Ye Manzil Asaan Nahin by Kainat Riyaz Last Episode Part 1

”نایاب تم کیا اس لڑکی سے ملی جو اچانک تایا ابو کی گاڑی کے سامنے آ گئی تھی ۔۔؟“کچن کی سلیب کو ناخن سے کھرچتی گم صم کھڑی نایاب کی سماعتوں میں ذیب کی آواز پڑی تھی۔۔اس نے ذرا کا ذرا مڑ کر سر نفی میں ہلا دیا ۔۔
یہ سچ تھا وہ کل کے تماشے سے بہت پریشان تھی۔۔ذکاء جو کل سے کمرے میں بند ہوا تو اگلی صبح تک اسے بخار ہو گیا تھا ۔۔صبح ہی تو ڈاکٹر اسے چیک کر کے گیا تھا ۔۔مگر وہ اسے ایک نظر دیکھنے بھی نہیں جا سکی تھی۔۔کس منہ سے جاتی ۔۔اور پھر وہ اس کے منہ پر اپنے کمرے کا دروازہ بند کرنے کے عمل سے اسے سمجھا چکا تھا کہ اب وہ اسکے کمرے میں کبھی قدم نہیں رکھ سکتی ۔۔اس کے باوجود بھی اس کی محبت میں جتنی بھی تڑپ رہی تھی۔۔اس کی تکلیف سے بے قرار ہو رہی تھی۔۔مگر زنانہ انا آڑے آ رہی تھی ۔۔جس نے اسے ذکاء کے کمرے کا رخ نہیں کرنے دیا تھا ۔۔ایک دل کہتا تھا مار دے انا اور چلی جائے کمرے میں۔۔جا کر بس طبیعت دیکھ لے اس کی ۔۔مگر دوسرے ہی پل اس کے اندر ذکاء کی نا انصافیوں کی سیڑھیاں بننے لگتیں ۔۔اور وہ اکڑ میں آ کر ارادہ ٹال دیتی ۔۔لیکن دل کو چین نہیں مل رہا تھا ۔۔
”اوہو مل تو آؤ ۔۔بہت پیاری اور خوبصورت لڑکی ہے۔اور ہم سب سے تو بہت اچھے سے، اخلاق سے بات بھی کر رہی ہے۔۔ پہلے تو ہوش آنے کے بعد بہت گھبرا رہی تھی۔۔کسی سے بات نہیں کر رہی تھی ۔۔شاکڈ تھی نا بہت ۔۔اب تو سب میں گھل مل کر بیٹھی ہوئی ہے۔۔سب کے سوالوں کا جواب بھی دے رہی ہے۔۔ “ذیبی کو وہ کچھ زیادہ ہی پسند آ گئی تھی ۔۔خوب متاثر دکھ رہی تھی۔۔نایاب نے یاسیت سے پلکیں اٹھا کر زیبی کو دیکھا ،مدھم سا مسکرائی اور پھر یونہی بے کیفی سے کھڑی ہو گئی۔۔انگشت شہادت اب بھی سلیب پر غائبانہ نقش چھوڑ رہی تھی ۔
”یہ کیا ؟کوئی دلچسپی نہیں ۔۔تم نا نایاب! تمہارا کچھ نہیں ہو سکتا ۔۔“وہ اس کی عدم توجہ پر ہونق پن سے چینخی اور متاسف سا سر جھٹک کر فریج کی سمت بڑھ گئی۔۔نایاب نے اداسی سے زیبی کی پشت دیکھی ۔۔وہ فریج کھول کر جھکی ہوئی تھی ۔۔
”ذیبی۔۔تم ذکاء کے پاس گئی تھی ؟ اب کیسی طبیعت ہے ان کی؟“اس کو سکون نہیں مل پا رہا تھا ۔۔
”ہاں۔۔۔بخار ہلکا ہے۔۔مگر نقاہت بہت ہو رہی ہے انھیں ۔۔۔ چہرہ بالکل زرد پڑ گیا ہے ان کا۔۔وہ بیمار بھی تو نہیں ہوتے اتنا۔۔لیکن جب ہوتے ہیں تو الامان ۔۔۔“وہ فروٹس نکالتے ہوئے پلٹی ۔۔اور جواب دے کر جھرجھری لے کانوں کو ہاتھ لگائے تھے ۔۔نایاب کے دل میں بے چینی کچھ اور بڑھی۔۔۔
