Barang E Khwab E Seher By Saira Naz Part 1

اگلے دو دن بہت تیزی سے گزرے تھے۔۔۔۔ انقہ نے شیریں کرمانی کی جانب سے ان کے نکاح کی خبر ملنے پہ یوں خوشی کا اظہار کیا جیسے کچھ دیر پہلے کوئی بات ہی نہ ہوئی ہو۔۔۔ خریداری سے لے کر ہلے گلے تک، وہ ہر چیز میں بڑھ چڑھ کر حصہ لے رہی تھی۔۔۔ اس کی خوشی دیکھ کر کوئی اندازہ بھی نہ لگا سکتا تھا کہ دو دن پہلے اس نے اپنے ہاتھوں سے اپنی محبت کی تدفین کی ہے۔”واہ آپی! آپ کتنی پیاری لگ رہی ہیں۔“ کتھئی رنگ کی گھیر دار، شیفون کی پیروں کو چھوتی، ہم رنگ کڑھائی والی فراک کے ساتھ عنابی رنگ کا جالی دار دوپٹہ اوڑھے انقہ، سرمئی رنگ کے اوپر ہلکے پھلکے نقرئی کامدانی غرارے میں ملبوس اریکہ کو دیکھتے ہی بے ساختہ اس کی بلائیں لے اٹھی تھی۔”انقہ گڑیا! آپی آپ سے بہت محبت کرتی ہے۔۔۔ کیا میں آپ سے کچھ مانگ سکتی ہوں؟“ اپنی تعریف کے جواب میں اریکہ نے الگ ہی بات کی تھی۔”آپ کے لیے تو میری جان بھی حاضر ہے۔“ اس کی مانگ سے بے خبر انقہ کا لہجہ فدایانہ تھا۔”جان نہیں چاہیے۔۔۔۔ بس ایک وعدہ کرو مجھ سے!“ اس بار انقہ کو اس کا لہجہ کچھ غیر معمولی لگا تھا۔”کیسا وعدہ؟“ اس نے الجھن آمیز لہجے میں استفسار کیا تھا۔”ابھی کچھ دیر بعد میں جو بھی کہوں گی، تم وہ مانو گی۔“ انقہ اس کی بات پہ ٹھٹھک سی گئی تھی۔”آپ کیا کہیں گی؟“ اس کی آواز میں کئی اندیشے آپ ہی آپ در آئے تھے۔”ابھی نہیں! جاؤ پہلے ماما، خالہ، خالو اور ابراد کو بلا کر لاؤ۔“ ان ہدایات پر انقہ کچھ مزید الجھی تھی۔”وہ کس لیے؟“ اس نے حیرت بھرے لہجے میں دریافت کیا تھا۔”تم جاؤ تو سہی!“ اریکہ اسے زبردستی باہر بھیج کر خود سنگھار میز کے سامنے آ کر رک گئی تھی۔۔۔ آئینے میں نظر آتے اپنے عکس کو دیکھتے، وہ کسی غیر مرئی نقطے پہ نگاہیں جمائے ان لوگوں کی اس کے کمرے میں آمد پہ ہی چونکی تھی۔”کیا ہوا اریکہ؟“ شیریں کرمانی نے کمرے میں داخل ہوتے ہی فکر مندی سے استفسار کیا تھا۔”ابراد! مجھ سے وعدہ کرو کہ میں جو مانگوں گی، تم مجھے وہ دو گے۔“ ان کا سوال نظر انداز کر کے، وہ ابراد کے سامنے آ کر رکتے ہوئے بولی تھی۔”اریکہ! تمھیں جو بھی مانگنا ہے، نکاح کے بعد مانگنا۔۔۔ ابھی آؤ! باہر سب انتظار کر رہے ہیں۔“ وہ اس سے اتنی محبت کرتا تھا کہ بلا تاخیر اپنی ساری جاگیر اس پہ لٹا دیتا لیکن ابھی اس کے لہجے کا مان ابراد کو کچھ غلط ہونے کی خبر دے رہا تھا سو اس نے اسے کچھ بھی غیر معمولی کہنے سے روکنے کی ایک ادنی سی کوشش کی تھی۔”نہیں! مجھے جو چاہیے، وہ میں ابھی ہی لوں گی۔“ اس کے لہجے میں ضد عود کر آئی تھی۔”اریکہ بیٹا! تم یہ کیا باتیں لے کر بیٹھ گئی ہو؟“ عشرت عثمانی نے اسے ٹوکنا چاہا تو پرویز عثمانی نے ان کے کندھے پہ ہاتھ رکھا تھا۔”ابراد! ایک بار اس کی بات سن لو۔“ باپ کی ہدایت پر وہ ایک گہرا سانس بھر کر رہ گیا تھا۔”