اصرار کر رہا تھا ۔۔
”مت بھولو بلال اس کی شادی پہلے ہو چکی ہے۔۔“
”طلاق بھی تو ہو چکی ہے۔۔“اس نے ماں کی بات لمحوں میں رد کر دی۔۔
”میں بالکل بھی اس لڑکی کو اپنی بہو نہیں بناؤں گی ۔۔دیکھ رہے ہیں آپ ۔۔کیسے اس چھٹانک بھر کی لڑکی نے آپ کے بیٹے کو انگلی پر لپیٹ لیا ہے ۔کہ یہ یہاں میرے سامنے کھڑا اس کے لئے زبان چلا رہا ہے ۔۔دیکھو تو سہی ۔۔طلاق لے کر دل نہیں بھرا تو میرے بیٹے پر ڈورے ڈال دیئے۔۔۔اور یہ پہنچ گیا میرے سامنے اس کی طرف داریاں کرنے۔۔“شمیم ممانی کی تیز زبان کی دھار اور کٹر پن دیکھ شاہ زیب ماموں نے سنجیدگی سے انھیں ٹوکا تھا ۔۔
”شمیم زبان کو لگام دو۔۔کس طرح کے الزامات دے رہی ہو بچی کو۔۔۔ اگر وہ کنول سے شادی کرنا چاہتا ہے تو چلے چلو اس کے گھر رشتہ لےکر ۔۔طلاق یافتہ ہونا کوئی بڑی بات نہیں ہے ۔۔بلکہ ثواب کا کام ہے کسی طلاق یافتہ لڑکی کے سر پر ہاتھ رکھنا۔۔اور پھر دیکھی بھالی بچی ہے۔۔نیک اور صالح ہے۔۔مجھے کوئی اعتراض نہیں ہے ۔۔“
انھوں نے معاملے کی سنگینی کو زائل کرتے ہوئے ہلکی آواز میں غصے سے آگ اگلتی بیوی کو سمجھایا تھا ۔۔
”لیکن مجھے اعتراض ہے۔۔۔میں اپنے اکلوتے بیٹے کے لئے ایک طلاق شدہ لڑکی کا رشتہ نہیں لوں گی ۔میرے بیٹے کو لڑکیوں کی کمی نہیں ہے ۔۔ایک نظر ماروں اپنے میکے میں تو ہزاروں لڑکیاں تیار ہوںگی میری بہو بننے کو۔۔۔ارے اس لڑکی جیسی ہزاروں لڑکیاں وار کر پھینک سکتی ہوں میں اپنے بیٹے کے سر سے ۔۔“شمیم ممانی آپے سے باہر ہو رہی تھیں ۔۔رعونت سے جو منہ میں آ رہا تھا اگلتی جا رہی تھیں ۔۔تکبر اور گھمنڈ ان کے چہرے پر چھایا ہوا تھا ۔۔
”ماما ہزاروں کو چھوڑ دیں بس ایک کنول ہی دلا دیں مجھے ۔۔وہی بہت ہے۔۔ ماما میں محبت کرتا ہوں کنول سے ۔۔ابھی سے نہیں تب سے جب میں دس سال کا تھا۔۔۔یہ تو قسمت کی ستم ظریفی تھی کہ اس کی شادی اچانک کسی اور سے ہو گئی ۔۔مگر اللّہ کو میری لگن پسند آئی اس نے کسی طرح پھر ایسا موقع دیا ہے مجھے کہ میں اسے پا سکوں ۔۔ماما پلیزززز ! مجھے کنول دیں دے۔۔“بلال نے ان کا ہاتھ پکڑ کر التجا کی تھی ۔شمیم ممانی نے غضب سے اسے گھور کر نخوت سے ہاتھ جھٹک دیا ۔۔
”بلال میں نے ایک بار کہہ دیا سو کہہ دیا ۔۔کنول کا خیال اپنے دل سے ابھی کے ابھی نکال دو۔۔۔میں قطعی اس لڑکی کو بہو نہیں بناؤں گی چاہے دنیا ادھر کی ادھر ہو جائے ۔۔“انھوں نے سخت درشتی سے بیٹے کے ارمان کچلے تھے ۔
”ماما آپ کو کنول سے کیا مسئلہ ہے۔۔کسی لڑکی کے متعلق اتنا بغض رکھنا اچھی بات نہیں ہے۔۔آپ کی بھی تو بیٹی ہے ایک۔۔کسی کی بیٹی پر بات کرتے ہوئے ذرا دل نہیں کانپتا آپ کا ۔۔“
”بلال !“ان کا ہاتھ ہوا میں لہرایا اور بلال کی گال پر پڑ گیا ۔۔وہ سن رہ گیا ۔۔اسے بالکل بھی شمیم ممانی کے ہاتھ اٹھانے کی توقع نہ تھی۔۔شاہ زیب ماموں بھی دنگ رہ گئے تھے ۔۔
