اسلام آباد کے اس پوش علاقے میں موجود بنگلہ اس وقت نیم اندھیرے میں ڈوبا ہوا تھا۔۔۔ گھر میں موجود سناٹا بتاتا تھا جیسے وہاں کوئی موجود نہ ہو۔۔۔ لیکن بنگلے کی اوپری منزل پر جاؤ تو راہداری کے آخری سرے پر موجود کمرے میں دو نفوس دھیمی آواز میں بات کرتے نظر آ رہے تھے۔۔۔
“تمہیں منع بھی کیا تھا کہ یہاں منہ اٹھا کر مت چلے آیا کرو۔۔” کمرے کی دیوار پر دو سائے لہرا رہے تھے جن میں سے ایک نے انگلی اٹھا کر ہلکی غراہٹ میں جواب دیا۔۔
“باس نے کہا ہے کہ اگلے ہفتے تمہیں اپنے مشن پر جانا ہے۔۔ تو تیار رہو۔” آنے والے نے اس کی گھرکی کی پرواہ کئے بنا پیغام پہنچایا۔۔۔
“باس سے کہہ دینا کہ میں نے کام کرنے کی ہامی بھری تھی۔۔ غلامی کرنے کی نہیں۔۔۔ جو بنا میری پرائیوسی کا خیال کئے تمہیں میرے سر پر مسلط کر دیا ہے۔۔ اب تم فوراً یہاں سے نو دو گیارہ ہو جاؤ۔۔۔” ادھ کھلی کھڑکی کی جانب اشارہ کرتے ہوئے پہلا سایہ ایک بار پھر دانت پیستا غرایا۔۔
“تو دو دن سے تم آخرغائب کہاں ہو؟ نہ فون اٹھاتی ہو نہ آفس آ رہی ہو۔۔ اگر تم کام میں انٹرسٹڈ نہیں ہو تو صاف کہہ دو۔۔ یہ کام کسی اور کو سونپ دیا جائے گا۔۔” آنے والا بھی ڈھیٹ لگتا تھا۔۔ اس کی ناراضی کی پرواہ کئے بنا وہ اپنی بات مکمل کر کے ہی جانے والا تھا۔۔
“طبعیت خراب تھی میری۔۔ اور اگلے ہفتے میں ابھی پورا ہفتہ پڑا ہے۔۔۔ میں وقت پر پہنچ جاؤں گی۔۔” لہجے میں بیزاریت اور ناگواری صاف محسوس کی جا سکتی تھی۔۔ وہ جانتی تھی جب تک وہ آنے کی ہامی نہیں بھرے گی وہ اس کے سر پر سوار رہے گا۔۔۔
“ٹھیک ہے۔۔ تمہارا ٹکٹ اور پاسپورٹ تمہیں اگلے دو دن بعد مل جائے گا۔۔” آنے والے کی جیسے تشفی ہو گئی تھی۔۔
“اب تم یہاں سے نکل جاؤ اور آئندہ گھر پر مت آنا۔۔ اتنی مشکل سے نیند آئی تھی اور اس منحوس نے ایک بار پھر اڑا دی۔۔۔” بیڈ کے سائیڈ ٹیبل سے موبائل اٹھا کر ٹائم دیکھتے، ایک بار پھر اسے گھور کر وہ بڑبڑائی۔۔ آنے والا اب خود بھی بڑبڑاتا ہوا کھڑکی کے راستے نیچے اتر رہا تھا۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس وقت سینٹ جارج ٹیرس میں واقع آفس کے اندر بیٹھا مرد اپنے سامنے بیٹھے شخص کی بات بہت غور سے سن رہا تھا۔۔ چند دن پہلے اس نے اسے ایک بہت اہم شخص کی معلومات اکھٹی کرنے کے لئےبھیجا تھا۔۔۔ اور آج وہ کافی حد تک کامیاب لوٹا تھا۔۔ مقابل کے چہرے پر ایک فاتحانہ مسکراہٹ دوڑ رہی تھی۔۔
“گڈ جاب!” الفاظ کے برعکس لہجہ ہمیشہ کی طرح سنجیدہ تھا۔۔
“میری اس کے ساتھ ایک میٹنگ ارینج کرواؤ۔۔” لیپ ٹاپ کھول کر اس پر نظر جمائے وہ دوبارہ اپنے کام کی جانب متوجہ ہو چکا تھا۔۔۔
“اوکے سر۔۔۔” آنے والا شخص اب دروازہ کھول کر باہر نکل رہا تھا۔۔۔ جبکہ وہ لیپ ٹاپ پر نظر آتے اپنی فیملی پکچر والے وال پیپر پر ہاتھ پھیر کر رہ گیا۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
