شاہ حویلی میں صبح ہوتے ہی کھانوں کی مہک ہر طرف پھیلی ہوئی تھی.
ارحاب مکمل تیار ہوکر نیچے چلا آیا تھا جہاں حویلی کے تمام مکین پہلے ہی کھانے کی میز پر موجود تھے.
“ارحاب…میرے خیال میں اب تم تیس کے ہونے والے ہو اور اِس لائق ہوچکے ہو کے ہم تمہاری شادی کردیں.” مظہر شاہ نے کافی وقت بعد آج پھر سے اپنے مطلب کی بات شروع کی.
“میرا پہلے والا جواب ہی رہے گا میں شادی نہیں کرنا چاہتا.” ارحاب نے ایک بھی لمحہ لگائے بغیر دو ٹوک جواب دیا تھا.
“شاید میرا بیٹا زندہ ہوتا تو وہ میری عزت کرتا تم سے تو مجھے عزت کی توقع ختم کردینی چاہیے.” مظہر شاہ اب اپنے دوسرے ہتھ کنڈے پر اُترے تھے یعنی ایموشنل بلیک میلنگ.
“میرا وہی جواب ہے.” ارحاب کی سنجیدگی میں کوئی فرق نہیں پڑا تھا.
“ارحاب حیدر شاہ میں تمہارے باپ کا بھی باپ ہوں اور یہاں میرا ہی حکم چلتا ہے اور آج میں جارہا ہوں لڑکی دیکھنے اگر مجھے مناسب لگا تو ہاں کردوں گا.” مظہر شاہ اب اپنے جلال میں بولے تھے.
“میں بھی آپ کا ہی خون ہوں, عزت کرتا ہوں مگر اس کا یہ ہرگز مطلب نہیں ہے کے میں اپنی زندگی کا ساتھی آپ لوگوں کی مرضی سے ہی چُنوں گا.” ارحاب نے کھانے سے ہاتھ روک کر ٹھنڈا ٹھار لہجے میں جواب دیا تھا.
باقی سب تو ہمیشہ کی طرح ہی اُن دادا پوتے کی جنگ خاموشی سے دیکھ رہے تھے.
“شاید بھول رہے ہو تم اِس خاندان کے پہلے وارث ہو اور تم پر اِس خاندان کے اصول سب سے پہلے لاگو ہوتے ہیں.” مظہر شاہ نے غصے سے کہا.
“میں کبھی بھی اس خاندان کے بے تُکے اصولوں کا قیدی نہیں بنوں گا.” ارحاب بھی اب غصے میں آچکا تھا.
“ارحاب بیٹا وہ بڑے ہیں تمہارے.” رائنہ بیگم نے بیچ میں اسے ٹوک دیا.
“بیشک بڑے ہیں مگر میں شادی نہیں کرنا چاہتا بات ختم.” ارحاب اپنے فیصلے پر اب بھی اٹل تھا.
“تم جانتے ہو اصولوں کی خلاف ورزی کی کچھ سزائیں ہوتی ہیں.” مظہر شاہ نے اب اسے ڈرانا چاہ.
“جب اصول عمل کرنے لائق ہو تب عمل کروں نا جب لائق ہی نہیں ہو پھر کیسے میں اندھا دھند مان لوں.” ارحاب کسی طور ماننے کو تیار نہیں تھا.
“ارحاب اگر تم نہیں چاہتے ہو کے ارحام یا تمہاری ماں کو سزا ملے تو وقت کے ساتھ میری بات مان جاؤ.” مظہر شاہ اب اپنے آخری حربے یعنی دھمکی پر اترے تھے.
“ارحام اور میری ماں کا نام لینے کی غلطی مت کیجئے گا سردار مظہر شاہ ورنہ جو میں کروں گا وہ آپ کو ہضم نہیں ہوگا.” ارحاب غصے سے لال ہوتی آنکھیں مظہر شاہ کی آنکھوں میں ڈالے ٹیبل پر ہاتھ مار کر دھمکی دیتا حویلی سے باہر نکل گیا.
“دیکھ لی تربیت رائنہ تمہاری بھی, ہوتا ہمارا بیٹا تو شاید یہ کل کا لڑکا ہم سے ایسے بات نہ کرکے جاتا.” مظہر شاہ نے بہو کو افسوس بھری نظروں سے دیکھ کہا.
“ایک مام کی تربیت ہی نہیں کچھ خون کا اثر بھی ہے.” ارحام جوس کا آخری سپ لیکر کہتا وہاں سے اُٹھ گیا.
ارحام کے انداز پر وہاں موجود ہر شخص حیران ہوکر رہ گیا.
*****************************