”شمیم ہوش کے ناخن لو۔۔جوان بیٹے پر ہاتھ اٹھا رہی ہو..“ماموں نے آگے بڑھ کر انھیں پیچھے دھکیلا تھا۔۔وہ بچوں پر جبر کرنے کے سخت خلاف تھے وہ بھی بلال جیسے بچوں پر جو اتنے سلجھے ہوئے اور تابعدار ہوں۔۔۔بلال نے جھنجھناتے گال پر ہاتھ رکھ کر ماں کو سکتے سے دیکھا۔۔
”آپ اسے کیوں نہیں کہتے یہ ہوش کے ناخن لے۔۔اپنی بہن کا موازنہ اس فسادی لڑکی کے ساتھ کر رہا ہے ۔۔اسے زرا شرم نہیں آ رہی ۔۔میری ذیب کی تربیت میں نے بہت اچھے سے کی ہے۔۔۔کنول کی طرح اس کے لچھن نہیں ہیں ۔۔کچھ تو کمی ہوگی نا اس میں جو شوہر نے طلاق دے دی ۔۔“ان کا غصہ سوا نیزے پر پہنچا ہوا تھا۔۔۔بلال نے افسردگی سے ماں کو دیکھا۔۔زہر خند آواز میں بولتی وہ ہر بات کا فرق یکسر نظر انداز کر چکی تھیں ۔۔اسے بہت دکھ پہنچا تھا۔۔۔
”میں آج ہی جا کر اس کی ماں سے بات کرتی ہوں سنبھال کر رکھے اپنی بیٹی کو۔۔“وہ پھر اونچی آواز میں دھمکی لگاتی غضب سے چینخیں۔۔
”ماما آپ ایسا کچھ نہیں کہیں گی جا کر ان سے ۔۔“بلال نے سخت لہجے میں تنبیہہ کی تھی ۔
”میں جاؤں گی ۔۔اسے بھی تو پتا چلے اپنی پرورش کا۔۔کیسے اس لڑکی کو پالا ہے کہ ادھر اُدھر کے لڑکے پھانس رہی ہے وہ ۔ توبہ توبہ۔۔میرے تو رونگھٹے کھڑے ہو گئے ہیں ۔۔پدی سی لڑکی اور کام دیکھو۔۔ “
شمیم ممانی کو قابو کرنا مشکل ہو رہا تھا ۔۔ان کا واویلہ بڑھتا ہی جا رہا تھا ۔۔
”ماما میں نے کہہ دیا نا آپ کوئی تماشا نہیں لگائیں گی ۔۔اگر آپ نے ایسا کیا تو مجھ سے برا کوئی نہیں ہوگا ۔۔“بلال نے سخت لہجے میں باور کرایا تھا ۔۔
”تو تم بھی ایک بات کان کھول کر سن لو۔۔اگر چاہتے ہو کہ میں اس بات کو یہی ختم کر دوں تو کنول کا خیال آج کے بعد دل میں مت لانا ۔۔اور اگر پھر بھی تم نے ایسا چاہا تو پھر میرے مرنے کی دعا کرنا ۔۔کیونکہ میرے جیتے جی تو میں ایسا ہونے نہیں دوں گی ۔۔۔اب مصلے پر بیٹھ جاؤ اور دعائیں مانگو کہ ماں مر جائے ۔۔“وہ چینخ چینخ کر کہتی کمرے سے نکل گئیں ۔۔بلال نے صدمے سے انھیں جاتے دیکھا تھا ۔۔وہ کتنی بڑی بات کہہ گئی تھیں ۔۔بلال کو اس وقت انھیں کنول کے لئے راضی کرنا اپنی زندگی کا سب سے ناممکن کام لگا تھا۔۔۔ایک دم ہی وہ بہت تھک گیا تھا ۔۔شاہ زیب ماموں نے اس کے کندھے پر تسلی بخش ہاتھ پھیرا ۔۔
”فکر مت کرو۔۔میں کچھ دن بعد خود موقع دیکھ کر بات کروں گا تمہاری ماں سے ۔۔اس وقت وہ بہت غصے میں ہے کچھ نہیں سنے گی۔۔“بلال نے غمزدہ ہو کر باپ کو دیکھا تھا ۔۔شاہ زیب ماموں سچ میں آئیڈیل باپ تھے ۔۔صابر اور بلال کی طرح ہی دھیمے متحمل مزاج ۔۔انھوں نے بیٹے کو حوصلہ دیا اور گہری آہ بھر کر کمرے سے نکل گئے تھے۔۔۔بلال نے گلے میں اُبھرتی گلٹی کو نگلا اور اس جھگڑے کے متعلق سوچنے لگا۔۔کتنا اچانک ہی سب کچھ طوفان کی طرح اٹھا اور پھر تھم گیا تھا ۔۔۔ اور بلال جانتا تھا یہ طوفان ابھی اور تباہی مچائے گا۔۔۔اور وہ تیار تھا سب جھیلنے کو۔۔
••••••••••••••جاری ہے