”پھر۔۔وہ دوا نہیں لے رہے کیا؟“وہ ایک دم سب کچھ بھول بھال اس کی فکر میں اس کے پاس چلی آئی ۔۔ذیبی پھل اور باؤل لے کر ٹیبل پر بیٹھ رہی تھی۔۔
”وہی تو لینی ہے۔۔تبھی ماما نے کہاں کہ فروٹس کاٹ کر انھیں دے آؤں ۔۔کچھ اور نہیں کھا رہے وہ۔۔“وہ سرسری لہجے میں بتاتے ہوئے پھل کاٹنے میں مشغول ہو گئی تھی۔۔نایاب کے اندر بے تابیاں گھلیں۔۔
”کیوں نہیں کھا رہے کچھ۔۔فائقہ ممانی کہاں ہیں ۔۔وہ انھیں زبردستی کھلائیں نا کچھ ۔۔بیمار بندے کا تو ویسے بھی دل نہیں چاہتا ۔۔“ذیبی نے گھور کر اسے دیکھا ۔۔
”تو تم کھلا آؤ نا۔۔۔ اب سارے فرض ان کے ہی تو نہیں ہیں نا ۔تم پر بھی کچھ ذمےداری عائد ہوتی ہے ۔۔ “ذیبی نے منہ بسور کر سیب کی چھاتی پر چھری کا وار کیا تھا ۔۔اس کی بات پر نایاب شرمندہ ہو گئی ۔۔۔وہ اسے کیسے بتاتی وہ ذکاء کے کمرے میں کیسے جا سکتی ہے ۔۔
”لو بیٹھو اور یہ کاٹ کر دے آؤ اُنھیں ۔۔میں تو چلی دادو کے کمرے میں ۔۔سب اس وقت وہیں بیٹھے ہیں اور اس لڑکی کا انٹرویو چل رہا ہے ۔۔مجھے بھی اس میں شرکت کرنی ہے ۔۔“وہ اس کے کھلتے منہ کو نظر انداز کر اس پر پابندی لگا کر خود اٹھلاتی ہوئی کچن سے نکل بھی گئی تھی۔۔وہ بے چاری پیچھے سے پکارتی ہی رہ گئی ۔۔
”ذیبی سنو تو میں نہیں جا سکتی انھوں نے مجھے کمرے سے ۔۔“وہ کہتے کہتے یک دم رک گئی۔۔۔سوچ کہیں اور بھٹکی تھی۔۔
”نکالا تو نہیں تھا۔۔۔ ہاں انھوں نے مجھے کمرے سے نہیں نکالا تھا۔۔پھر میں کیوں نہیں جا رہی انھیں دیکھنے ۔۔مجھے جانا چاہیے۔۔ لڑائی جھگڑا اپنی جگہ مگر انھیں لے کر میری کچھ ذمےداریاں بنتی ہیں ۔۔خصوصاً تب جب وہ بیمار ہوں۔۔“
اس نے خود کلامی کر عہد باندھا اور تیزی سے پھل کاٹنے میں مہارت سے ہاتھ چلانے لگی۔۔
”ہاں انہوں نے واضح لفظوں میں تو نہیں کہا کہ میں ان کے کمرے میں نہیں جا سکتی ۔۔نکالا بھی نہیں ۔۔پھر مجھے تو دیکھو۔۔کتنی بے وقوف ہوں میں۔۔“وہ خود کو سرزنش کرتے ہوئے جب فروٹ کاٹ چکی تو تیزی سے باؤل اٹھا کر باہر نکل گئی تھی۔۔۔خود کی تسلی کے لئے یہی کافی تھا۔۔وہ اپنی عدالت میں بری ہو گئی تھی۔۔اور پھر اس کے کمرے پر بنا دستک دیئے بڑے ہی استحقاق سے دروازہ کھول کر وہ اندر قدم رکھ ٹھنڈی آہ بھر چکی تھی ۔۔۔
