Ye Manzil Asaan Nahin by Kainat Riyaz Episode 5

اس عورت نے آنکھیں پھاڑ کر اس لڑکے کو دیکھا تھا ۔۔جس کی رعب دار شخصیت اور امیرانہ طور طریقہ اس کے دماغ کو مرعوب کر گیا تھا ۔۔ فاریہ نے سسکتے ہوئے شانی کو تر بتر چہرہ اٹھا کر دیکھا تھا ۔۔وہ گوری رنگت کا لڑکا ضبط کی شدت کے باعث سرخ ہو رہا تھا ۔۔
”اے تو کون ہے بھئی ہمارے گھر کے معاملات میں بولنے والا۔۔ہمت کیسے ہوئی تیری ہاں!“
ماں کی بولتی لمحہ بھر کو بند ہوتی دیکھ پیچھے کھڑا بلو تڑی دکھاتا آگے آیا تھا ۔۔
”اماں یہی ہے نا اس کا عاشق۔۔۔جس کے ساتھ گلچھڑے اڑانے گئی ہوئی تھی یہ ۔۔روز ہی ملتی ہوگی اس سے ۔۔مگر آج کچھ زیادہ دیر ہو گئی تو چھوڑنے چلا آیا ۔۔۔اب دیکھو ۔۔یہ کچھ ہونے لگا ہے ہمارے گھر میں۔۔۔یہ تو ہے ہی بدکردار ۔۔۔!“
وہ منہ سے غلاظت اگلتا فاریہ کی طرف لپکا تھا کہ شانی کی ایک خونخوار نگاہ پر وہ خوف زدہ ہو وہیں رک سا گیا ۔۔ شانی کی سرخ انگارہ آنکھوں میں جھانکتے ہوئے اس کا سانس رکا تھا ۔
”اپنی تربیت کا پتا دینے کی ضرورت نہیں ہے ۔تم کس معیار کے لڑکے ہو یہ مُجھے پتا چل چکا ہے۔۔میں بھی تمہیں اس بات کا بڑا اچھے سے جواب دینا جانتا ہوں۔۔ مگر مجھے میری تربیت اپنے خود کے معیار سے گرنے کی اجازت نہیں دیتی ۔۔بہتر ہوگا بولتی بند رکھو!“شانی نے آنکھوں کے کڑے تیوروں سے اسے تنبیہہ کی تھی ۔وہ اس کے رعب و دبدبے سے گھبرا کر پیچھے ہٹا مگر زبان کی تابڑ توڑ افشانیاں عروج پر تھیں۔۔
”اماں دیکھ رہی ہے کس بدماش کو اٹھا کر گھر لے آئی ہے۔۔بلاو ذرا سب کو ۔یہ غنڈی گردی ہمارے محلے میں نہیں چلنے والی ۔۔یہ شریفوں کا محلہ ہے ۔“بلو ایک دم ہی جوش میں آتا چلا چلا کر محلے کو اکٹھا کر رہا تھا ۔۔شانی نے بھنویں سکوڑ کر ناسمجھی سے اسے گھر کے باہر بھاگ کر نکلتے اور پھر ہنگامی حالات پیدا کرتے دیکھا تھا۔۔۔فاریہ کے چہرے پر قطروں کی صورت خوف اترا ۔۔
”آپ جائیے یہاں سے ۔۔ آپ پلیز چلے جائیں ۔۔آپ کا یہاں رہنا ٹھیک نہیں ہے ۔۔“وہ خوفزدہ سی اس کی سمت مڑ کر شانی کو جھنجھوڑتے ہوئے کہہ رہی تھی ۔۔شانی نے گھر کے باہر مکانوں سے نکلتے لوگوں کا ہجوم لگتا دیکھا تھا ۔۔محلہ ایک دم ہی جیسے نیند سے بیدار ہوا ان کے گھر کے دروازے پر انگشت بدنداں سا جمع ہو چکا تھا ۔۔
”یہ سب کیا کر رہے ہیں یہ لوگ.؟؟“ شانی نے فاریہ کی بات نہیں سنی تھی۔۔وہ تو بس اس تماشے کو ہونق شکل لئے دیکھ رہا تھا ۔۔جو اچانک ہی رونما ہوتا سمجھ سے باہر تھا ۔
”آپ پلیززز جائیں یہاں سے ۔ میں کہہ رہی ہوں نا آپ…“ فاریہ کا دماغ ماؤف ہو رہا تھا ۔۔اسے یہ مجمع کسی مساعد حالات کا عندیہ نہیں لگ رہا تھا ۔۔نتائج بڑے بھیانک ہونے والے تھے۔۔۔ اس کی بوکھلاہٹ پر شانی نے اس لڑکی کو دیکھا ۔۔
