تینوں ماموں دادو کے ساتھ ذکاء کی نیو کنسٹرکشن سائٹ کا دورہ کر میر ولا لوٹ رہے تھے ۔۔۔ پر سکون چلتی گاڑی میں فرنٹ سیٹ پر ڈرائیونگ کرتے منجھلے ماموں کے ساتھ بیٹھے دادو کچھ کاروباری امور پر تبادلہ خیال پیش کر رہے تھے ۔۔جب رات کے اندھیرے میں ڈوبی فضا میں اچانک سے ان کی گاڑی کے سامنے کوئی آ گیا تھا ۔۔وہ وجود گاڑی سے ٹکراتا اس سے قبل ہی منجھلے ماموں نے بریک پر پاؤں رکھ دیا تھا۔۔سامنے آیا وجود تیز ہیڈ لائٹس کی روشنی میں ایک جھلک نظر آیا ۔۔وہ کوئی لڑکی تھی جو لڑکھڑا کر ہلکی سی ٹکر لگنے پر ہی لہراتی ہوئی زمین بوس ہو گئی تھی۔۔۔گاڑی میں بیٹھے تمام افراد گھبرا گئے تھے ۔۔تیزی سے سیٹ بیلٹ کھولتے ہوئے وہ باہر نکل آئے تھے ۔۔دادو نے بھی اپنی لاٹھی ہاتھ میں لی اور ڈور کھول کر باہر قدم رکھا۔۔تب تک تینوں ماموں اس سناٹے میں ڈوبی سڑک پر تنہا بے ہوش پڑی لڑکی کے گرد جمع ہو چکے تھے۔۔
”اوہو۔۔بیٹا آپ ٹھیک تو ہیں ؟“منجھلے ماموں کا سانس سوکھ گیا تھا ۔۔بروقت بریک لگانے کے باوجود بھی اسے ذرا سی ٹکر لگ گئی تھی ۔۔۔
”شاہ ویر وہ بے ہوش ہو گئی ہے..!“بڑے ماموں نے اس لڑکی کو ہلا کر چیک کرتے ہوئے بے حواسی سے انکشاف کیا تھا ۔۔
”یہاں اکیلی یہ کیا کر رہی تھی ۔اور کوئی ساتھ بھی نہیں ہے۔۔بخار سے تپ رہی ہے یہ.“چھوٹے ماموں نے گھٹڑی کی صورت گرد و نواح سے بیگانہ پڑی اس لڑکی کی کلائی پکڑی تھی۔۔
”اٹھاؤ بچی کو گاڑی میں بٹھاؤ ۔۔“دادو کی آواز نے عقب سے ان کی توجہ کھینچی تھی۔۔اور پھر ان کے حکم کے مطابق اسے اٹھا کر سہارتے ہوئے وہ گاڑی کی سمت چل پڑے تھے۔۔
”ہوسپٹل لے چلو ویر!“شاہ میر ماموں نے لڑکی کو احتیاط سے سیٹ پر بٹھاتے ہوئے ارتجالاً کہا تھا۔۔
”نہیں ۔۔گھر لے چلو۔۔اور شاہ زیب ڈاکٹر کو کال کر کے فوراً میر ولا آنے کا کہو۔۔ بچی کو کوئی چوٹ نہیں لگی۔۔بخار اور ڈر کے صدمے کے باعث بے ہوش ہوئی ہے ۔۔ گھر نزدیک ہے بس جلدی پہنچ جائیں گے ۔۔“دادو نے گاڑی میں بیٹھتے ہوئے ان کی بات کی تردید کی اور پھر حکمیہ انداز میں کہتے ہوئے وہ خاموشی سے بیٹھ گئے تھے۔۔ان کے تینوں بیٹوں نے فوراً تابعداری سے ان کی حکم کی تعمیل کی تھی۔۔شاہ ویر صاحب نے گاڑی کو اسٹارٹ کیا تھا۔۔اور شاہ زیب صاحب نے فوراً ڈاکٹر کو کال لگائی تھی۔۔جبکہ شاہ میر صاحب اس لڑکی کو احتیاط سے پیچھے ٹیک لگا کر بٹھائے فکرمند ہو رہے تھے ۔۔جانے وہ مصیبت زدہ لڑکی کن حالات کا شکار تھی۔۔