سامنے ہی کمرہ ہلکی روشنی سے سنا ہوا نظر آیا تھا ۔۔ہلکے گھومتے چھت کے پنکھے کو ایک نظر دیکھ وہ بستر کی سمت گئی تھی ۔۔جہاں اس ہرجائی کا وجود سینے تک کمبل تانے چت لیتا ہوا تھا۔۔۔آنکھوں پر کہنی دھرے وہ شاید سو رہا تھا ۔۔نایاب نے دیکھا تھا ۔۔یہ سیاہ سوٹ اس نے کل سے زیب تن کیا ہوا تھا۔۔جو کہ اب مسلا ہوا ملیح سا لگ رہا تھا ۔۔اور وہ کمزور سا محسوس ہو رہا تھا ۔نایاب کو نئے سرے سے اپنے لگائے تماشے پر افسوس ہوا۔۔۔اسے آرام سے یہ بات فائقہ ممانی کو بتانی چاہیے تھی ۔۔یوں بنا سوچے سمجھے واویلہ نہیں کرنا چاہیے تھا ۔۔نہ سب گھر والوں کے سامنے وہ ذلیل ؤ رسوا ہوتا اور نہ اسے فائقہ ممانی کا طمانچہ پڑتا ۔۔سب گھر والوں کے سامنے ماں سے اس عمر میں مار کھانا بڑا ہی شرمناک تھا۔۔۔شاید ذکاء کو اسی وجہ سے بخار ہو گیا تھا ۔۔وہ باؤل لے کر اس کے کچھ فاصلے پر جا کھڑی ہوئی تھی۔اسے آواز دے یا نہیں ۔۔عجب کشمکش میں کھڑی وہ لب کچل رہی تھی ۔۔جب اس آہٹ پر بے زار لیٹے ذکاء نے آنکھوں سے کہنی ہٹا کر آنے والے کو دیکھا تو آنکھوں میں غصے کی چنگاریاں اٹھ کھڑی ہوئی تھیں ۔۔ایک جھٹکے سے کمبل کھینچ کر بستر سے اٹھتے ساتھ اس نے نایاب کی بازو جکڑی تھی۔۔وہ اس افتاد پر گھبرا گئی۔۔
”تم یہاں کیا کر رہی ہو ۔۔کیا لینے آئی ہو یہاں ۔۔؟“وہ اس قدر غضب سے دانت چبا کر چینخا تھا کہ نایاب کا نازک سراپا تھرتھرا اٹھا تھا ۔اس کی آنکھیں لمحوں میں لہو چھلکانے لگی تھیں ۔۔کچھ بخار کی تمازت سے اتری سرخی اور کچھ غصے کی شدت دونوں نے مل کر اس کی آنکھوں کو بھیانک رنگ دے ڈالا تھا ۔۔نایاب کو اپنا سانس رکتا محسوس ہوا۔۔۔وہ غصے کا تیز تھا آج تک صرف سن رکھا تھا۔۔آج پہلی بار وہ دیکھ بھی رہی تھی وہ بھی بے حد قریب سے ۔۔
”میں کچھ لینے نہیں آئی ۔۔آپ کو بس دینے آئی ہوں یہ۔۔۔۔“نایاب نے گڑبڑاتے ہوئے دھیمی آواز میں باؤل اس کے سامنے کیا تھا ۔۔ذکاء نے ایک جھٹکے سے باؤل کو ہاتھ مارا اور فروٹ سارا بستر اور کچھ بستر سے نیچے بکھر گیا تھا ۔۔نایاب نے اس کے اس قدر شدید ردعمل پر سہم کر منہ پر ہاتھ رکھ لیا۔۔