ابراد! اگر تم مجھ سے محبت کرتے ہو تو وعدہ کرو کہ میری خواہش ضرور پوری کرو گے۔“ اریکہ نے پھر سے اسے محبت نامی امتحان میں ڈال کر بے بس کرنے کی تیاری پکڑی تھی۔”محبت کی فطرت میں آزمائش نہیں ہوتی۔“ ابراد نے فرار کی ایک اور کوشش کرنا چاہی تھی۔آزمائش تو ہے ہی محبت کا دوسرا نام!“ اس کی جانب سے ترکی بہ ترکی جواب تیار تھا۔”کیا چاہتی ہو تم؟“ اس بار ابراد نے بات گھمائے پھرائے بنا پوچھا تھا۔”پہلے وعدہ کرو کہ تم میری بات مانو گے۔“ اریکہ ہر حال میں اسے پابند سلاسل کر دینا چاہتی تھی۔”میں بنا جانے یہ نہیں کر سکتا۔“ ابراد کا دماغ اسے کسی بھی یقین دہانی سے روکے ہوئے تھا وگرنہ دل تو فوراً محبت ثابت کرنے پہ تل گیا تھا۔”محبت میں بے یقینی کی کوئی گنجائش نہیں ہوتی۔۔۔ اگر تمھیں محبت ہے تو ثابت کرو۔“ اریکہ نے اس بار جذبات کا سہارا لیا تھا۔”کیسے؟“ ابراد کے یک لفظی سوال میں ان گنت اندیشے بول رہے تھے۔”تم انقہ سے نکاح کر لو۔“ اس کی مانگ پر شیریں کرمانی اور عشرت عثمانی نے اپنا اپنا دل تھاما تو انقہ بھی نا سمجھی سے اس گفتگو کے بیچ اپنا نام آنے پر اسے دیکھے گئی، جسے اس ساری گفتگو کی اردو میں ہونے کی وجہ سے کچھ خاص سمجھ تو نہیں آئی تھی لیکن اس آخری جملے کا مفہوم اسے اچھے سے سمجھ آ گیا تھا کہ وہ بھلے سے اردو بولنے میں اناڑی تھی لیکن اپنی ماں اور بہن کی گفتگو سن سن کر اسے بہت حد تک اس کی سمجھ آ جاتی تھی۔”کیا کہا ہے تم نے؟“ ابراد نے دوبارہ تصدیق چاہی کہ اسے یہ الفاظ اپنی سماعتوں کا دھوکہ لگے تھے۔”میں یہ نکاح نہیں کر سکتی۔“ اریکہ کی یہ بات انقہ کو بھی سمجھ میں آئی تھی۔”یہ تم کیا کَہ رہی ہو؟ اریکہ!“ شیریں کرمانی تو حیرت سے گنگ ہوئی تھیں۔”آپی!” انقہ نے سرگوشی کی صورت اسے پکارا تھا۔”کس کے کہنے پہ کر رہی ہو تم یہ؟“ ابراد کے دھاڑنے پر انقہ کی آواز کہیں دب ہی گئی تھی۔”مجھے کسی نے کچھ نہیں کہا۔۔۔ اگر تم مجھے زندہ دیکھنا چاہتے ہو تو وہ کرو جو میں کَہ رہی ہوں۔۔۔ اگر تم نے ابھی انقہ سے نکاح نہیں کیا تو میں اپنی جان لے لوں گی۔“ اریکہ نے کہتے ساتھ ہی نجانے کہاں سے ایک تیز دھار چاقو برآمد کرتے، اپنی کلائی پہ رکھا تھا۔”اریکہ!“ ایک ساتھ کئی بے یقین آوازیں اس کمرے میں گونجی تھیں۔”آپی! یہ آپ کیا کر رہی ہیں؟“ انقہ نے آگے بڑھ کر اریکہ کو روکنا چاہا لیکن اس سے پہلے ہی ابراد نے اپنی آہنی گرفت میں اس کی کلائی جکڑی تھی۔”یہ سب تم نے کیا ہے نا؟“ غیض و غضب کی تصویر بنا وہ اپنی لہو رنگ نگاہیں اس کے سفید پڑتے چہرے پہ گاڑھ کے غرایا تھا۔”میں نے کچھ نہیں کیا۔“ انقہ نے کمزور لہجے میں اپنا دفاع کرنا چاہا تھا۔”ابراد! تم انقہ سے نکاح کر رہے ہو یا نہیں؟ ویسے بھی ضروری نہیں کہ ہمیں زندگی میں ہر وہ چیز ملے جس کی ہمیں خواہش ہو۔” یہ وہ آخری بات بھی نہیں تھی جو وہ اریکہ کے منھ سے سننا چاہتا۔۔۔ اس کے دل میں آیا کہ انکار کر دے لیکن آج اسے سمجھ میں آیا تھا کہ انسان ہمیشہ وہ نہیں کر سکتا، جس کی وہ تمنا کرتا ہے۔۔۔ اس کے لیے اریکہ کی زندگی اپنی چاہت سے بڑھ کر تھی۔”ابراد! رکو بیٹا! بات تو سنو۔“ انقہ کی مزاحمت، پرویز عثمانی کی خاموشی، عشرت عثمانی اور شیریں کرمانی کی حیرت، مہمانوں کی چہ میگوئیاں کچھ بھی ایسا نا تھا جو اگلے کچھ منٹوں بعد ہونے والے نکاح کو روک سکتا اور رکا تو ابراد بھی نہیں تھا۔۔۔ عشرت عثمانی نے اسے روکنا چاہا تو وہ پہلی بار پلٹ کر اپنی ماں کو بھی جواب دے گیا تھا۔”مجھے اب مزید کچھ نہیں سننا۔“ نکاح ہوتے ہی انھیں لوگوں کے سوالوں کے جواب دینے کے لیے تنہا چھوڑ کر وہ گھر سے نکلا تو پھر رات گئے تک نہیں لوٹا تھا۔”ابراد! میری جان! اب جب نکاح کر ہی لیا ہے تو کس چیز کی ناراضگی ہے؟ گھر کیوں نہیں آ رہے تم؟“ اس رات نیند سب کی آنکھوں سے کوسوں دور تھی اور وہ سب ہی کہیں نا کہیں ابراد کے لیے پریشان تھے لیکن ان میں صرف عشرت عثمانی تھیں جو مسلسل اس سے رابطہ کرنے کی کوشش میں تھیں۔۔۔۔ آدھی رات کے قریب اپنے مقصد میں کامیاب ہوتے ہی انھوں نے ابراد کے رابطہ بحال کرنے پر سب سے پہلے اسے گھر لوٹنے کا کہا تھا لیکن آج ہر چیز گویا خلافِ توقع ہونا تھی۔”ماما! اریکہ میرے ساتھ ایسا کیسے کر سکتی ہے؟ میری محبت کی اتنی بڑی سزا! میں اسے کبھی معاف نہیں کروں گا اور نا ہی انقہ کو اپناؤں گا۔۔۔ اریکہ نے یقیناً اس کی محبت میں ہی یہ سب کیا ہے۔“ رات کے اس پہر اس سنسان سڑک پہ گاڑی چلاتے ابراد کی آنکھوں میں دھند کی ایک دبیز تہہ اتری تھی۔”بیٹا! آج جو کچھ بھی ہوا، اس میں انقہ کی کوئی غلطی نہیں ہے۔۔۔ یہ سب ایسے ہی ہونا لکھا تھا۔۔۔ تم گھر آؤ تو میں تمھیں سب بتا دوں گی۔۔۔ میرا دل بہت گھبرا رہا ہے۔۔۔ ایسے ماں کو نہ ستاؤ۔“ جس وقت عشرت عثمانی گلو گیر لہجے میں اس کی منت کر رہی تھیں، عین اسی پل پرویز عثمانی کمرے سے نکل کر قیام گاہ میں داخل ہوئے تھے۔۔۔ انھوں نے اشارے سے ان سے ابراد کی خیریت دریافت کی لیکن وہ ان کے چہرے کے تاثرات دیکھتے ہی ٹھٹھک کر رک گئے جو خطرناک حد تک سفید پڑ رہا تھا۔”ابراد! ابراد نہیں!“ وہ دیوانہ وار اسے پکارتے پیٹ کے بل دوہری ہوئیں تو وہ تیزی سے ان کی جانب لپکے تھے۔”عشرت! آنکھیں کھولیں! بتائیں مجھے کہ کیا ہوا ہے؟“ انھیں ہوش و حواس سے بے گانہ ہوتے دیکھ، وہ ان کا گال تھپتھپاتے ہوئے پوچھ رہے تھے لیکن جواب ندارد! اگلے ایک ڈیڑھ گھنٹے میں وہ جو اپنے شوہر کے بازوؤں میں گاڑی سے اسپتال تک گئی تھیں، ان کی واپسی سفید چادر سے ڈھک کر ایمبولینس میں ہوئی تھی۔۔۔ اس رات صرف عشرت عثمانی کی موت نہیں ہوئی تھی بلکہ وہ اپنے سینے میں کئی راز بھی لے گئی تھیں جن کے بارے میں تاحال کوئی نہیں جان پایا تھا۔______________________