•••••••••••••••
شانی رات گئے تک اسے ڈھونڈتا رہا تھا مگر وہ اسے کہیں نہ ملی تھی ۔۔وہ خود کو بھی لعن طعن کر رہا تھا ۔۔کیسا شوہر تھا وہ۔۔اپنی ہی بیوی کی حفاظت کا ذمہ اٹھایا تھا اور اسے تحفظ نہیں دے سکا تھا۔۔جانے وہ کہاں ہوگی کس حال میں ہوگی۔۔وہ بہت پریشان تھا۔۔اس کا سر پھٹ رہا تھا ۔۔اس کی آنکھوں کے سامنے منظر دھندلا رہے تھے ۔۔ اسے فاریہ ہر رنگ میں ابھرتی ہوئی اپنے سامنے نظر آنے لگی تھی۔۔اس کا دماغ ماؤف تھا اور سوچنے سمجھنے کی صلاحیتیں سلب ہو گئی تھیں۔۔۔وہ جتنا سوچ رہا تھا اتنا ہی ملال میں ڈوب رہا تھا۔
”اتنے دن سے وہ میرے ساتھ رہ رہی تھی۔۔اور مجھے اسے فون تک لے کر دینے کا خیال نہیں آیا ۔۔“اس نے اپنی عقل پر ماتم کیا تھا۔۔ملال ایسا تھا کہ ختم ہونے میں نہیں آ رہا تھا ۔۔آج اگر فاریہ کے پاس فون ہوتا تو وہ آسانی سے اسے ڈھونڈ لیتا ۔۔رابطہ کر لیتا۔ اب وہ اسے کہاں ڈھونڈے ۔۔پتا نہیں کہاں چلی گئی ہوگی۔۔اسے بہت فکر ہو رہی تھی۔۔۔اس کا تو کوئی بھی نہیں تھا سوائے اس کے ۔۔وہ کہاں گئی ہوگی ۔۔؟ اس کے من میں بہت سے سوال اٹھ رہے تھے۔۔جن کا جواب بڑا ہولناک تھا ۔۔اسے کچھ بھی سجھائی نہیں دے رہا تھا ۔۔کیا کرے کسے بتائے وہ اپنی بیوی کو کھو چکا ہے ۔۔ ایک دو بار تو وہ رو بھی چکا تھا ۔۔
پتا نہیں کیوں وہ فاریہ کے لئے اتنا بے چین ہو گیا تھا ۔۔حالانکہ جب وہ پاس تھی تو اسے بالکل بھی اس بات کا احساس نہیں تھا کہ وہ اس کے لئے کیا بن گئی ہے۔۔اور اب اسے سوچنے کی ضرورت نہیں تھی ۔۔کیونکہ وہ جان گیا تھا وہ اس کے لیئے کیا بن چکی ہے۔۔۔
”فاریہ کہاں چلی گئی ہو تم۔۔پلیزززز واپس آ جاؤ ۔۔میں وعدہ کرتا ہوں تمہیں سارے مان دلا دوں گا۔۔سب کے سامنے کھڑا کر کے میں تسلیم کروں گا کہ تم میری بیوی ہو اور مجھے بہت عزیز ہو۔۔ تم میر ولا کی بہو ہو اور میر ولا کو ہر صورت میں تمہیں قبول کرنا ہے ۔۔پلیزززز کسی طرح بھی واپس آ جاؤ ۔۔میں تم سے بہت محبت کرتا ہوں ۔۔“ پہلی بار اپنے آپ سے اظہار محبت کرتا شانی تنہا سڑک کے بیچوں بیچ کھڑا چہرہ ہاتھوں میں دیئے رو پڑا تھا ۔۔اس کی نظروں کے سامنے فاریہ کا معصوم چہرہ گھوم رہا تھا ۔۔۔اس کا دل کھنچ رہا تھا ۔۔فکر و اندیشے اسے کھائے جا رہے تھے۔۔۔وہ کسی کو اس وقت اپنی پریشانی بتا بھی نہیں سکتا تھا ۔۔۔فاریہ اس وقت اس کے کہیں بھی نہیں تھی۔۔مگر پھر بھی ہر جگہ محسوس ہو رہی تھی۔۔
پھر ایک دم اسے زوار کا خیال آیا تھا ۔۔