”لیکن میں اس طرح کیسے ۔۔“وہ اس سے پہلے کچھ کہہ پاتا۔۔باہر معلوم نہیں کیا مشورات ہوئے تھے کہ محلے کے کچھ جوان لڑکے ایک جھٹکے سے اندر گھسے اور ایک دم شانی کو پکڑ کر گھر کے باہر کھینچ کر لے گئے ۔۔شانی اتنا بوکھلا گیا تھا کہ کب ڈری سہمی فاریہ کا ہاتھ اس کے ہاتھ سے چھوٹا وہ جان نہ سکا ۔۔فاریہ کا دل دھک سے رہ گیا ۔۔۔اس کے دل کو یک دم خدشات نے آن گھیرا ۔۔جو ہونے والا تھا وہ بہت غلط تھا ۔۔اس کی سوتیلی ماں اسے بھی کھینچ کر باہر لے گئی۔۔جہاں ان کے گھر کے احاطے میں پورا محلہ کھڑا تھا ۔۔ہر کوئی ان دونوں کو شک کی نظر سے دیکھتا منہ پر ہاتھ رکھے کھڑا تھا ۔۔چہ مگوئیاں شروع تھیں۔۔ہر کوئی اس لڑکے کو ان کے گھر سے نکلتے دیکھ متعجب کھڑا تھا ۔۔۔ اس نے پورے محلے کے مرد خواتین اور بوڑھوں کو دیکھا تو وحشت سے آنکھیں میچ لیں۔۔وہاں ہر کوئی اسے بچپن سے جانتا تھا ۔۔مگر اس وقت آنکھوں میں نفرت اور شک لیئے اسے دیکھ رہے تھے۔۔یہ بے اعتباری بھری نگاہیں فاریہ کے دماغ کی رگیں سکوڑ گئیں ۔۔۔
”میں نہیں جانتا اس لڑکی کو۔۔میں تو اسے گھر چھوڑنے آیا تھا بس..“بہت سے شور شرابے اور تیز آوازوں میں اسے شانی کی آواز سنائی دی تو پٹ سے آنکھیں کھول دیں ۔
سامنے ہی سب محلے کے مرد اسے گھیرے کھڑے پوچھ تاچھ کر رہے تھے۔۔۔
فاریہ کے لیے یہ دل لرزا دینے والا منظر تھا ۔۔کہ شانی پر الزامات لگائے جا رہے تھے۔۔اسے فاریہ کا یار کہا جا رہا تھا ۔۔اس پر بہتان بندھ رہے تھے ۔۔فاریہ کانپتے ہوئے منہ پر دوپٹے کا پلو دبائے تھر تھر کانپ رہی تھی ۔۔دیکھتے ہی دیکھتے محلے کے ثالث بزرگ بھی چلے آئے تھے۔۔۔عجیب ہی ہنگامی صورتحال پیدا ہو چکی تھی ۔۔فاریہ کی ٹانگوں سے جان نکلی جا رہی تھی۔۔۔اس کا دھڑ بس زمین بوس ہونے لگا تھا ۔۔ ایک جوشیلے نوجوان نے شانی کا کالر دبوچ رکھا تھا ۔۔اور وہ جھنجھلاتے ہوئے سب کو سمجھانے کی کوشش کر رہا تھا ۔۔سارے مرد آپس میں گومگو ہوتے تو کبھی شانی پر جملے کستے۔۔۔فاریہ کا کردار جو پہلے صرف گھر میں اچھالا جاتا تھا اب پورے محلے میں اچھل چکا تھا۔جانے کیا کچھ کہتی خواتین اسے کاٹ دار جملوں سے تار تار کر رہی تھیں ۔۔اسے کچھ سنائی نہیں دے رہا تھا ۔۔اس کا دماغ سائیں سائیں کرنے لگا تھا ۔۔کانوں کی لوئیں اس قدر تپ اٹھی تھیں کہ اسے لگا اب وہ کبھی کسی کے سامنے نظر نہیں اٹھا پائے گی ۔۔۔وہ پورے محلے میں بدنام ہو چکی تھی ۔اس نے وہ وہ گالیاں سن لیں تھی اپنے کردار پر کہ جو آج تک اس نے کبھی نہ سنی تھی ۔۔