مغربی آسٹریلیا کا دارالحکومت پرتھ، جو ملک کے شور شرابے سے دور واقع ہے، اپنے پرسکون ماحول کی وجہ سے مشہور ہے۔ اسی لئے اسے آئسولیٹڈ سٹی کہا جاتا ہے۔ یہاں موجود سفید ریتیلے ساحل، نیلا صاف آسمان، قدرتی پارک اور ساحل سے نظر آتی اسکائی لائن اس کی خوبصورتی کو ایک جلا بخشتے ہیں۔
اس وقت یہاں صبح کا اجالا پورے شہر میں پھیلا ہوا تھا۔ لوگ کاروبارِ زندگی میں مصروف تھے۔ ایسے میں ایک ایشین آدمی جو دکھنے میں لگ بھگ ستائیس اٹھائیس برس کا ہوگا، سینٹ جارج ٹیرس میں واقع اپنے آفس کی لفٹ سے نکلتا دکھائی دے رہا تھا۔ کانوں میں لگے بلیو ٹوتھ میں وہ کسی سے دھیمے لہجے میں شستہ انگریزی میں بات بھی کرتا نظر آرہا تھا۔ دراز قد و قامت، کریو کٹ بال، کانچ سی گہری بھوری آنکھیں، چہرے پر ہلکی بڑھی شیو اور کھڑے ناک نقوش اس کی شخصیت کو ایک تمکنت بخش رہے تھے۔۔۔
“ٹرائی ٹو ارینج آ میٹنگ ود ہم!” دوسری طرف سے کچھ کہا گیا تھا جس پر وہ دھیما سا مسکرایا۔ مسکرانے سے اس کی آنکھیں چھوٹی ہوکر چندھیا گئی تھیں۔
“ایوری ون ہیز سم ویکنیسسزweaknesses)) ان دئیر لائیوز۔۔۔ جسٹ ٹرائی ٹو فائنڈ اٹ آؤٹ!” گہری مسکراہٹ سے جملہ ادا کرتے ہوئے اس نے فون ڈسکنکٹ کر کے، بلیو ٹوتھ کانوں سے نکالے اور اپنے آفس میں داخل ہوگیا۔ لیپ ٹاپ ورک ڈیسک پر رکھ کر سب سے پہلے گہرا نیلا کوٹ اتار کر ہینگر میں لٹکایا اور سفید شرٹ کی آستینیں موڑتا فرنچ ونڈو کے پاس آکر کھڑا ہو گیا، جہاں سے نظر آتاswan river آنکھوں کو ٹھنڈک بخشتا تھا۔ نیلے پانیوں پر نظر جمائے وہ اس وقت کسی گہری سوچ میں لگ رہا تھا۔۔۔ چہرے پر کچھ دیر والی بے فکری اب مفقود نظر آتی تھی۔۔ صاف لگ رہا تھا جیسے وہ شدید اضطراب میں ہو۔۔ جب ہی دروازے پر کھٹکا ہوا۔۔ ساتھ ہی اس کے چہرے کے تاثرات ایک بار پھر بدلے تھے۔۔۔ لگتا تھا اسے اپنے احساسات اور جذبات چھپانے میں ملکہ حاصل تھا۔۔۔ دونوں ہاتھ پینٹ کی جیب میں ڈالے آنے والے کو اجازت دیتا وہ ایک گہرا سانس لے کر پلٹا اور چھوٹے چھوٹے قدم اٹھاتا اپنی کرسی پر جا کر براجمان ہوا۔۔۔
“سر۔۔” آنے والے نے کچھ کہنے کے لئے منہ کھولا۔۔
“مسٹر ولسن یو آر فائیرڈ!” اس سے پہلے اگلا اپنی بات مکمل کرتا۔۔ وہ اپنی کرسی کو دائیں بائیں جھلاتے اپنا حکم نامہ صادر کر چکا تھا۔۔۔ آنے والے نے بے یقینی کی کیفیت میں پوری آنکھیں کھول کر اسے دیکھا۔۔ جیب سے ٹشو نکال کر ماتھے پر آیا پسینہ صاف کیا اور دوبارہ کچھ کہنے کے لئے منہ کھولنا چاہا۔۔۔
“یو مے گو ناؤ!”
“اینڈ لسن!!!” اس سے پہلے ولسن نامی شخص کمرہ چھوڑتا وہ ایک بار پھر چہرے پر سرد تاثرات سجائے اسے مخاطب کر رہا تھا۔۔۔۔
“یور وائف از ڈراپنگ یور ڈاٹر آف ایٹ نرسری۔۔۔۔ ٹیک کئیر!” ہاتھ میں پہنی گھڑی کو انگلی سے بجاتے اس نے ایک بار پھر گہری نظریں سامنے والے پر جمائیں۔۔۔۔ گہری بھوری آنکھوں میں سفاکیت کے رنگ واضح دیکھے جا سکتے تھے۔۔۔ جبکہ سامنے کھڑے شخص نے اضطرابی کیفیت میں جیب سے فون نکالا۔۔۔ اب اس کی کانپتی انگلیاں تیزی سے کی پیڈ پر چل رہی تھیں۔۔
“ہیلو جینی۔۔ آر یو آلرائٹ؟ وہئیر از میری؟” بے ربطگی سے جملہ ادا کرتے ہوئے نگاہیں ان سفاک آنکھوں پر جمی تھیں جہاں سوائے ٹھنڈک کے کچھ محسوس نہیں کیا جا سکتا تھا۔۔۔ دوسری طرف سے کچھ تسلی کروائی گئی تھی جب ہی اس نے موبائل بند کر کے جیب میں رکھا۔۔۔
“آئی ول کل یو!!!” اب کی بار کف اڑاتا وہ تیزی سے آگے بڑھا۔۔۔ اسے اندازہ ہو گیا تھا کہ اس کی گیم اس پر ہی الٹ گئی تھی۔۔۔ اور نتیجہ سامنے تھا۔۔۔۔
“ڈونٹ ڈئیر ٹو!” دونوں پاؤں اٹھا کر میز پر رکھتے سامنے والے نے تنبیہی انداز میں ابرو کے ساتھ شہادت کی انگلی اٹھائی۔۔۔۔
“اٹس جسٹ آ ٹریلر۔۔۔۔ گیٹ لاسٹ فرام مائی آفس۔۔۔۔ آئی ڈونٹ وانٹ ٹو سی یو اگین۔۔” اس سے پہلے ولسن نامی شخص مزید کچھ کہتا، دو لمبے تڑنگے آدمی کمرے میں داخل ہوئے۔۔۔ اور اسے کمرے میں پڑے کسی فالتو سامان کی طرح اٹھا کر لے گئے۔۔۔ ان کے نکلتے ہی ایک بار پھر اس کے نقوش تنے تھے۔۔۔ پاؤں میز سے اتار کر، لب بھینچے اس نے قریب رکھا لیپ ٹاپ اٹھا کر نظروں کے سامنے کیا۔۔۔ کچھ ہی دیر بعد کی پیڈ پر تیزی سے چلتی انگلیاں کچھ پیغام لکھ رہی تھیں۔۔ جبکہ چہرے پر اب کرختگی کی جگہ سنجیدگی رقم تھی۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