”تمہارے ہاتھ کا تو آبِ حیات بھی منہ نہ لگاؤں میں مس نایاب! تمہارے جیسی عورت کبھی کسی کو سکون کی زندگی جینے نہیں دے سکتی ۔۔انھیں بس روز نئے نئے ڈرامے رچانے اور معصوم مظلوم بن کر سب کی توجہ کھینچنے کی پڑی رہتی ہے۔۔۔تاکہ وہ سب کی ہمدردیاں بٹور سکیں اور سب کو یہ جتا سکیں کہ وہ کتنے اچھے اور سچے ہیں اور ان کے ساتھ باقی لوگ کتنا غلط کرتے ہیں ۔۔۔صرف تم ہی سچی ہو نا نایاب ۔۔باقی تو ساری دنیا جھوٹی ہے۔۔۔منع کرتا تھا سب سے کہ مجھے خاندان میں نہیں پھنسنا ۔۔لیکن نہیں۔۔ سب نے منتیں کر کر کے تمہیں میرے ساتھ باندھ دیا۔۔۔میرے جیسا مرد تمہارے جیسی ڈرامے باز عورت کے ساتھ کبھی خوش رہ ہی نہیں سکتا تھا ۔مگر….“وہ غصے سے اندر کا سارا عتاب زہریلے تیروں میں لپیٹ کر اگلتے ہوئے اس کے وجود کی دھجیاں اڑا گیا تھا ۔۔وہ اس کے منہ سے نکلتے نفرت کے انگارے دیکھ شل کھڑی رہ گئی تھی۔۔کیا وہ ذکاء ہی تھا ۔۔۔یا اپنی بے وقوفی اور انا کی جنگ میں وہ اسے کھو چکی تھی۔۔۔لیکن کھونا کیسا ۔۔۔اس کے لئے تو پہلی شرط پانا ہوتا ہے۔۔نایاب نے تو کبھی اسے پایا ہی نہیں تھا ۔۔نایاب کے دل کا درد بڑھا اور بے یقینی سے اس کی آنکھوں میں موتی چمکنے لگے۔۔
ذکاء نے برجستہ خود کو روک کر مٹھی مسل سر جھٹکا تھا۔۔
”تم نکل جاؤ میرے کمرے سے ۔۔اس سے پہلے کہ میں کچھ کر جاؤں ۔۔جاؤ!“ اس نے ضبط کرکے اسے پرے دھکیلتے ہوئے باقی کا عتاب پی لیا تھا ۔۔نایاب اس کے دھکے سے لڑکھڑائی ضرور تھی مگر اپنی جگہ نہیں چھوڑی تھی ۔۔وہ اپنی جگہ چھوڑنا ہی نہیں چاہتی تھی ۔۔
”ذکاء یہ آپ کیا کچھ بول رہے ہیں میرے بارے میں ۔۔کیا میں آپ کو ایسی لگتی ہوں ۔۔؟“وہ بے یقینی سے اسے دیکھ رہی تھی۔۔آنسوں بھل بھل کر اس کی آنکھوں سے بہہ نکلے تھے۔۔وہ جانتی تھی وہ اس سے محبت نہیں کرتا تھا ۔۔۔مگر اس طرح نفرت بھی نہیں کرتا تھا ۔۔اور یہ نفرت نایاب جیسی نازگ آبگینوں سے بنی لڑکی کے لئے سہنا مشکل تھا ۔۔بہت مشکل۔۔۔
اس کے لبوں سے پھسلتے لفظ سن کر دکھتی ہوئی پیشانی مسلتے ذکاء نے گھور کر اسے دیکھا ۔
”ہاں میں تو ایسا ہی سمجھ سکا ہوں تمہیں اب تم۔۔تم کیسا سمجھتی ہو خود کو۔۔؟“اس کا طنز و تلخ سوال اور اس سے بھی زیادہ سفاک چہرہ نایاب کی ہستی جلا کر راکھ کر گیا تھا ۔۔اس کے الفاظ حلق میں ہی اٹکے رہ گئے ۔۔
”تم آئی کیوں ہو میرے کمرے میں۔۔۔کس نے اجازت دی تم یہاں قدم رکھو!“وہ پھر سے اس کی بازو دبوچ کر جارحیت سے چلایا تو نایاب کے اندر بولنے کی کچھ قوت آئی تھی ۔
”میرا بھی یہ اتنا ہی کمرہ ہے جتنا کہ آپ کا۔۔میں بیوی ہوں آپکی ۔۔آپ مجھے نکاح کر کے یہاں لائے ہیں ۔۔اور میں کیوں نہیں آ سکتی یہاں ۔۔آپ نے مجھے کہا تو نہیں تھا میں یہاں نہ آؤں ۔۔نکالا بھی نہیں تھا تو۔۔“