”ہاں مجھے زوی کی مدد لینی چاہیے ۔۔وہ ضرور کسی بھی طرح میرے ساتھ مل کر فاریہ کو ڈھونڈوا دے گا۔۔“اس کے ذہن نے انگڑائی لی تھی اور وہ رونا بھول کر ایک دم واپس گیا تھا ۔۔
”مجھے زوار کو سب کچھ بتانا ہے۔۔فاریہ نے شاید ساری باتیں سن لی تھیں اور مزید بات نہ بگڑے اسی لیئے سب کچھ چھوڑ کر چلی گئی ہے ۔۔“وہ گاڑی میں بیٹھ کر اب واپس میر ولا جا رہا تھا ۔۔اضطراب سے مٹھی لبوں پہ ٹکائے اسے بس فاریہ ہی یاد آ رہی تھی۔۔
•••••••••••••
ڈاکٹر نے بستر پر لیٹی لڑکی کا معائنہ کیا تھا ۔۔اور پھر پلٹ کر میر ولا کے مکینوں کی سمت گھوما تھا ۔۔
”فکر مند ہونے کی بات نہیں ہے ۔۔بچی کو کوئی خاص چوٹ نہیں آئی ہے ۔۔بس شدید بخار کی کمزوری اور بی پی لو اور پھر گاڑی کی ٹکر کے خوف سے ہی بے ہوش ہوئی ہے ۔۔کچھ دیر تک اسے ہوش آ جائے گا ۔۔اور پھر ہی اب اس کی چوٹ کا تفصیلی جائزہ لیں گے ۔۔مرتضی میر صاحب درست فرما رہے تھے ۔۔ شاید کوئی اندرونی چوٹ آئی ہو۔۔مگر صاف پتا نہیں چل پا رہا ۔۔باقی میں نے پرسکرپشن لکھ دی ہے۔۔دو تین دن تک لے گی تو بالکل تندرست ہو جائے گی۔۔“ڈاکٹر نے مسکراتے ہوئے سب کو تسلی کرائی اور پھر اپنا بیگ اُٹھائے باہر کی سمت چل دیئے تھے ۔۔چھوٹے ماموں انھیں دروازے تک الوداع کرنے گئے تھے۔۔
”ابا حضور کچھ بتائیں تو یہ بچی ہے کون؟“اقراء ممانی نے اس معصوم اور کم عمر لیکن خوبصورت لڑکی کو دیکھ کر پوچھا تھا ۔۔
”پتا نہیں کون ہے بہو ۔۔مگر جب تک بے ہوش ہے تب تک تو میر ولا کی خاص مہمان ہے۔۔۔اس کے خیال اور بیمار پرسی میں کوئی کمی نہیں آنی چاہیے ۔۔جب تک یہ یہاں ہے اس کا خاص خیال رکھا جائے ۔۔جیسے ہی اسے ہوش آئے گا اس کے گھر کا پتا معلوم کر کے اسے باحفاظت گھر پہنچانا ہے ۔“
دادو نے سنجیدگی سے اپنی تمام بہوؤں کو دیکھ تاکید کی تھی۔۔انھوں نے فوراً خوش اخلاقی سے سر خم کر دیا تھا ۔۔وہ ایک سنجیدہ نظر اس بے ہوش لڑکی پر ڈالتے ہوئے ہنکارا بھر کر باہر نکل گئے۔۔تب زرناب پھپھو بستر پر اس کے قریب جگہ بناتے ہوئے پاس بیٹھ گئی تھیں ۔۔
”ماشاء اللّہ ۔۔بڑی ہی پیاری بچی ہے.“انھوں نے اس کا چہرے تکتے ہوئے پیچھے کھڑی بھابھیوں کی سمت دیکھا تھا۔۔وہ بھی اسے ہی دیکھ رہی تھیں ۔۔اس کی بکھری ہوئی حالت تھی اور کافی دیر رونے کی وجہ سے رخساروں میں نشان پڑے ہوئے تھے۔
”وہ تو ہے۔۔اللہ رحم فرمائے آمین “فائقہ ممانی نے دعا دی تھی۔۔۔
•••••••••••••