”نہیں نکالا تھا رائٹ!“وہ ایک دم چونکنے کی اداکاری کرتا لبوں میں مٹھی رکھ کر سر ہلانے لگا۔۔
”تب نہیں نکالا تھا نا۔۔اب نکال دیتا ہوں.“اس نے کہا اور پھر اچانک اس کی کلائی پکڑ لی ۔۔نایاب نے حیرت ؤ استعجاب کے ملے جلے تاثرات لیئے پہلے اسے پھر اپنی کلائی کو دیکھا تھا اور اس سے پہلے ہی کہ وہ کچھ سمجھ پاتی وہ اسے کھینچتے ہوئے تیزی سے دروازے کی سمت بڑھ گیا تھا ۔۔۔نایاب کے اوسان خطا ہوگئے ۔۔بوکھلاہٹ کا شکار ہو کر وہ اس کی مضبوط گرفت سے اپنا ہاتھ چھڑانے لگی۔۔
”یہ …یہ آپ کیا کر رہے ہیں؟ “بے حواسی سے وہ چینخی تھی۔۔
”تمہاری خواہش کو پورا کر رہا ہوں ۔۔تمہیں اپنے کمرے سے نکال کر!“ذکاء نے اسے لے جاتے ہوئے ایک دم دروازے کے باہر دھکا دے دیا تھا۔۔وہ گرتے گرتے بچی۔۔حیرانگی سے منہ کھولے اس نے نظر اٹھا کر ذکاء کو دیکھا تھا۔۔۔اسے یقین نہیں آ رہا تھا کہ وہ اسے ایک جھٹکے میں کھینچ کر نکالتے ہوئے باہر پٹخ چکا ہے ۔۔
”اب میں نے تمہیں اپنے کمرے سے نکال دیا ہے مس نایاب! اور اگر تم میں ذرا سی بھی غیرت ہوئی نا تو دوبارہ اس کمرے کی دہلیز پار مت کرنا۔۔۔سمجھی!“وہ انگلی اٹھائے تنبیہہ کرتے ہوئے کڑے اور سرد انداز میں بولا اور دھڑام سے دروازہ دے مارا ۔۔۔وہ ایک بار پر وہی کھڑی رہ گئی جہاں اس کا ذکاء اور اس کے کمرے پر کوئی حق نہیں تھا ۔۔۔۔
”اس نے کمرے سے نکالا تو نہیں تھا نا.“اسے قبل از قبل اپنے سوچے ہوئے جملے یاد آئے تو اس کی خوش فہمی کا مینار اس کے زعم کی طرح ہی مسخ ہو کر رہ گیا تھا ۔۔وہ اسے نکال چکا تھا۔۔۔نایاب نے ڈبڈبائی آنکھوں سے اس بند دروازے کو دیکھا ۔۔جس کے پیچھے وہ شخص تھا جس سے نایاب نے بہت محبت کی تھی۔۔مگر وہ اس کا قدردان نہیں تھا ۔۔اس کے تمام گمان چکنا چور ہوئے تھے۔۔وہ کیا کچھ اسے کہہ چکا تھا۔۔اس کے گلے میں آنسوؤں کا پھندا پھنسا تھا ۔۔وہ شاید سچ میں اس کے قابل نہیں تھی ۔۔اس کے ساتھ بڑی زیادتی کر دی گئی تھی۔۔اسے مجبور نہیں کرنا چاہیے تھا سب کو۔۔۔دادو کو اپنے فیصلے کو اس پر عائد کرنے سے قبل از وقت سوچنا چاہیے تھا ۔۔
وہ دل برداشتہ نظروں سے اس بند دروازے کو دیکھتی ہوئی پلٹ کر اپنے اس کمرے میں بند ہوئی تھی ۔۔جس میں وہ رات سے مقیم تھی۔۔مگر اس کے دل میں ابھی بھی اس سفاک کی فکر دبی ہوئی تھی۔۔۔
                         ••••••••••••••